E Liua Lo Tatou Tiga e avea ma Olioli
Ou te valaaulia i latou uma o e lagonaina le faanoanoa po o le tiga, i latou uma o taumanatunatu po o le a le mea e tupu pe a mavae lo tatou oti, ina ia tuu atu lo outou faatuatua ia Keriso.
I nai tausaga ua mavae, a o ou auai i fonotaga i le Aai o Sate Leki, sa faafeiloaia a’u e lo tatou perofeta pele, o Russell M. Nelson. I lana ala masani patino ma le agalelei, sa ia fesili mai, “Mark, o a mai lou tina?”
Sa ou ta’u atu ia te ia sa ma faatasi ma ia i le amataga o lena vaiaso i lona fale i Niu Sila ma ua pulapula lagoto lona soifua, ae o loo tumu pea i le faatuatua ma o se uunaiga lava i tagata uma e silafia o ia.
Ona ia saunoa mai lea, “Faamolemole momoli atu ia te ia o’u alofaaga … ma fai i ai o loo ou tulimatai atu i le toe vaai ia te ia.”
Sa fai si o’u te’i ma sa ou fesili, “O i ai sau malaga o fuafua mo Niu Sila i se taimi lata mai?”
Faatasi ai ma le utagamamao faamaoni na ia tali mai, “Oi e leai, o le a ou vaai ia te ia i le isi olaga.”
Sa leai se faaulaula i lana tali. Sa o se faamatalaga masani atoatoa o le mea moni. I lena taimi ma’oti, ma le le mafuafuaina, sa ou faalogo ai ma lagonaina le molimau mama a’ia’i mai se perofeta soifua e faapea e faaauau pea le ola pe a mavae le oti.
O le konafesi i lenei faaiuga o le vaiaso, o le a outou faalogo ai i aposetolo ma perofeta soifua o molimau mai i le Toetu o Iesu Keriso. “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na maliu o Ia, ma tanumia, ma toetu mai i le aso tolu[;] … ma o isi mea uma e faatatau i lo tatou talitonuga ua na o ni faaopoopoga i [lenei mea moni].”1 Ou te folafola atu a outou faalogologo ma le loto faamaoni, o le a faamautu e le Agaga i lou mafaufau ma lou loto le moni o nei molimau.2
Sa suia e faavavau ia Aposetolo anamua a Iesu ina ua mavae Lona faaali atu ia i latou i le mavae ai o Lona maliu. E toasefulu i latou sa latou vaai lava i latou ua toetu o Ia. Na tautino mai e Toma, o le na le’i i ai muamua, “Afai ou te le vaai atu … ou te le talia lava.”3 Mulimuli ane na apoapoai atu ai Iesu ia Toma: “Aua le masalovale, ae ia talitonu.”4 Ona aoao atu ai lea e le Alii o le matafaioi taua o le faatuatua: “Amuia o e le vaai mai, ae talitonu mai pea.”5
Na tuuina atu e le Alii i Ana Aposetolo le poloaiga e molimau atu e uiga ia te Ia. E faapei o o tatou Aposetolo i ona po nei, ua latou tuua galuega faalelalolagi ae faaalu aso o totoe o o latou soifua e tautino atu ai ma le totoa e faapea na toefaatuina mai e le Atua lenei Iesu. O a latou molimau mamana ua taitai atu ai le fiaafe e talia le valaaulia ina ia papatiso.6
O le savali mamalu o le taeao o le Eseta e tutotonu i le FaaKerisiano uma. Na toetu mai Iesu Keriso mai le oti, ma ona o Ia, o le a tatou toe ola ai foi pe a mavae lo tatou oti. O lenei iloa ua aumaia ai le uiga ma le faamoemoega i o tatou olaga. Afai tatou te agai atu i luma i le faatuatua, o le a suia i tatou e faavavau, e faapei foi o Aposetolo anamua. O i tatou, pei foi o i latou, o le a mafai ona onosa’ia soo se faigata ma le faatuatua ia Iesu Keriso. O lea lava faatuatua tatou te maua ai foi le faamoemoe i se taimi e liua ai lo tatou tiga e avea ma olioli.”7
O lo’u lava faatuatua na i ai lona lava amataga ina ua mavae se taimi o tiga.
O lo’u tama ma lo’u tina o ni tagata fai lafu mamoe i Niu Sila.8 Sa fiafia lava i o la olaga. I le avea ai o se ulugalii talavou, sa faamanuiaina i la’ua i se fanau teine e toatolu. O le ui’i o i latou e igoa ia Ann. I se tasi aso ao fai aso malolo i se vaituloto, sa savalivali ese atu Ann e 17-masina le matua. I le mavae ai o ni nai minute o le sailiga faatapito, sa maua o ia ua maliu i le vai.
O lenei tala matautia na afua ai se tiga e le mafaamatalaina. Sa tusia e lo’u tama i ni tausaga mulimuli ane e faapea, na mou atu le fiafia mai o latou olaga e faavavau. Na afua ai foi se naunautaiga i fesili aupito taua o le olaga: “O le a le mea o le a tupu i la ma pele o Ann? Pe matou te toe vaai ea ia te ia? E mafai ea faapefea ona toe fiafia lo matou aiga?
I ni nai tausaga talu ona mavae lenei mafatiaga, sa o mai ai ni faifeautalai talavou se toalua mai Le Ekalesia a Iesu Keriso o le Au Paia o Aso e Gata Ai i la matou faatoaga. Sa amata ona la aoao mai ia upumoni o loo maua i le Tusi a Mamona ma le Tusi Paia. O nei upumoni e aofia ai le faamautinoaga o loo ua nofo nei Ann i le lalolagi o agaga. Ona o le Toetu o Iesu Keriso, o le a toetu ai foi o ia. Sa la aoao mai e faapea o le Ekalesia a Iesu Keriso o le Au Paia o Aso e Gata Ai, ua toefuatai mai i le lalolagi ma o loo i ai se perofeta soifua ma Aposetolo e toasefululua. Ma sa la aoao maia le aoaoga faavae ofoofogia tulagaese e faapea e mafai ona fusia faatasi aiga e faavavau e le pule lava lea o le perisitua na tuu atu e Iesu Keriso i Lana Aposetolo sinia, o Peteru.8
Sa iloaina loa lava e lo’u tina le moni ma sa mauaina se molimau a le Agaga. Peitai, o lo’u tama, sa tauivi ma masalosaloga ma uunaiga faaleagaga i le isi tausaga. E le gata i lea, sa faatuatuai o ia i le suiga o le ala e ola ai. I se tasi taeao i le mavae ai o se po na le maua ai se moe, a o fesavaliai i totonu, sa ia faliu atu ia Tina ma fai atu, “O le a ou papatiso i le asō po o le leai lava.”
Na ta’u atu e Tina i faifeautalai le mea na tupu, ma sa vave ona la iloaina le ma’alo o le aloiafi o le faatuatua i lo’u tama a le feulaina i le taimi nei o le a mate.
O lena lava taeao na malaga ai lo matou aiga i le matafaga aupito lata ane. E aunoa ma le iloaina o le mea ua tupu, sa tafafao i matou o le fanau i le matafaga i le oneone ao taitai atu e Elders Boyd Green ma Gary Sheffield o’u matua i le sami ma papatiso ai i la’ua. I se isi faatinoga o le faatuatua, sa tautino ma’oti atu ai e lo’u Tama lava ia i le Alii po o le a lava le mea e tupu, o le a ia faamaoni i lona olaga atoa i folafolaga sa ia faia.
E tasi le tausaga na mavae mulimuli ane, sa faapaiaina ai se malumalu i Hamilitone, Niu Sila. E le’i leva mulimuli ane, ae tootutuli lo matou aiga, faatasi ai ma se tasi sa sui ia Ann, faataamilo i le fatafaitaulaga i lena maota paia o le Alii. O iina, sa tuufaatasia ai i matou o se aiga e faavavau i se sauniga faigofie ma le matagofie, e ala i le pule o le perisitua. Na aumaia ai le filemu ma le olioli tele.
E tele tausaga mulimuli ane na ta’u mai ai e lo’u Tama, e faapea a na leai le oti matautia o Ann, semanu e le lava lona lotomaualalo e talia ai le talalelei toefuataiina. Ae na totoina e le Agaga o le Alii le faamoemoe e faapea, o mea sa aoao mai e faifeautalai e moni. Sa faaauau pea ona tuputupu ae le faatuatua o o’u matua seia oo ina ua tofu faamumuina e le afi mumu o molimau lea na taiala filemu ai ma le lotomaualalo a la’ua faaiuga uma o le olaga.
O le a ou faafetai pea lava pea mo le faataitaiga a o’u matua mo augatupulaga i le lumanai. E le mafai ona fuaina le aofaiga o olaga ua suia e faavavau ona o a la’ua faatinoga o le faatuatua e tali atu ai i le tiga ogaoga.
Ou te valaaulia i latou uma o e lagonaina le faanoanoa po o le tiga, i latou uma o loo tauivi ma le masalosalo, i latou uma o taumanatunatu po o le a le mea e tupu pe a mavae lo tatou oti, ia tuu atu lo outou faatuatua ia Keriso. Ou te folafola atu afai e te manao e talitonu, ona galue loa lea i le faatuatua ma mulimuli i musumusuga a le Agaga, o le a e maua le olioli o le olaga nei ma i le lalolagi a sau.
E maeu lo’u sagisagi atu i le aso o le a ou feiloai atu ai i lo’u tuafafine o Ann. Ua ou sagisagi atu i se toetuufaatasiga e tumu i le fiafia ma lo’u tama, o lē na maliu i le 30 tausaga ua mavae. Ou te molimau atu i le olioli e maua i le ola e ala i le faatuatua, talitonu ae le’i vaai i ai, ae iloa e ala i le mana o le Agaga Paia o loo soifua Iesu Keriso. Faatasi ai ma lo’u loto ma le agaga atoa, ua ou filifili e mulimuli ia Iesu Keriso ma Lana talalelei toefuataina. Ua faamanuiaina ai vaega uma o lo’u olaga i lenei mea. Ua ou iloa o Iesu Keriso, o le Alo o le Atua, o lo tatou Faaola ma lo tatou Togiola. I le suafa o Iesu Keriso, amene.