O Lo Tatou Faaola Patino

I le tolusefulu-fa tausaga talu ai, sa ma feiloai ai ma la’u soa faifeautalai ma aoaoina se tagata atamai tele o ia o se tusitala iloga mo se nusipepa i le lotoifale i le Aai o Davao, Filipaina. Sa ma fiafia lava e aoao o ia ona sa tele naua ana fesili ma sa tumu o ia i le faaaloalo i o tatou talitonuga. O le fesili e sili ona manatua pea na fesili mai ai o le “Se a lo [oulua] taofi ia Keriso?”² Sa ma fiafia e faasoa atu o ma’ua lagona ma tuu atu le ma molimau e uiga ia Iesu Keriso. Sa ia lolomiina mulimuli ane se tusiga e uiga i le autu lava lea sa aofia ai ni upu ma ni fasifuaitau matagofie e uiga i le Faaola. Ou te manatuaina lou fiafia ae sa le’i faagaeetiaina. Sa i ai ni faamatalaga lelei, ae sa gaogao ii ma sa le’i i ai se mana faaleagaga.

“Se a lo outou taofi i le Keriso?” Ua ou iloaina e faapea, o le tele o lo’u iloa lelei o le Faaola, e tosina tele ai lo’u gafatia e faalogo ia te Ia, faapea foi le ala ou te tali atu ai. I nai tausaga ua mavae, sa fai ai e Elder David A. Bednar ia fesili nei o se vaega o lana saunoaga: “Pe ua na ona tatou iloa ea e uiga i le Faaola, pe ua faateleina lo tatou iloa o Ia? E faapefea ona tatou iloaina le Alii?”³

A o ou suesue ma manatunatu loloto, sa oo ina ou maua le malamalama manino faapea o le mea ua ou iloa e uiga i le Faaola sa matua sili mamao atu i le tele o lo’u iloa moni o Ia. Ona tonu ai lea ia te au ia ou faia ni taumafaiga e tele atu ia ou iloa o Ia. Ou te matua faafetai lava mo tusitusiga paia ma molimau a alii ma tamaitai faatuatua o soo o Iesu Keriso. O la’u lava malaga i nai tausaga talu ai, na faasavalia ai a’u i le tele o auala o suesuega ma le mauaina o mea fou. Ou te tatalo o le a momoli atu e le Agaga Paia ia te outou i le asō se fe’au e sili mamao atu nai lo upu e le lava ua ou tusia.

Muamua, e ao ina tatou iloa o le iloaina o le Faaola o le tulimataiga aupito sili lea ona taua o ō tatou olaga. E ao ona faamuamua i lo se isi lava mea.

“O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”⁴

“Ua fetalai atu Iesu ia te ia, O a’u nei le ala, ma le upumoni, ma le ola, e le alu atu lava se tasi i le Tama, pe a le ui mai ia te a’u.”⁵

“O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola.”⁶

Lona lua, a o faateleina lo tatou iloa o le Faaola, ua oo foi ina atili anoa lelei ia mau faatusipaia ma upu a perofeta ia i tatou, ma ua oo ai lava ina avea ma a tatou lava upu. E le o le kopi i upu, lagona, ma aafiaga o isi e tusa ai ma le oo ina iloaina mo i tatou lava, i la tatou lava ala tulagaese, e ala i le faata’ita’ia o le upu⁷ ma le mauaina o se molimau mai le Agaga Paia. E pei ona sa tautino mai e le perofeta o Alema:

“Tou te le manatu ea ua iloa nei mea e a’u lava? Faauta, ou te molimau atu ia te outou, ua ou iloa ua moni lava nei mea uma ua ou tautala atu ai. Ma o le a so outou manatu e faapefea ona ou iloa lo latou moni?

“Faauta, ou te fai atu ia te outou sa faailoa mai i latou ia te au e ala i le Agaga Paia o le Atua. Faauta, sa ou anapogi ma tatalo i aso e tele ina ia mafai ona ou iloa nei mea mo au lava ia. Ma o lenei ua ou iloa mo au lava ia ua moni nei mea; ona o le Alii le Atua na ia faailoa mai nei mea ia te au e ala mai i lona Agaga Paia; ma o le agaga lea o faaaliga ua ia te au.”⁸

Lona tolu, o se malamalama faateleina faapea o le Togiola a Iesu Keriso e faatatau ia i tatou lava ia ma o le a fesoasoani taitoatasi ia i tatou ia iloa o Ia. E tele taimi e faigofie atu mo i tatou ona mafaufau ma tautatala e uiga i le Togiola a Keriso i mea faalauaitele, nai lo le faailoaina o le taua patino i o tatou olaga. O le Togiola a Iesu Keriso e le i’u ma e faavavau ma e aofia ai le lautele ma le loloto o mea uma ma tagata uma ae e aafia patino ai i tatou uma taitoatasi. Ona o Lana taulaga togiola, ua i ai i le Faaola le mana e faamama, faamalolo, ma faamalolosia ai i tatou taitoatasi.

Na pau le naunauga o le Faaola, na pau Lona faamoemoega, mai lava i le uluai amataga, o le faia lea o le finagalo o le Tama. O le finagalo o le Tama ia lagolago o Ia i le “[aumaia] o le tino ola pea ma le ola e faavavau o le tagata”⁹ i le avea ai ma o tatou “fautua i le Tama.”¹⁰ O lea, “e ui o ia o se Alo, ae o mea sa tiga ai o ia, na aoaoina ai o ia ia usiusitai, ma faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia.”¹¹

“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma. …

“Ma o le a ia ave i ona luga le oti, ina ia mafai ona ia tatalaina fusi o le oti i … ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, … ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.

“… E mafatia le Alo o le Atua e tusa ai ma la le tino, ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana laveaiga.”¹²

Ou te fia faasoa atu se aafiaga faatauvaa e faapupula atu ai tauiviga e i ai nisi taimi tatou te oo i ai ina ia faatauaina ai le natura patino o le Togiola a le Alii.

I tausaga ua mavae, i le valaaulia a lo’u taitai pulefaamalumalu, sa ou faitauina ai le Tusi a Mamona mai le tasi faavaa i le isi, ma faailoga ia fuaiupu e ta’ua ai le Togiola a le Alii. Sa valaaulia foi a’u e lo’u taitai e saunia se aotelega e tasi le itulau o mea sa ou aoaoina. Sa ou faapea ifo ia te a’u lava, “Tasi le itulau? Ioe, e faigofie.” Ae peitai, sa ou ofo, ona sa ou maua e matuai faigata tele le galuega ma sa ou le mafaia.

Na amata mai iina ona ou iloaina ua ou toilalo ona sa ou misia le faamoemoega ma sa sese o’u manatu tau’ave. Muamua, sa ou faapea e tatau ona faaosofia e le aotelega tagata uma. O le aotelega sa mo a’u ae le mo se isi lava tagata. Sa tatau ona avatu ai o’u faalogona ma lagona e uiga i le Faaola ma mea sa Ia faia mo a’u ina ia fola manino ai aafiaga patino faaleagaga, o’oo’o matagofie, i taimi uma ou te faitauina ai.

Lona lua, sa ou faamoemoe i le aotelega ia maoae ma auiliili ma i ai ni upu ma ni fasifuaitau tetele. E lei faatatau lava i ni upu tetele. Sa tatau ona avea o se tautinoga manino ma le faigofie o le talitonuga maumaututu. “Aua e fiafia loʼu agaga i le manino; ona o le ala lenei ua galue ai le Alii le Atua i totonu o le fanauga a tagata. Aua e tuu mai e le Alii le Atua le malamalama ia malamalama ai.”¹³

Lona tolu, sa ou faamoemoe ina ia atoatoa, o se aotelega e faaiu ai aotelega uma—o se aotelega faaiu e le mafai ma e le tatau ona toe faaopoopo e se tasi—nai lo o se galuega o agaigai i luma lea e mafai ona ou faaopoopo i ai se upu po o se fasifuaitau a o tuputupu a’e lo’u malamalama i le Togiola a Iesu Keriso.

A o avea ma se alii talavou, sa ou aoaoina le tele o mea mai a’u talatalanoaga ma lo’u epikopo. I le aluga o na tausaga mu’amu’a, sa ou aoao ai e fiafia i upu nei mai se viiga lauiloa:

Ou te faaiu atu i upu nei mai le perofeta o Moronae: “O lenei, ou te apoapoai atu ia te outou ia outou saili lenei Iesu o le ua tusi i ai le au perofeta ma aposetolo.”¹⁵

Na folafola mai e Peresitene Russell M. Nelson e faapea “afai [tatou] te faaauau pea ona aoao mea uma [tatou] te mafaia e uiga ia Iesu Keriso, … o le a faateleina [lo tatou] tomai e liliu ese ai mai le agasala. O [lo tatou] manao e tausi poloaiga o le a faateleina.”¹⁶

I lenei Aso Sa o le Eseta, e faapei lava ona sa afio mai i fafo le Faaola mai Lona tuugamau maa, se’i o tatou ala maia mai lo tatou moe faaleagaga ma tutula’i ae i luga atu o ao o le masalosalo, o taofiofiga o le atuatuvale, o le oona o le faamaualuga, ma le faanāina e le lotomalie. O loo soifua Iesu Keriso ma le Tama Faalelagi. Ou te molimau i lo La’ua alofa atoatoa mo i tatou. I le suafa o Iesu Keriso, amene.