Li k’utuk jo’ li Kolonel

Wiib’ oxib’ po chaq anajwan, un wech aj tzolonel chaq junxil sa’ lin tenamit, Overton, Nevada, xye naq maare naru naqak’e junaq xmaatan li qak’utunel sa’ li guarderia, li kixket 98 chihab’. A’an kixk’ut chiqu li wank sa’ chaab’ilal, naq aajel ru li hilank, lix sahil ruk’b’al li leech rik’in ki’il galleet, ut chixraab’al qib’ chiqib’il qib’. B’antiox aawe, Hermana Davis, xb’aan naq k’a’jo’ aachaab’ilal jo’ aj k’utunel.

Jalam-uuch

Li Hermana Davis

Kiwan ajwi’ chaq jun chik aj k’utunel k’a’jo’ xchaab’ilal naq kintzolok sa’ li Colegio Universitario Ricks, k’iila chihab’ chaq anajwan. Yookin chaq chixkawresinkil wib’ choq’ re li mision ut kink’oxla naq maare us raj naq tinwulaq chi tzolok chirix li mision. A’b’an li k’a’ru xintzol aran kixjal lin yu’am.

Chirix li xb’een sut naq kinwulak, kink’e reetal naq k’a’jo’ xchaab’ilal laj k’utunel. Laj k’utunel a’an, a’an li Hermano F. Melvin Hammond. Kinnaw naq li Hermano Hammond naxra li Qaawa’ ut naq nikinixra ajwi’ laa’in. Nak’utun sa’ li ru ut naq na’aatinak. Naq nak’utuk, li Musiq’ej naxkutanob’resi lin k’a’uxl. Naxk’ut li tzol’leb’, a’b’an naxk’e ajwi’ inb’oqb’al chixtzolb’al a’an injunes. Ut a’an kinixtenq’a chixk’eeb’al reetal lin teneb’ankil chixtzolb’al lix tzol’leb’ li Qaawa’ injunes. Li na’leb’ a’an kixjal inyu’am chi junelik. B’antiox aawe, Hermano Hammond, xb’aan naq nakatk’utuk jo’ li Kolonel.

Ex was wiitz’in, chiqajunilo k’ulub’ejo chixnumsinkileb’ li na’leb’ ajwi’ a’an, sa’ li qochoch jo’ ajwi’ sa’ li Iglees.

Li xtikib’ankil Kim, Taaqehin naxk’ut k’a’ru naru nab’aanuman naq nokok’utuk jo’ li Kristo. Naxye: “Li na’ajman ru sa’ chixjunil li tzolok ut li k’utuk li na’uxman sa’ li evangelio, a’an xnimob’resinkil lix jalajik qach’ool chirix li Jesukristo, ut qatenq’ankil chi wank chi mas wi’chik jo’ a’an. … Li tzolok chirix li evangelio li naxkawob’resi li qapaab’aal ut naxk’e chi uxmank li sachb’a-ch’oolejil jalaak sa’ qach’ool, ink’a’ sa’ junpaat na’uxman. Ink’a’ ka’ajwi’ na’uxman sa’ li tzoleb’aal, a’b’an sa’ rochoch ut sa’ xch’ool junaq.”¹

Eb’ li loq’laj hu neke’xye naq lix k’anjel li Kolonel sa’ li najter ch’och’ America k’a’jo’ xnimal xwankil ut xmetz’ew toj reetal naq “keʼjalman xchʼool choqʼ re li Qaawaʼ, chiru chixjunil lix bʼeen li chʼochʼ, ebʼ laj Nefita joʼebʼ ajwiʼ laj Lamanita, ut moko keʼwan ta li wechʼok-ibʼ ut li jachok-ibʼ saʼ xyanqebʼ, ut li junjunq chi winq kixbʼaanu li kʼaʼru tiik chiribʼilebʼ ribʼ.”²

Chan ru naq li naqak’ut naru naxb’aanu ajwi’ a’an rik’ineb’ li kristiaan neke’qara? Chan ru toowulaq chi k’utuk jo’ li Kolonel ut te’qatenq’a li qas qiitz’in chixjalb’aleb’ xyu’am? Tinwotz junjunq li na’leb’ eerik’in.

Sa’ xb’een chixjunil, k’ehomaq eech’ool chixtzolb’al chixjunil li naru cheru chirix laj Tzolol reheb’ laj k’utunel. Chan ru naq kixk’ut chaq lix rahom reheb’ li ras riitz’in? K’a’ru ke’reek’a li kristiaan naq kik’utuk chaq a’an? K’a’ru kixk’ut chaq? K’a’ru kiroyb’eni chaq rik’ineb’ li kixtzoleb’? Chirix naq teetz’ileb’ rix li patz’om a’an, k’ehomaq reetal chan ru nekexk’utuk ut yalomaq k’utuk jo’ naq nak’utuk a’an.

Li Iglees naxk’e qe naab’al li k’anjeleb’aal re li k’utuk sa’ li aplicacion Biblioteca del Evangelio ut sa’ LaIglesiadeJesucristo.org. Jun reheb’ li k’anjeleb’aal a’an, a’an Li k’utuk jo’ li Kolonel. Nekexinb’oq chirilb’al ut chixtzolb’al li junjunq chi aatin chi sa’. Eb’ li na’leb’ a’an texxtenq’a sa’ xyalb’al eeq’e chi wulak mas wi’chik jo’ li Kristo naq nekexk’utuk.

Li na’le’b’ jun chik nak’utun sa’ jun lin numsihom wiib’ oxib’ po chaq anajwan, naq kinnume’ chaq chirula’aninkil jun wamiiw. Kiwab’i b’ayaq naq li rixaqil yoo chi aatinak rik’in jun chik kristiaan, kinpatz’ xkuyb’al inmaak sa’ junpaat re li wamiiw re naq taaq’ajq rik’in lix junkab’al.

Maare jun hoor chik chirix a’an, kink’ul jun li esil sa’ lin celular taqlanb’il xb’aan lix chaab’il ixaqil: “Hermano Newman, b’antiox aawe naq xatwulak sa’ qochoch. Tento raj naq xatqak’e chi nume’k, a’b’an, nawaj xwotzb’al aawe k’a’ru li yooko xb’aanunkil. Chalen naq xtikla chaq li yajel, rajlal domingo naqatzol Kim, Taaqehin rik’ineb’ li qalal ak ninqeb’, sa’ li Zoom. Ut xb’aan a’an qilom k’iila sachb’a-ch’oolej. Nink’oxla naq toj anajwan xb’een sut, li qarab’in yoo chirilb’al lix Hu laj Mormon xjunes. Anajwan xqachoy tzolok chirix lix Hu laj Mormon, ut a’an yooko xb’aanunkil naq xatnume’ chiqilb’al. … Xink’oxla naq maare taawulaq raj chawu xnawb’al chan ru naq li Kim, Taaqehin, li Zoom, ut li yajel naxk’e qahoonal chixjalb’al junaq li aamej. … A’an naxk’e chink’oxla lix k’ihal li kok’ sachb’a-ch’oolej nak’ulman sa’eb’ li hoonal jo’ a’in.”

Nink’oxla naq, a’in xtz’aqob’resinkil ru li k’a’ru kixyeechi’i qe li Awa’b’ej Russel M. Nelson sa’ octubre re 2018. Kixye naq lix tzolb’al li evangelio sa’ ochoch chi tenq’anb’il xb’aan li Iglees “wan xwankil chirach’ab’ankil lix wankilaleb’ li junkab’al, a’ yaal jo’ chanru li junjunq li junkab’al naxyal xq’e chixjalb’al li rochoch jo’ jun santil na’ajej re paab’aal. Ninyeechi’i naq sa’ xyalb’al eeq’e chi anchal eemetz’ew chixchaab’ilob’resinkil eerochoch jo’ jun na’ajej re xtzolb’al li evangelio, rik’in xnumikeb’ li kutan, lee hilob’aal kutan te’ok choq’ sahil kutan eere. Lee kok’al te’raj raj xtzolb’al ut xyu’aminkileb’ lix k’utum li Kolonel. … Nimaq xwankil li jalaak teek’ul sa’ lee junkab’al.”³ Ch’ina-us li yeechi’ihom a’in!

Re naq taajalaaq tz’aqal li qayu’am, li jalaak choq’ re li Jesukristo tento naq tixram chixjunil li qaam ut taarak’ob’resi chixjunil li k’a’aq re ru sa’ li qayu’am. Xb’aan a’an naq tento taqajayali li qilob’aal sa’ xyi li qayu’am—li qajunkab’al ut li qochoch.

Li na’leb’ jun chik a’an naq najultikaq eere naq li jalaak nachal chaq sa’ lee ch’ool. Jo’ chanru nak’utman sa’ li jaljookil ru aatin chirixeb’ li lajeeb’ chi tuq’ixq, moko naru ta naq taqawotz raj li aseeyt re li qajalajik, us ta jwal naqaj raj xwotzb’al. Jo’ kixye li Elder David A. Bednar: “Li loq’laj aseeyt a’in natam chi ka’ch’inq … rik’in kuyuk ut yalok q’e. Maachan chik jalan naq natam; moko naru ta chik li kawresink-ib’ toj sa’ xraqik chixjunil.”⁴

Kim, Taaqehin k’uub’anb’il sa’ xb’een li yaal a’an. Laa’in ninjuntaq’eeta rik’in li anjel li kitenq’ank re laj Nefi chi tzolok chirix li Jesukristo, rik’in xyeeb’al, “Ilon!”⁵ Jo’ li anjel a’an, Kim, Taaqehin nokoxb’oq chi ilok ut chi sik’ok sa’eb’ li loq’laj hu ut sa’ raatineb’ li profeet re xtawb’al li Kolonel ut rab’inkil. Jo’ laj Nefi, toob’eresiiq sa’ junjunqal xb’aan li Musiq’ej naq yooqo chixtzolb’al ut chixtz’ilb’al rix li raatin li Dios. Kim, Taaqehin a’an li nasub’uk qe sa’ xchamal lix yo’yookil ha’il lix tzol’leb’ li Kristo.

Lix teneb’ankileb’ li na’b’ej yuwa’b’ej juntaq’eet chi us rik’in a’an. Eb’ li alalb’ej neke’reechani naab’al reheb’ lix na’leb’ li na’b’ej yuwa’b’ej, a’b’an li nawom ch’oolej moko naru ta chi eechaniik. Jo’ naq moko naru ta naqamin ru junaq iyaj chi k’iik, moko naru ta ajwi’ naq te’qak’e junaq xnawom xch’ooleb’ li qakok’al. A’b’anan, naru naqakawresi li na’ajej b’ar wi’ te’xch’olani, rik’in chaab’il ch’och’, b’ar wi’ maak’a’ li k’ix li “taakamsinq re li aatin.” Naru naqayal qaq’e chixk’eeb’al junaq chaab’il na’ajej reheb’ li qakok’al—ut xkomoneb’ chik li qakomon—re naq te’xtaw xna’aj li iyaj, “te’rab’i ut te’xtaw ru li aatin”⁶ ut te’xk’e reetal xjuneseb’ “naq chaab’il li iyaj.”⁷

Jalam-uuch

Li Hermano Newman ut laj Jack, li ralal

K’iila chihab’ chaq anajwan li walal aj Jack ut laa’in koowulak chaq chi b’atz’unk sa’ li campo Old Course aran San Andres, Escocia, b’ar wi’ kitikla chaq li golf. K’a’jo’ xchaq’al ru a’an! Naq kooq’aj chaq sa’ kab’l, kinyal inq’e chixwotzb’al rik’ineb’ li was wiitz’in xchaq’alil ru li xqanumsi chaq. A’b’an ink’a’ kinru. Li jalam-uuch, li video, ut lix yalb’al inq’e chixch’olob’ankil moko kitz’aqlok ta. Toj reetal naq, kintaw ru naq wi nawaj naq junaq chik kristiaan tixtaw ru li kiqanumsi chaq sa’ li campo re San Andres tento naq taaxik sa’ li na’ajej a’an, taaril chaq li b’e, tixmusiq’a chaq li iq’, taareek’a chaq li iq’ sa’ xnaq’ ru, ut tixyal chaq xkutb’al li b’olotz’ sa’ li jul ut sa’ lix xchaq’al ru utz’u’uj aran.

A’an ajwi’ nak’ulman rik’in li raatin li Dios. Naru naqak’ut, naqayaab’asi, naqach’olob’. Naru noko’aatinak chirix, ut naru ajwi’ naqach’olob’ xyaalal a’an. A’b’anan, wi li kristiaan ink’a’ nareek’a lix loq’laj aatin li Dios jo’ ratz’amke sa’ xb’een li raam rik’in lix wankil li Musiq’ej,⁸ yal chanchanaq naq taaril xjalam-uuch junaq xchaq’al ru na’ajej. Tento naq twulaq chaq aran. Li jalaak na’uxman sa’ junesal—na’uxman sa’ li ch’utub’aak.

Chixjunileb’ li neke’k’utuk sa’ ochoch ut sa’ li Iglees naru neke’xk’e xhoonaleb’ li ras riitz’in chixtawb’aleb’ li musiq’ejil na’leb’. Rik’ineb’ li numsihom a’an, te’wulaq chixnawb’al “li yaal chirix chixjunil li k’a’aq re ru.⁹ Li Awa’b’ej Nelson kixye: “Wi wan aapatz’om chirix li evangelio malaj chirix li Iglees, wi nakakanab’ chi numtaak li Dios, taak’ame’q aab’e re taataw ru li junelikil yaalil na’leb’ li te’b’eresinq re laa yu’am ut tate’xtenq’a re naq xaqxooqat chi kaw sa’ xb’ehil li sumwank.”¹⁰

Ninb’oqeb’ laj jolominel ut laj k’utunel re li junjunq chi ch’uut sa’ li Iglees chi aatinak sa’ komonil rik’ineb’ li na’b’ej yuwa’b’ej ut eb’ li saaj re naq teechaab’ilob’resi li k’utuk, sa’eb’ li oqech, li teep, ut sa’ ochoch. Taa’uxmanq a’in naq nak’utman li tzol’leb’ ut na’uxman li aatinak rik’in xtenq’ li Musiq’ej chirixeb’ li yaal naxk’ut chiqu li Santil Musiq’ej naq naqatzoleb’ li loq’laj hu.

Ex raarookil wamiiw rik’in li Kristo, teneb’anb’ilo chixb’aanunkil li k’a’ru kixb’aanu laj Tzolonel ut chi k’utuk jo’ a’an. Chan ru nak’utuk a’an, a’an li tz’aqal yaal! Wi naqataaqe, “naq jo’q’e tixk’ut rib’ toowanq chanchan a’an, xb’aan naq taqil a’an jo’ chanru naq wan; re taawanq qik’in li yo’onihom a’in; re taasaqob’resiiq qu jo’ chanru ajwi’ naq saq ru a’an.”¹¹ Sa’ xk’ab’a’ li kiwakil chi yo’yo, laj Tzolol reheb’ laj k’utunel, a’ li Jesukristo, amen.