Laa’at naru taach’utub’ Israel!
Ninnaw naq eb’ li saaj neke’ru chixb’aanunkil a’in xb’aan aniheb’ a’an ut xb’aan li nimla wankilal li wan rik’ineb’.
Oxib’ chihab’ chaq, li Awa’b’ej Russell M. Nelson kixb’oq chixjunileb’ li saaj re Lix Iglees reheb’ laj Santil Paab’anel sa’ Roso’jikeb’ li Kutan “chi ok sa’ li teep chi saaj kristiaan re li Qaawa’ re xch’utub’ankil Israel,” li yo’yookeb’ ut li kamenaqeb’. A’an kixye, “Li ch’utub’ank a’an li k’anjel q’axal aajel ru li yoo chi k’ulmank sa’ li ruchich’och’ anajwan.”1 Ex saaj, ninnaw naq naru nekeb’aanu a’in—ut chi chaab’il—xb’aan (1) anihex ut xb’aan (2) li nimla wankilal li wan eerik’in.
41 chihab’ chaq, wiib’ li misioneer re li qa’Iglees ke’b’eresiik sa’ jun ochoch aran Nueva Jersey, Estados Unidos. Moqon, ke’kub’e xha’ li na’b’ej yuwa’b’ej ut chixjunileb’ lix kok’al, lajeeb’eb’. Jo’ naxye li profeet, ke’xkanab’ naq “taanumtaaq li Dios”2 sa’ xyu’ameb’. Tinye raj “sa’ qayu’am.” Laa’in roxil xkok’aleb’. Wuqlaju chihab’ inyu’am naq kinsik’ ru ok sa’ sumwank re xtaaqenkil li Jesukristo. A’ut, ma nekenaw k’a’ chik ru kinsik’ ru? Ink’a’ tinxik sa’ mision. Jwal ch’a’aj a’an. Ink’a’ taapatz’manq naq tinxik, pe’ yaal? Toj ak’in sa’ li Iglees. Maak’a’ lin tumin. Us ta toje’ xintz’aqob’resi li tzolok sa’ li basico aran Filadelfia ut xinnumta sa’ xb’een li xiwxiw aran, chi muqmu kinxuwa li elk sa’ wochoch chiru wiib’ chihab’.
Anihat chi tz’aqal
A’ut, toje’ xintzol naq laa’in ut chixjunileb’ chik koowan rik’in li qaChoxahil Yuwa’ jo’ musiq’ejil ralal xk’ajol a’an naq maji’ nokoyo’la arin. Ke’wan li kristiaan li tento te’xnaw, jo’ xinnaw laa’in, naq a’an taaraj naq chixjunileb’ li ralal xk’ajol te’xk’ul li junelik yu’am rik’in a’an. Naq toj yamyo li ruchich’och’, a’an kixk’ut chiqu lix k’uub’anb’il na’leb’ re li kolb’a-ib’ ut li sahil ch’oolejil, rik’in li Jesukristo choq’ aj Kolol qe. A’ut, laj Satanas ink’a’ kixk’ulub’a lix na’leb’ li Dios.3 Jo’ naxye sa’ li hu Apokalipsis, “kitiklaak jun li nimla yalok u sa’ choxa”!4 Laj Satanas kixb’alaq’i jun rox jachal reheb’ li musiq’ejil ralal xk’ajol li qaChoxahil Yuwa’ re te’xk’ulub’a naq taanumtaaq a’an ut ink’a’ li Dios.5 A’b’an ink’a’ laa’ex. Li apostol aj Jwan kiril naq kexnumta sa’ xb’een laj Satanas “rik’in li aatin xeye chi yaal.”6
Xnawb’al anihin laa’in, chi tenq’anb’il xb’aan li wosob’tesinkil xb’aan li yuwa’b’ejil aj k’anjel, kixk’e inmetz’ew ut inpaab’aal re xk’ulub’ankil lix b’oqom li Awa’b’ej Spencer W. Kimball re xch’utub’ankil Israel.7 A’in li taa’uxq sa’ lee yu’am, ex wamiiw. Lee nawom naq ak xeq’ax ru laj Satanas rik’in lee ch’olob’ahom naru texxtenq’a chi rahok, wotzok, ut b’oqok8 anajwan ut junelik—re xb’oqb’aleb’ chixjunil chi chalk ut chirilb’al, chi chalk ut chi tenq’ank, ut chi chalk ut chi kanaak, sa’ li pleet a’in choq’ re li raameb’ li ralal xk’ajol li Dios.
Li nimla paab’aal li wan eerik’in
Ut li nimla wankilal li wan eerik’in? K’oxlahomaq a’in: xejap eere xb’aan xsahil eech’ool9 chirix li chalk sa’ jun t’anenaqil ruchich’och’ b’ar wi’ tookamq sa’ tib’elej ut sa’ musiq’ej. Qajunes qib’ ink’a’ tooruuq raj chi numtaak sa’ xb’eeneb’ li kamk a’an. Taqak’ul raj rahilal xb’aan li qamaak, ut xb’aan ajwi’ xmaakeb’ li qas qiitz’in. Chiqajunilo taqanumsi raj li jar paay chi yot’e’k ut raho’k10 taawanq raj chi tz’apb’il rib’ li qak’a’uxl chirix li Dios, ut li xik’ na’ilok qe ink’a’ raj tixkanab’ qarahob’tesinkil ut qaaleenkil. Li qayo’onihom chirix li q’ajk rik’in li Dios chi waklijenaqo chi yo’yo ut chi saqob’resinb’ilo k’eeb’il sa’ xb’een lix yeechi’ihom jun ajwi’ chi kristiaan li taakoloq qe.11
K’a’ru kixk’e eemetz’ew chi xik chi uub’ej? Li Awa’b’ej Henry B. Eyring kixye, “Ki’ajman ru li paab’aal chirix li Jesukristo re xxaqab’ankil xwankil li k’uub’anb’il na’leb’ re sahil ch’oolejil ut lix k’anjel li Kristo sa’ a’an, rik’in naq b’ab’ay ajwi’ aanawom chaq chirix li ch’a’ajkilal tatnume’q wi’ sa’ ruchich’och’.”12 Naq li Jesukristo kixyeechi’i naq taayo’laaq ut tixk’e lix yu’am re qach’utub’ankil13 ut qakolb’al, ink’a’ ka’ajwi’ kepaab’ li raatin. “Q’axal nim xpaab’aal” lee “tiikil musiq’,”14 jo’kan naq kenaw naq ch’olch’o ru lix yeechi’ihom.15 A’an ink’a’ natik’ti’ik, ut laa’ex keril a’an chanchan naq ak kixhoy xkik’el sa’ eek’ab’a’, najter chi toj maji’ nayo’la.16
Jo’ kixye laj Jwan, “xeq’ax ru [laj Satanas] sa’ xk’ab’a’ lix kik’el li Karneer.”17 Li Awa’b’ej Dallin H. Oaks kixye naq sa’ li kutankil a’an, “keril li roso’jik chalen chaq sa’ lix tiklajik.”18
K’oxlahomaq naq xik raj eere sa’ li tzoleb’aal, ut eena’ malaj eeyuwa’ naxyeechi’i chi yaalnaq tixk’uub’ li tzakemaq jwal nawulak cheru naq texq’ajq sa’ ochoch! Jwal nasaho’ eech’ool! Sa’ li tzoleb’aal nekek’oxla li tzakemaq a’an, ut ak yookex chixyalb’al xsahil. Ak re naq teewotz li chaab’il esil a’an reheb’ lee ramiiw. Jwal nekeyo’oni q’ajk sa’ kab’l ut jwal sa eech’ool, jo’kan naq neke’nume’ sa’ junpaat lee examen ut lee k’anjel. Maak’a’ naru chixsachb’al xsahil eech’ool malaj lee yo’onihom; nekenaw naq ch’olch’o ru li xyeechi’iman eere! Chi jo’kan ajwi’, rub’elaj naq kiyo’la lee tiikil musiq’, ketzol naq ch’olch’o ru lix yeechi’ihom li Kolonel, ut keyal xsahil li kolb’a-ib’ naxk’e.19 Lee nimla paab’aal a’an chanchan chik li rich’mulil lee metz’ew li naniman rajlal sut naq nekereek’asi eerib’, a’b’an ak xcha’al lee tib’el.
Chan ru teerajsi lee nimla paab’aal chirix li Kristo ut teeroksi re xch’utub’ankil Israel anajwan ut re numtaak wi’chik sa’ xb’een laj Satanas? Rik’in xtzolb’al wi’chik ilok chi uub’ej ut xk’eeb’al reetal naq toj ch’olch’o ru lix yeechi’ihom li Qaawa’ re qach’utub’ankil ut qakolb’al anajwan. A’an naroksi lix Hu laj Mormon ut eb’ lix profeet re xk’utb’al chiqu chan ru taqab’aanu. Naq maji’ nayo’la li Kristo, “eb’ li profeet [aj Nefita”, ut eb’ laj tij, ut eb’ laj tzolonel … [ke’xq’unb’esiheb’ xch’ool li tenamit] naq te’ril chi uub’ej li Mesias, ut te’xpaab’ a’an li taachalq jo’ chanchan naq ak chalenaq.”20 Li profeet aj Abinadi kixye, “Anajwan ut wi ta li Kristo inkʼaʼ kichal saʼ li ruchichʼochʼ, ut ninʼaatinak chirix li kʼaʼaq re ru toj taachalq chanchan naq ak chalenaq, inkʼaʼ raj kiru kiwan li tojbʼal-ix.”21 Jo’ laj Alma, laj Abindadi “ki’ilok chi uub’ej rik’in rilob’aal li paab’aal”22 ut kiril lix yeechi’ihom li Dios re qakolb’al jo’ naq ak tz’aqob’resinb’il ru. “Ke’numta sa’ xb’een [laj Satanas] rik’in lix kik’el li Karneer, ut rik’in li aatin re li yaal ch’olob’anb’il xb’aaneb’,” k’iila chihab’ ma nayo’la li Kristo, jo’ keb’aanu laa’ex. Ut li Qaawa’ kixk’e xwankilaleb’ chixb’oqb’al ut chixch’utub’ankil Israel. Tixb’aanu ajwi’ choq’ eere naq nekex’ilok chi uub’ej rik’in paab’aal, nekech’utub’ Israel—sa’ chixjunil li ruchich’och’ jo’ ajwi’ sa’ lee “sutam”23—ut nekeb’oq chixjunileb’!
K’iila cient chi misioneer ke’xnimob’resi li nimla paab’aal chirix li Kristo li kiwan reheb’ naq maji’ neke’yo’la rik’in rilb’aleb’ li ani neke’xtzol chi tiqto choq’ re li kub’iha’ ut li santil ochoch. Sa’ li esil, “Tikib’ chi wan roso’jik chawu,”24 li Awa’b’ej Nelson kixseraq’i chan ru kixb’aanu a’in, ut kixtaqlaheb’ laj jolominel reheb’ li mision naq te’xk’ut chiruheb’ li misioneer chan ru te’xb’aanu a’an. Xnawb’al naq ke’xk’anjela nimla paab’aal chirix li Jesukristo naq maji’ neke’yo’la kixtenq’aheb’ li qamisioneer “chirab’inkil A’an”25 ut chixk’anjelankil lix paab’aaleb’ re xch’utub’ankil Israel jo’ kixyeechi’i li Qaawa’.
A’b’an, xk’oxlankil li tik’ti’ naxq’unb’esi li paab’aal.26 Ex wamiiw, xk’oxlankil malaj rilb’al li k’a’ru naxsach xwankil anihex laa’ex, jo’ li pornografia, tixq’unob’resi lee paab’aal chirix li Kristo ut, wi ink’a’ nekejal eek’a’uxl, tixsach lee paab’aal. Chek’oxla b’an li k’a’ru tixnimob’resi lee paab’aal chirix li Kristo, ink’a’ li k’a’ru tixsach.
Li k’anjel choq’ reheb’ li kok’al ut li saaj
Li k’anjel choq’ reheb’ li kok’al ut li saaj a’an jun profeetil k’anjeleb’aal re eetenq’ankil chixnimob’resinkil lee paab’aal. Li Awa’b’ej Oaks kixye, “Li k’anjel a’an xk’uub’aman re eetenq’ankil chi ok jo’ li Kolonel sa’ kaahib’ chi na’leb’: sa’ musiq’ej, sa’ komonil wank, sa’ tib’elej, ut sa’ k’a’uxleb’aal.”27 Naq kaweb’ xch’ool li saaj chixyu’aminkil li evangelio, chirilb’aleb’ lee ras eeriitz’in, chixb’oqb’aleb’ chixjunil rik’in li evangelio, chixjunajinkileb’ li junkab’al chi junelik, ut chixk’uub’ankileb’ li kok’ k’anjel chaab’ileb’,28 li nimla paab’aal chirix li Kristo li kiwan eerik’in naq maji’ nekexyo’la taak’utunq wi’chik ut tixk’e eewankil chixb’aanunkil lix k’anjel a’an sa’ li yu’am a’in!
Jo’kan ajwi’, lee meta li “nekeb’aanu anajwan anajwan”29 te’tenq’anq eere chixtawb’al wi’chik lee nimla paab’aal. Naq chaab’il lee meta, yookex chi ilok chi uub’ej, jo’ keb’aanu junxil, ut yookex chirilb’al anihaqex jo’ naraj li qaChoxahil Yuwa’.30 Chirix a’an taak’uub’ chan ru naq taabʼaanu ut tatk’anjelaq chi kaw. Li Elder Quentin L. Cook kixye, “Meek’ubsi xwankil li k’uub’ank na’leb’ ut li k’ehok meta … , ut [xb’oqb’aleb’] chixjunil li neke’ilok rik’in li rilob’aal li paab’aal.”31
Laa’ex texsik’oq re! Li Qaawa’ kixye a’in cherix, “wan wankilal rik’ineb’ ” re sik’ok-u.”32 Li Elder Neil L. Andersen kixye, “Ink’a’ yal chi jo’kan naq taanimanq eepaab’aal, rik’in b’an li sik’ok-u.”33 Kixye ajwi’, “[Yalaq] k’a’ru nekepatz’ chi maak’a’ eeb’alaq’ … taasumub’aaq wi wan eekuyum ut lee paab’aal.”34
Ninch’olob’ xyaalal naq xb’aan (1) anihex ut xb’aan (2) lix nimla wankilal lee paab’aal chirix li Kristo, taawanq eewankil “chixkawresinkil li ruchich’och’ choq’ re xkab’ xk’ulunik li Kolonel rik’in xb’oqb’al chixjunileb’ li qas qiitz’in chi chalk rik’in li Kristo ut chi osob’tesiik xb’aan lix tojb’al rix li maak.”35 Chisaho’q qach’ool rik’in lix yeechi’ihom lix Hu laj Mormon li ch’olch’o ru:
“Li tiikebʼ xchʼool li nekeʼabʼin chiruhebʼ li profeet, ut … nekeʼril chi uubʼej li Kristo chi xaqxookebʼ … us ta taanumtaaq li rahobʼtesiik … aʼanebʼ aʼan li inkʼaʼ teʼosoʼq.
“[A’b’an li Kristo] … tixk’irtesiheb’, ut eb’ a’an te’wanq sa’ tuqtuukilal rik’in.”36
Sa’ xk’ab’a’ li Jesukristo, amen.