COVID-19 ut li santil ochoch

Ex was wiitz’in, xqeek’a chi yaal li musiq’ej sa’ li ch’utub’aj-ib’ a’in. Ninb’antioxiheb’ li tij, li aatin, ut li b’ich. B’antiox eere naq xextz’aqon qik’in, yalaq ta b’ar wankex.

Sa’ xtiklajik li chihab’ xnume’, xmaak li COVID-19 ut li qajom chixb’aanunkil li jo’ k’ihal naru chiqu re xramb’al xjek’inkil, ke’qatz’ap chixjunileb’ li santil ochoch. Chalen chaq a’an, xoomusiq’aak chixteeb’al junjunqeb’ li santil ochoch chi timil timil. Yookeb’ chi teemank li santil ochoch chi tustu sa’ kaahib’ tasal ru, a’ yaal chan ru lix chaq’rab’il li junjunq chi tenamit chirix li yajel.

Sa’ li xb’een tasal, eb’ li sumal li ak xe’tiqib’aak naru te’tz’ape’q sa’ junajil jo’ b’eelomej ut ixaqilb’ej.

Sa’ li xkab’ tasal, yookeb’ chi b’aanumank chixjunil li k’ojob’anb’il k’anjel choq’ reheb’ li yo’yo, jo’ li tiqib’aak ut lix tz’apb’aleb’ sa’ junajil li sumal, ut li kok’al rik’ineb’ xna’ xyuwa’. Toje’ xqajal li naru taab’aanumanq sa’ li xkab’ tasal, ut eb’ li qasaaj ut li ak’ komon li wan rik’ineb’ li recomendacion chi k’osb’il ru neke’ru chi kub’eek xha’ ruuchileb’ lix xe’toonil.

Sa’ li rox tasal, wi ak xe’xk’ojob’ li kutan, li komon naru te’xb’aanu li k’ojob’anb’il k’anjel choq’ reheb’ li yo’yo, jo’ ajwi’ choq’ reheb’ lix xe’toonil kamenaqeb’.

Sa’ li xkaa tasal naru taab’aanumanq wi’chik chixjunil sa’ li santil ochoch.

Naqab’antioxi eekuyum ut lee kawil k’anjel chiru xch’a’ajkilaleb’ li kutan a’in. Nintz’aama naq taanimanq lee rajom chi loq’onink ut k’anjelak sa’ li santil ochoch.

Maare nekepatz’ jo’q’e naru texsutq’iiq sa’ li santil ochoch. Xsumenkil: Li santil ochoch nekexwulak wi’ taateemanq naq xjolomil lee tenamit naxye naq us. Naq yooq chi k’osk li COVID-19 sa’ lee tenamit, taateemanq lee santil ochoch. Cheb’aanu li jo’ k’ihal naru cheru re xk’osb’al xjek’inkil li COVID sa’ lee tenamit, re naq te’ruuq chi teemank li santil ochoch.

Toj reetal li kutan a’an, chiwanq sa’ lee ch’ool ut sa’ lee k’a’uxl lee sumwank ut lee rosob’tesinkil re li santil ochoch. Chepaab’ li sumwank okenaqex wi’.

Yooko chixkawresinkil qib’ choq’ re li kutan chalel! Wankeb’ 41 chi santil ochoch li yookeb’ chi kab’laak ut chi ak’ob’resiik anajwan. Sa’ li chihab’ xnume’, us ta xchal li yajel, xqatikib’ xkab’lankileb’ 21 li santil ochoch.

Naqaj naq eb’ li santil ochoch nach’aqeb’ rik’ineb’ li qakomon, re naq te’ruuq chi xik sa’ li santil ochoch li jo’ k’ihal naru chiruheb’.

Sa’ xyeeb’al resil jun may chik li santil ochoch, nink’oxla ut nink’e xloq’aleb’ laj pahol b’e—re najter ut re anajwan—li xe’xq’axtesi xyu’ameb’ re naq truuq taab’aanumanq a’in anajwan. Te’kab’lamanq li santil ochoch sa’eb’ li na’ajej a’in: Oslo, Noruega; Bruselas, Belgica; Viena, Austria; Kumasi, Ghana; Beira, Mozambique; Ciudad del Cabo, Sudáfrica; Singapur, República de Singapur; Belo Horizonte, Brasil; Cali, Colombia; Querétaro, México; Torreón, México; Helena, Montana; Casper, Wyoming; Grand Junction, Colorado; Farmington, Nuevo México; Burley, Idaho; Eugene, Oregon; Elko, Nevada; Yorba Linda, California; ut Smithfield, Utah.

Aajeleb’ ru li santil ochoch sa’ lix k’ojob’ankil wi’chik lix evangelio li Jesukristo sa’ xtz’aqalil. Li k’ojob’anb’il k’anjel re li santil ochoch tixnujob’resi li qayu’am rik’in wankilal ut metz’ew jo’ ink’a’ naru naqak’ul chi yalaq chik chan ru. Naqab’antioxi re li Dios li osob’tesiik a’an.

Sa’ xraqik li ch’utub’aj-ib’ a’in, naqaye wi’chik naq nekexqara. Naqatz’aama naq li Dios texrosob’tesi ut tixkol eerix chi junjunqex. Sa’ komonil teneb’anb’ilo sa’ lix loq’laj k’anjel. Chi kaw qach’ool, chiqayal qaq’e sa’ lix nimla k’anjel li Qaawa’! A’an a’in li nintz’aama, sa’ lix loq’laj k’ab’a’ li Jesukristo, amen.