Li muqleb’aal kamenaq maak’a’ xq’axom ru
Sa’ xk’ab’a’ lix tojb’al rix li maak xb’aan li Jesukristo ut lix waklijik chi yo’yo, naru te’k’iraaq li yot’b’il ch’oolej, li tuqtuukilal naru chirisinkil li yot’e’k, ut li yo’onink naru chirisinkil li rahilal.
Sa’ li chaq’al ru domingo re li Paswa, li qakok’al neke’xb’icha, “Saʼ jun chaqʼal ru kutan, saʼ lix muqlebʼaal li Jesukristo kiwakli, kixsach li kamk chi yaal.”1
Nokob’antioxin xb’aan li qanawom chirix lix waklijik li Jesukristo chi yo’yo. A’ut, sa’ xb’ehil li qayu’am, taaraho’q qach’ool chirix lix kamik jun li qaraarookil komon. Chiru li nimla yajel sa’ li ruchich’och’, maare wan qe xkam junaq qakomon—qech alal malaj qamiiw.2 Nokotijok choq’ reheb’ li xe’xk’ul li rahilal a’in.
Li Awa’b’ej Russell M. Nelson kixye:
“Maak’a’ naxye jarub’ chihab’ wan qe, nokoyaab’ak xb’aaneb’ li neke’kam. Li yaab’ak naxk’ut xchamal li tz’aqal rahok. …
“Jo’kan ajwi’, ink’a’ naru toojunajiiq sa’ tz’aqal sahil ch’oolejil moqon wi ink’a’ toojache’q sa’ rahilal anajwan. Ka’ajwi’ naru risinkil xmay li kamk rik’in risinkil ajwi’ li rahok sa’ li yu’amink.”3
Naru naqayal xk’oxlankil k’a’ru ke’reek’a li ramiiw li Jesus, li ke’taaqenk re ut ke’k’anjelak chiru,4 naq ke’ril lix kamik.5 Naqanaw naq “ke’yaab’ak ut ke’raho’ sa’ xch’ool.”6 Sa’ xkutankil lix kamik chiru li krus, ink’a’ ke’xnaw k’a’ru taak’ulmanq sa’ li domingo, ut maare kinumta xrahileb’, ke’xpatz’ chan ru naq te’xik chi uub’ej chi maak’a’ li Qaawa’. A’b’anan, toj ke’k’anjelak chiru sa’ xkamik.
Laj Jose aj Arimatea ki’elajin chiru laj Pilato naq tixk’e lix junxaqalil li Jesus re. Kixkub’si lix junxaqalil, kixlan sa’ chaab’il q’unal t’ikr, kixyokob’ sa’ lix ak’il muqleb’aal, ut kixtolk’osi jun nimla pek chire li rokeb’aal li muqleb’aal.7
Laj Nikodemo kixk’am chaq li miir ut li sununkil b’an. Kixtenq’a laj Jose chixk’amb’al li junxaqalil ut chixlanb’al sa’ q’unal t’ikr rik’in li sununkil b’an.8
Li xMaria aj Magdala ut xkomoneb’ chik li ixq ke’xtaaqe laj Jose ut laj Nikodemo, ke’xk’e reetal b’ar ke’xyokob’ lix junxaqalil, ut ke’xkawresi li sununkil b’an re xyulb’al.9 A’ yaal li chaq’rab’ q’axal kaw sa’ li kutankil a’an, ke’royb’eni xkawresinkil rib’ re xyulb’al lix junxaqalil li Jesus, xb’aan naq li sabado a’an chaq li hilob’aal kutan.10 Toja’ naq, eq’la chaq domingo, xkoheb’ sa’ li muqleb’aal. Ke’xtaw naq maak’a’ chik lix junxaqalil li Kolonel aran, jo’kan naq koxe’xye resil reheb’ li tzolom, eb’ lix apostol li Jesus. Eb’ li apostol xkoheb’ chirix toj sa’ li muqleb’aal ut ke’ril naq yamyo. Xkoheb’ chixjunil, ka’ajwi’ li xMaria aj Magdala ink’a’, ke’xpatz’ rib’ b’ar wan lix junxaqalil li Kolonel.11
Li xMaria aj Magdala xjunes kikana chirix li muqleb’aal. Yal wiib’ oxib’ kutan chaq, kiril lix kamik li ramiiw ut laj Tzolol re. Yamyo lix muqleb’aal, ut ink’a’ naxnaw b’ar wan. Kinumta xrahil xch’ool, ut ki’ok chi yaab’ak. Toja’ naq, li Kolonel waklijenaq chi yo’yo kolxpatz’ re k’a’ut naq nayaab’ak ut ani naxsik’. Sa’ xch’ool xMaria naq a’an aj ilol awimq, ut kixpatz’ re naq wi a’an xk’amok re xjunxaqalil li Qaawa’, tixye re b’ar xk’e re naq a’an toxxok chaq.12
Maare li Qaawa’ kixk’e xhoonal li xMaria aj Magdala chi yaab’ak ut chixch’olob’ankil xrahil lix ch’ool.13 Toja’ naq kixb’oq xk’ab’a’, ut xMaria kixsutq’isi rib’ ut kixk’e reetal ani a’an. A’an kiril li Kristo, ut kixk’e reetal naq waklijenaq chi yo’yo rik’in loq’alil.14
Jo’ laa’ex, laa’in ninnaw li rahilal kireek’a li xMaria aj Magdala ut eb’ li ramiiw naq ke’raho’ xch’ool chirix xkamik li Qaawa’. Naq beleeb’ chihab’ wan chaq we, kikam li was sa’ jun li xuwajel hiik. Kichal chi jun xaqaamil, jo’kan naq ink’a’ xintaw ru sa’ junpaat li kik’ulman. Kiyot’e’ inch’ool chi numtajenaq, ut kinpatz’ wib’, “K’a’ru kixk’ul li was? B’ar wan? B’ar xko’o? Ma tinwil wi’chik?”
Sa’ li kutan a’an, maak’a’ ninnaw chirix lix k’uub’anb’il na’leb’ li Dios re li kolb’a-ib’, ut kiwaj xnawb’al b’ar nokochal chaq, k’a’ru aj-e li yu’am a’in, ut k’a’ru naqak’ul naq tookamq. Ma ink’a’ naqaj xnawb’al a’an chiqajunilo naq nakam jun li qakomon malaj naq naqanumsi li ch’a’ajkilal sa’ qayu’am?
Wiib’ oxib’ chihab’ chirix a’an, kin’ok chixk’oxlankil li was chi jo’ka’in. Kink’oxla naq yoo chixtoch’b’al jun li okeb’aal. Laa’in tinte li okeb’aal, xaqxo taawanq aran, ut tixye we, “moko kamenaqin ta. Yo’yookin. Ink’a’ xinru chi chalk aawik’in, a’b’an anajwan naru tinkaanaq ut maajo’q’e chik tatinkanab’.” Li k’a’uxl a’an, chanchan jun li matk’, kinixtenq’a xkuyb’al lix rahilal inch’ool chirix lix kamik. Kichal k’iila sut sa’ ink’a’uxl naq a’an taakanaaq wik’in. Wan naq kiwil li rokeb’aal li kab’l, kiwoyb’eni naq a’an tixtoch’ ut tinwil wi’chik.
40 chihab’ chirix a’an, sa’ xq’ehil li Paswa, yookin chixk’oxlankil lix waklijik li Jesukristo chi yo’yo ut xin’ok chixk’oxlankil li was. Sa’ li hoonal a’an, kinaq jun na’leb’ sa’ inch’ool. Xjultiko’ we naq junxil kink’oxla naq a’an taachalq chiwilb’al.
Xink’e reetal naq li Musiq’ej xk’ojob’ inch’ool sa’ inch’a’ajkilal. Kik’ehe’ we innawom naq moko kamenaq ta xmusiq’ li was; yo’yo b’an. Toj yoo chi xik chi uub’ej sa’ lix junelikil b’eenik. Anajwan ninnaw naq li was “taawakliiq wi’chik”15 sa’ li chaq’al ru kutan naq, b’antiox re lix waklijik li Jesukristo chi yo’yo, chiqajunil toowakliiq chi yo’yo. Jo’kan ajwi’, sa’ xk’ab’a’ a’an toojunajiiq jo’ junkab’al ut taawanq xsahil qach’ool chi junelik rik’in li Dios wi taqasik’ ru ok sa’ ut taqapaab’ loq’laj sumwank rik’in a’an.
Li Awa’b’ej Nelson kixye:
“Tento tookamq chiqajunil re toonume’q chi uub’ej chi junelik. Maa’ani naxnaw jo’q’e taakamq, a’b’an aajel ru li kamk sa’ lix nimla k’uub’anb’il na’leb’ li Dios re sahil ch’oolejil. B’antiox re lix tojb’al rix li maak xb’aan li Qaawa’, toowakliiq chi yo’yo ut taaruuq taawanq qayu’am chi junelik. …
“… Choq’ re li toj nakana chi ra xch’ool … lix may li kamk sub’b’il rib’ rik’in li xaqxookil paab’aal chirix li Kristo, jun tz’aqal xlemtz’unkil li yo’onink, li rahok choq’ re li Dios ut reheb’ chixjunil li winq, ut jun ajom chi k’anjelak chiruheb’. Li paab’ank, li yo’onink, ut li rahok a’an tixk’e qak’ulub’il re ok chiru lix loq’laj rilob’aal li Dios ut, qochb’een li qasum aatin ut li qajunkab’al, wank rik’in a’an chi junelik q’e kutan.”16
Wi ta li Kristo inkʼaʼ xwakli chaq saʼ xyanqebʼ li kamenaq, malaj inkʼaʼ kixtoq lix bʼakʼlebʼ li kamk re naq li muqlebʼaal kamenaq moko taawanq ta xqʼaxom ru, ut re naq maakʼaʼaq xmay li kamk, inkʼaʼ raj taaruuq taawanq junaq wakliik chi yoʼyo.
“Aʼbʼan wan jun li wakliik chi yoʼyo, joʼkan naq li muqlebʼaal kamenaq maakʼaʼ xqʼaxom ru, ut lix may li kamk subʼbʼil ribʼ rikʼin li Kristo.
“Aʼan lix saqen ut lix yuʼam li ruchichʼochʼ; relik chi yaal, jun li saqen li maakʼaʼ rosoʼjik, li maajoʼqʼe naru xqʼojyinobʼresinkil; relik chi yaal, ut joʼkan ajwiʼ jun li yuʼamej li maakʼaʼ rosoʼjik, re naq moko taaruuq ta chik taawanq li kamk.”17
Li Jesukristo kixye ajwi’, “Laa’in li wakliik wi’chik chi yo’yo ut li yu’am. Ani napaab’ank we, us ta taakamq, taawanq xyu’am.”18
Ninch’olob’ xyaalal naq sa’ xk’ab’a’ lix tojb’al rix li maak xb’aan li Jesukristo ut lix waklijik chi yo’yo, naru te’k’iraaq li yot’b’il ch’oolej, li tuqtuukilal naru chirisinkil li yot’e’k, ut li yo’onink naru chirisinkil li rahilal. A’an naru tooxq’alu rik’in li ruxtaan, tixk’ojob’ qach’ool, tixk’e qametz’ew, ut tooxk’irtesi chiqajunjunqal. Sa’ xk’ab’a’ li Jesukristo, amen.