“O Mataupu Faavae o La’u Talalelei”
(Mataupu Faavae ma Feagaiga 42:12)
O se mataupu faavae o le talalelei o se taiala e faavae i aoaoga faavae mo le faaaogaina ma le amiotonu o le faitalia.
I le konafesi aoao o Le Ekalesia a Iesu Keriso o le Au Paia o Aso e Gata Ai ia Oketopa 1849, na tofia ai Elder Ioane Teila o le Korama a Aposetolo e Toasefululua e tatala le atunuu o Farani mo le talaiga o le talalelei a Iesu Keriso. O lana galuega na aofia ai le toefaatonutonuina o le uluai lomiga tusitusia aloaia a le Ekalesia i lena atunuu. Sa saunia e Elder Teila ma lomia se tala i le 1851 e tali atu ai i fesili faisoo na fesiligia ai o ia e uiga i le Ekalesia. Ma i le lata ai i le faaiuga o le talatusia, na toefaamatala ai e Elder Teila le mea lenei na tupu:
“I ni nai tausaga talu ai, i Navu, o se alii sa ma faatasi, o se tagata o sui o le Au Faitulafono, sa fesili atu ia Iosefa Samita pe mafai faapefea ona ia pulea nei tagata e toatele, ma faatumauina lenei faatulagaga atoatoa, ma sa faapea mai i lea lava taimi o se mea faigata tele mo i latou e faia i soo se mea lava. Sa faapea atu le Susuga a Samita o se mea faigofie tele le faia o lea mea. ‘E faapefea?’ o le tali mai lea a lea alii; ‘ia i matou o se mea faigata tele.’ Sa tali atu le Susuga a Samita, ‘Ou te aoao ia i latou mataupu faavae sa’o, ona latou pulea lea o i latou lava.’”1
Ou te tatalo ia aoao ma faamalamalamaina i tatou taitasi e le Agaga Paia a o ou faamamafaina le matafaioi taua a mataupu faavae i le talalelei toefuataiina a Iesu Keriso.
O Mataupu Faavae
Sa faaalia e le Alii i le Perofeta o Iosefa Samita e faapea “ia aoao atu e toeaina, ositaulaga ma aoao o lenei ekalesia, mataupu autu o la’u talalelei, ua i ai i totonu o le Tusi Paia ma le Tusi a Mamona, ua i ai le atoatoaga o le talalelei.”2 Na Ia folafola mai foi e faapea e ao i le Au Paia o Aso e Gata Ai “ona aoaoina atoatoa atili i teori, i mataupu autu, i mataupu faavae, i le tulafono o le talalelei, i mea uma tau i le malo o le Atua, ua tatau mo outou ona malamalama i ai,”3
Na ta’ua puupuu, o se mataupu faavae o le talalelei o se taiala e faavae faaleaoaoga faavae mo le faaaogaina ma le amiotonu o le faitalia tonu. O mataupu faavae e afua mai upumoni lautetele o le talalelei ma o loo aumaia ai le taitaiga ma tulaga faatonuina a o tatou fetuleni atu i luma i luga o le ala o feagaiga.
Mo se faataitaiga, o Mataupu Faavae muamua e tolu o le Faatuatua o loo faailoa mai ai itu faavae o le aoaoga faavae o le talalelei toefuataiina a Iesu Keriso: o le natura o le Aigaatua i le mataupu faavae muamua o le faatuatua, o aafiaga o le Pa’ū o Atamu ma Eva i le mataupu faavae lona lua o le faatuatua, ma faamanuiaga e mafai ona maua e ala i le Togiola a Iesu Keriso i le mataupu faavae lona tolu o le faatuatua.4 Ma le mataupu faavae lona fa o le faatuatua o loo aumaia ai uluai mataupu faavae—o taiala o le faaaogaina o le faatuatua ia Iesu Keriso ma le salamo—ma sauniga muamua o le perisitua ia e mafai ai ona mamana le Togiola a Iesu Keriso i o tatou olaga.5
O le Upu o le Poto o se tasi lea o faataitaiga o se mataupu faavae ua avea ma taiala. Faamolemole ia matau fuaiupu tomua nei i le vaega 89 o le Mataupu Faavae ma Feagaiga.
“Ua tuuina mai o se mataupu autu faatasi ma se folafolaga, ua fuafua i le malosi o lē ua vaivai ma lē ua sili atu ona vaivai o le au paia atoa, o e ua taʼua pe mafai ona taʼua o le au paia.
“Faauta, e moni, ua faapea ona fetalai mai le Alii ia te outou: Ona o mea leaga ma fuafuaga ua i ai ma o le a i ai i loto o tagata faufau leaga i aso e gata ai, ua Ou lapataia ai outou, ma muai lapataia ai outou, i le tuuina atu ia te outou o le upu o le poto lenei e ala i se faaaliga.”6
O le faatonuga musuia o loo mulimuli mai i lenei faatomuaga o loo aumaia ai ni taiala tumau mo le soifua manuia faaletino ma le faaleagaga ma ua molimauina ai faamanuiaga patino e faalagolago i lo tatou faamaoni i le mataupu faavae.
O le aoaoina, malamalama, ma le ola ai i mataupu faavae o le talalelei e faamalolosia ai lo tatou faatuatua i le Faaola, e loloto ai lo tatou tuuto atu ia te Ia, ma valaaulia ai le tele o faamanuiaga ma meaalofa faaleagaga i o tatou olaga. E fesoasoani foi mataupu faavae o le amiotonu ia i tatou e vaavaai ai i talaatu o mea e faatauaina e le tagata lava ia ma naunauga faapitoa o le tagata lava ia e ala i le tuuina mai o le vaaiga taua i upumoni e faavavau a o tatou faatautaia tulaga eseese, luitau, faaiuga, ma aafiaga o le olaga nei.
O Faataitaiga i le Taimi Nei o le Aoao Atu o Mataupu Faavae Sa’o
O le saunoaga a le Perofeta o Iosefa Samita e uiga i le aoao atu o mataupu faavae sa’o atonu o se tasi o ana aoaoga e ta’ua soo. Ma e tatou te maua ni faataitaiga mamana o lenei mamanu musuia o aoaoga i saunoaga aloaia a auauna ua faatagaina a le Alii i ona po nei.
O Le Mataupu Faavae o le Lē-Faalavelaveina
Na saunoa Peresitene Dallin H. Oaks i le konafesi aoao i le 1998 e uiga i tiute o e umia le Perisitua Arona e faatatau i le sauniaina ma le faatautaia o le faamanatuga. Na ia faamatala o le mataupu faavae o le le-faalavelaveina ma ta’u ai e faapea o se e umia le Perisitua Arona o le a le manao lava i se isi mea i ona foliga vaaia po o le amio e faalavelaveina ai soo se tagata o le Ekalesia mai lana tapuaiga ma le faafouga o feagaiga. Na faamamafa mai foi e Peresitene Oaks ia mataupu faavae e faatatau i le faatulagaina tatau, mama, migao, ma le mamalu.
E mata’ina, e lei tuuina mai e Peresitene Oaks mo alii talavou se lisi umi o mea e fai ma mea e le faia. Ae, na ia faamalamalama maia le mataupu faavae faatasi ai ma le faamoemoega e mafai e alii talavou ma o latou matua ma faiaoga ma e tatau ona latou faaaogaina lo latou lava faautautaga ma musumusuga e mulimuli ai i le taiala.
Na ia faamalamalama mai: “O le a ou le fautuaina atu ni tulafono auiliili, talu e matua eseese lava tulaga i uarota ma paranesi eseese i le Ekalesia i le lalolagi atoa, ma o se tulafono patino e foliga e manaomia i se tasi faatulagaga, e ono le talafeagai i se isi. Ae, o le a ou fautuaina atu se mataupu faavae e faavae i luga o aoaoga faavae. Afai e malamalama tagata uma i lenei mataupu faavae ma faatinoina e tusa ai, e ao ona ona itiiti se manaomia mo ni tulafono. Afai e manaomia ni tulafono po o ni fautuaga i tulaga taitasi, e mafai e taitai i le lotoifale ona tuuina atu, ia ogatasi ma aoaoga faavae ma o latou mataupu faavae e faatatau i ai.”7
O Le Mataupu Faavae o le Sapati o se Faailoga
I le konafesi aoao ia Aperila 2015, sa aoao mai ai e Peresitene Russell M. Nelson i tatou e faapea “o le Sapati o se aso fiafia.”8 Sa ia faamatalaina foi le ala na ia malamalama ai i se mataupu faavae faigofie e uiga i le faamamaluina o le aso Sapati:
“E faapefea ona tatou faapaiaina le aso Sapati? A o ou laitiiti, sa ou suesue i lisi na faia e isi e faatatau i mea e fai ma mea e le faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te au, ‘O le a le faailoga ou te manao e avatu i le Atua?’ O lena fesili na matuai faamanino mai ai a’u filifiliga e uiga i le aso Sapati.”9
O le fesili faigofie ae mamana a Peresitene Nelson ua faamamafa mai ai se mataupu faavae e vave sopoia ai lava soo se faaletonu e uiga i mea e ao ona tatou faia e faamamalu ai le Sapati. O lana fesili ua aoteleina ai se taiala ma se tulaga faatonuina lea e mafai ona faamanuiaina ai i tatou uma i o tatou tulaga eseese.
O Le Mataupu Faavae o le Naunau e Faamuamua le Atua
Ua ono masina talu ai i le konafesi aoao, na faamalamalama mai ai e Peresitene Nelson lona lava faagaeetia a o taitai atu o ia i se malamalamaaga fou i le uiga o le upu Isaraelu. Na ia faamatala mai e faapea na gaepu lona agaga ao ia aoaoina e faapea “o le igoa o Isaraelu e faasino i se tagata o loo loto e faamuamua le Atua i lona olaga.”10 Ona folasia mai lea e Peresitene Nelson se aofaiga o faatatauga taua e afua mai i lenei malamalamaaga.
O lana savali e uiga i le loto ia faamuamua le Atua o se faataitaiga ofoofogia lea o le aoao atu o mataupu faavae tonu ina ia mafai ai ona tatou pulea i tatou lava. Ma e faapei lava ona sa ia faia i lana savali e uiga i le avea o le Sapati o se aso fiafia, na tuu mai ai e Peresitene Nelson ni fesili e faavae i aoaoga faavae ia e avea o ni taiala ma tulaga faatonuina mo i tatou taitoatasi.
“Pe o e loto e faamuamua le Atua i lou olaga? Pe o e loto e avea le Atua ma faatosinaga sili ona taua i lou olaga?
Na ia faaauau:
“Mafaufau pe mafai faapefea ona faamanuia oe e lena naunautaiga. Afai e te le’i faaipoipo ma o loo sailia se soa e faavavau, o lou manao ina ia avea ma se “Isaraelu” o le a fesoasoani ia te oe e filifili po o ai e te lua tafafao faamasani ma pe faapefea.
“Afai o loo e faaipoipo i se soa ua ia solia ana feagaiga, o lou loto ina ia faamuamua le Atua i lou olaga o le a faatagaina ai au feagaiga ma le Atua ia tumau mausali. O le a faamaloloina e le Faaola lou loto nutimomoia. O le a matala le lagi a o e saili atu ia iloa pe faapefea ona agai i luma. E lē manaomia ona e fesesea’i pe fenumia’i.
“Afai e i ai ni au fesili faamaoni e uiga i le talalelei po o le Ekalesia, a o e filifili e faamuamua le Atua, o le a taitai atu oe ia maua ma malamalama i upumoni atoatoa e faavavau ia o le a taialaina lou olaga ma fesoasoani ia e tumau mausali ai i luga o le ala o feagaiga.
“Pe a e feagai ma faaosoosoga—e tusa lava pe oo mai le faaosoosoga i le taimi ua e lēlavā ai pe lagonaina le tuuatoatasi pe malamalama sese foi—mafaufau i le lototele e mafai ona e aoina mai a o e filifili e faamuamua le Atua i lou olaga ma a o e aioi atu ia te Ia e faamalosi oe.
“Afai o lou mana’o silisili o le faamuamua o le Atua, avea ma se vaega o Isaraelu, e tele faai’uga o le a faigofie atu ona fai. E tele na’ua faafitauli o le a lē avea ma ni faafitauli! E te iloa le auala sili e teuteu ai oe lava ia. E te iloa po o a mea e matamata ma faitau ai, po o fea e faaalu ai lou taimi, ma po o ai tou te fegalegaleai. E te iloa le mea e te manao e ausia. E te iloa le ituaiga o tagata e te manao moni lava e avea ai.”11
Matau pe fia ni faaiuga taua ma ni aafiaga o le olaga e mafai ona tosina e le mataupu faavae o le loto ia faamuamua le Atua: tafaoga faamasani ma le faaipoipoga, fesili ma atugaluga e uiga i le talalelei, tofotofoga, faiga o au teuga, o mea e matamata ma faitau ai, o fea e faaalu ai le taimi, pe o ai e mafuta i ai ma le anoanoai o isi mea. O fesili musuia a Peresitene Nelson o loo faamamafa mai ai se mataupu faavae faigofie e limataitaiina ai i itu uma o o tatou olaga ma mafai ai ona tatou pulea i tatou lava.
O Se Foeuli Laitiiti
Ina ua faafalepuipuiina Iosefa Samita i le Falepuipui o Liperate, na ia tusia ni tusi o faatonuga i tagata ma taitai o le Ekalesia ma sa faamanatu atu ai ia te i latou e faapea: ”e aoga tele i se vaa tele se foeuli laitiiti i le taimi o se afa, e taofiofi faasagatonu ai i le matagi ma galu.”12
O se “foeuli” o se uili po o le ‘auvili ma masini fesootai e faaaoga e feseua’i ai se vaa la’uoloa po o se vaafolau. Ma “e taofiofi faasagatonu ai i le matagi ma galu” e faatatau i le liliuina o se vaa ina ia mafai ona tausisia lona paleni ma le sa’e ai i le taimi o se afa.
O mataupu faavae o le talalelei e mo a’u ma oe, e faapei o se foeuli i se vaa. O mataupu faavae tonu e mafai ai e i tatou ona maua lo tatou ala ma tutumau ai, mausali, ma le lē gaoia ina ia tatou lē sagatonu ma pauu ai i afa matamataita o aso e gata ai o le pogisa ma le fememea’i.
Ua matuai faamanuiaina tele i tatou i lenei konafesi aoao e aoao ai e uiga i mataupu faavae e faavavau mai auauna faatagaina a le Alii. Ia, o lo tatou tiutetauave taitoatasi o le puleaina lea o i tatou lava e tusa ai ma upumoni o loo molimau mai ai.13
Molimau
Na aoao mai Peresitene Ezra Taft Benson, “Mo le isi ono masina e sosoo ai, ua tatau ona tu lau lomiga o le konafesi, o le [Liahona] i talaane o au tusitusiga faavae ma ia tagatagai soo i ai.”14
Faatasi ai ma le malosi atoa o lo’u agaga, ou te valaaulia i tatou uma ia aoao, ola ai, ma ia fiafia i mataupu faavae o le amiotonu. Ua na o upumoni o le talalelei e mafai ai ona tatou “faia ma le fiafia mea uma tatou te mafaia” e fetuleni atu ai i luma i luga o le ala o feagaiga ma ia “vaai ai i le faaolataga a le Atua, ma mo lona aao e faaali mai”15
Ua ou iloa o aoaoga faavae ma mataupu faavae o le talalelei a Iesu Keriso o le punavai faavae lea o le faasinoga mo o tatou olaga ma le olioli tumau i le olaga nei ma le faavavau. Ma i lenei Aso Sa mamalu o le Eseta, ou te molimau atu ma le olioli o Iesu Keriso o lo tatou Faaola soifua, o le punavai lea e tafe mai ai nei upumoni. Ou te molimau atu ai i le suafa paia o le Alii o Iesu Keriso, amene.