బావి వద్ద పాఠాలు

సహోదరీలారా, మీరు ఆశించిన, ప్రార్థించిన మరియు ప్రణాళిక చేసిన విధంగా మీ జీవితం సాగడం లేదు కాబట్టి కష్టమైన సవాళ్ళను మరియు నష్టాన్ని ఎలా ఎదుర్కోవాలనే అనిశ్చితితో మీలో చాలామంది నేను భావించినట్లుగా భావిస్తున్నారని నాకు తెలుసు.

మన పరిస్థితులు ఎలా ఉన్నా, మన జీవితాలు పవిత్రమైనవి మరియు అర్థాన్ని, ఉద్దేశ్యాన్ని కలిగియున్నాయి. మనలో ప్రతీఒక్కరూ దేవుని యొక్క ప్రియమైన కుమార్తె, మన ఆత్మలలో దైవత్వంతో జన్మించాము.

మన రక్షకుడైన యేసు క్రీస్తు, తన ప్రాయశ్చిత్త త్యాగం ద్వారా మనం శుద్ధి చేయబడడాన్ని మరియు స్వస్థత పొందడాన్ని సాధ్యం చేసి, కుటుంబ సభ్యుల నిర్ణయాలు, మన వైవాహిక స్థితి, శారీరక లేదా మానసిక ఆరోగ్యం లేదా మరే ఇతర పరిస్థితులతో సంబంధం లేకుండా భూమిపై మన ఉద్దేశాన్ని నెరవేర్చడానికి మనకు వీలు కల్పించారు.

బావి వద్ద స్త్రీని పరిగణించండి. ఆమె జీవితం ఎలా ఉండేది? ఆమెకు ఐదుగురు భర్తలు ఉన్నారని మరియు ప్రస్తుతం ఆమెతో నివసిస్తున్న వ్యక్తిని వివాహం చేసుకోలేదని యేసు గ్రహించారు. మరియు ఇంకా, ఆమెకు జీవిత కష్టాలు ఉన్నప్పటికీ, ఆయన ఆమెకు మెస్సీయ అని రక్షకుడు ఆమెకు బహిరంగ ప్రకటన చేసారు. “నీతో మాటలాడుచున్ననేనే ఆయన”² అని ఆయన చెప్పారు.

ఆమె తన పట్టణంలోని వారికి యేసే క్రీస్తు అని ప్రకటిస్తూ శక్తివంతమైన సాక్షి అయింది. “స్త్రీ యొక్క మాటనుబట్టి ఆ ఊరిలోని సమరయులలో అనేకులు ఆయనయందు విశ్వాసముంచిరి.”³

ఆమె గత మరియు ప్రస్తుత పరిస్థితులు ఆమె భవిష్యత్తును నిర్ణయించలేదు. ఆమె వలె, ఏమి చేయడానికి మనం ఇక్కడకు పంపబడ్డామో అవన్నీ నెరవేర్చడానికి వీలు కల్పించే బలం మరియు స్వస్థత కోసం ఈరోజు రక్షకుని వైపు తిరగడాన్ని మనం ఎంచుకోవచ్చు.

సిద్ధాంతము మరియు నిబంధనలలోని సుపరిచితమైన వచనములో, ప్రభువు స్త్రీలను మరియు పురుషులను “ఆతృతతో ఒక మంచి కార్యములో నిమగ్నమై, వారి ఇష్టపూర్వకముగా అనేక కార్యములు చేసి, అధికమైన నీతిని నెరవేర్చవలెను; వారిలో శక్తి ఉన్నది.”⁴ అని ప్రోత్సహిస్తున్నారు.

సహోదరీలారా, అధికమైన నీతిని నెరవేర్చగల శక్తి మనలోనే ఉంది!

“దేవునితో నిబంధనలు చేసి, ఆ నిబంధనలను గైకొను ప్రతీ స్త్రీ, ప్రతీ పురుషుడు మరియు యాజకత్వ విధులలో యోగ్యతతో పాల్గొనువారు, దేవుని యొక్క శక్తిని ప్రత్యక్షముగా అందుకోగలరు,”⁵ అని అధ్యక్షులు రస్సెల్ ఎమ్. నెల్సన్ సాక్ష్యమిచ్చారు.

బాప్తిస్మము తీసుకొనే సమయంలో మరియు పవిత్ర దేవాలయాలలో చేసిన పవిత్ర నిబంధనలను గౌరవించడానికి మనం కృషి చేస్తున్నప్పుడు, ప్రభువు మనలను “తన స్వస్థత, బలపరిచే శక్తి” మరియు “[మనము] మునుపెన్నడూ యెరుగని ఆధ్యాత్మిక అంతర్దృష్టులు మరియు మేల్కొలుపులతో” అనుగ్రహిస్తారని నేను తెలుసుకున్నాను.”⁶

కొండమీది ప్రసంగంలో, యేసు తన శిష్యులకు ఇలా బోధించారు, “మీరు లోకమునకు ఉప్పయి యున్నారు”⁸ మరియు “మీరు లోకమునకు వెలుగైయున్నారు.” ⁹ తరువాత ఆయన పరలోక రాజ్య వృద్ధిని పులిసిన పిండితో పోల్చారు, అది “ఒక స్త్రీ తీసికొని పిండి అంతయు పులిసి పొంగువరకు మూడు కుంచముల పిండిలో దాచిపెట్టిన పుల్లని పిండిని పోలియున్నది.”¹⁰

• ఉప్పు

• పులిసిన పిండి

• వెలుగు

చాలా చిన్న మొత్తాలలో కూడా, ప్రతీఒక్కటి వాటి చుట్టూ ఉన్న ప్రతీదానిని ప్రభావితం చేస్తుంది. రక్షకుడు తన శక్తిని ఉప్పుగా, పులిసిన పిండిగా మరియు వెలుగుగా ఉపయోగించమని మనలను ఆహ్వానిస్తున్నారు.

సహోదరీలారా, మనం చిటికెడు ఉప్పు, ఒక చెంచా పులిసిన పిండి మరియు ఒక కాంతి కిరణాన్ని అందించడం ద్వారా హృదయాలు మార్చబడగలవు మరియు జీవితాలు దీవించబడగలవు.

రక్షకుడు మన జీవితాలలో ఉప్పు అని, ఆయన ఆనందాన్ని మరియు ప్రేమను రుచి చూసేందుకు మనల్ని ఆహ్వానిస్తున్నారని నేను సాక్ష్యమిస్తున్నాను.¹⁴ మన జీవితాలు కష్టతరమైనప్పుడు పులిసిన పిండి ఆయనే, మనకు నిరీక్షణను¹⁵ కలుగజేసి, తన సాటిలేని శక్తి మరియు విమోచన ప్రేమ¹⁷ ద్వారా మన భారాలను తేలికచేస్తారు.¹⁶ ఆయన మన వెలుగు¹⁸, ఇంటికి తిరిగి వెళ్ళే మన మార్గాన్ని ప్రకాశవంతం చేస్తారు.

బావి వద్ద ఉన్న స్త్రీ వలె మనము రక్షకుని యొద్దకు వచ్చి, ఆయన జీవజలమును త్రాగగలమని నేను ప్రార్థిస్తున్నాను. సమరయులతో కలిసి అప్పుడు మనము ఇలా ప్రకటించగలము, “మామట్టుకు మేము విని, యీయన నిజముగా లోకరక్షకుడని తెలిసికొని నమ్ముచున్నాము.”¹⁹ యేసు క్రీస్తు నామములో, ఆమేన్.