Կենտրոնացեք Հիսուս Քրիստոսի վրա

Մեր ուխտերն օգնում են մեր ուշադրությունը, մեր մտքերը և մեր գործողությունները կենտրոնացնել Քրիստոսի վրա: Երբ մենք «հավատարիմ ենք մնում [մեր] կապած ուխտերին», մենք կարող ենք ավելի հեշտությամբ բացահայտել «այս աշխարհի բաները», որոնք մենք պետք է «մի կողմ դնենք», և ջանասիրաբար փնտրենք «ավելի լավ [աշխարհի] բաները»:⁸

Այդպես վարվեց Ամմոնի ժողովուրդը Մորմոնի Գրքում: Երբ նրանք սովորեցին Հիսուս Քրիստոսի մասին և սկսեցին իրենց կյանքը կենտրոնացնել Նրա վրա, հասկացան, որ պետք է թաղել իրենց պատերազմի զենքերը և դառնալ կատարելապես ազնիվ և «տարբերվել իրենց ջերմեռանդությամբ առ Աստված»:⁹

Ուխտերը պահելու արդյունքում մենք ձգտում ենք այն ամենին, ինչը հրավիրում է Հոգու ազդեցությունը և մերժում ենք այն ամենը, ինչը հեռացնում է այդ ազդեցությունը, «քանի որ գիտենք, որ եթե մենք արժանի լինենք Սուրբ Հոգու ներկայությանը, ապա արժանի կլինենք նաև ապրելու Երկնային Հոր և Նրա Որդի Հիսուս Քրիստոսի ներկայության մեջ»:¹⁰ Դա կարող է նշանակել, որ մենք պետք է փոխենք մեր բառապաշարը՝ օգտագործելով ավելի բարի բառեր: Դա կարող է նշանակել, որ մենք պետք է հոգևորապես անառողջ սովորությունները փոխարինենք նոր սովորություններով, որոնք ամրացնում են մեր հարաբերությունները Տիրոջ հետ, ինչպես օրինակ՝ ամենօրյա աղոթքն ու սուրբ գրությունների ուսումնասիրությունը՝ անհատապես և մեր ընտանիքի հետ:

Նախագահ Ռասսել Մ. Նելսոնն ասել է, որ «ամեն ոք, ով ուխտ է կապում մկրտության ավազանում և տաճարում ու պահում է այդ ուխտը, ավելի շատ է ստանում Հիսուս Քրիստոսի զորությունը ․․․

Աստծո հետ ուխտեր պահելու պարգևը երկնային զորություն է՝ մի զորություն, որն ուժ է տալիս մեզ ավելի լավ դիմակայել մեր փորձություններին, գայթակղություններին ու ցավերին»:¹¹

Ամեն կիրակի հաղորդության ընթացքում մեր ուխտերը նորոգելը հիանալի հնարավորություն է, որ քննենք ինքներս մեզ¹² և մեր կյանքը կրկին կենտրոնացնենք Հիսուս Քրիստոսի վրա: Հաղորդությունը ճաշակելով՝ մենք հայտարարում ենք, որ մենք «միշտ հիշում ենք նրան»:¹³ «Միշտ» խոսքն այստեղ նշանակալից է։ Այն Փրկչի ազդեցությունը տարածում է մեր կյանքի բոլոր ոլորտների վրա: Մենք Նրան չենք հիշում միայն եկեղեցում կամ միայն մեր առավոտյան աղոթքների ժամանակ կամ միայն այն ժամանակ, երբ դժվարության մեջ ենք և ինչ-որ բանի կարիք ունենք:

Այո, մենք երբեմն շեղվում ենք: Մոռանում ենք։ Կորցնում ենք մեր կենտրոնացումը։ Սակայն մեր ուխտերը նորոգելու շնորհիվ մենք ցանկանում ենք միշտ հիշել Փրկչին, որ մենք կփորձենք դա անել ողջ շաբաթվա ընթացքում, և որ հաջորդ շաբաթ հաղորդության սեղանի շուրջը մենք նորից կպարտավորվենք և կկենտրոնանանք Նրա վրա:

Ակնհայտ է, որ Հիսուս Քրիստոսի վրա կենտրոնացումը պետք է լինի ավելին, քան կիրակնօրյա, եկեղեցու ներսում կատարվող գործողություն: Երբ նախագահ Նելսոնը 2018 թվականին ներկայացրեց «Եկ, հետևիր ինձ» ծրագիրը, նա ասաց. «Ժամանակն է տնակենտրոն Եկեղեցու համար»։¹⁴ Նա ասել է, որ մենք պետք է «[մեր] տները վերածենք հավատքի սրբավայրի» և «ավետարանի ուսուցման կենտրոնների»: Եվ նա մեզ չորս հրաշալի խոստում տվեց, եթե դա անենք:¹⁵

Առաջին խոստումը․ «Ձեր հանգստության օրերն իսկապես կդառնան բերկրանք»։ Այն կդառնա մի օր, երբ մենք ավելի կմոտենանք մեր Փրկչին: Ինչպես Պերուից մի երիտասարդ աղջիկ է ասել. «Տիրոջ օրն այն օրն է, երբ ես ստանում եմ ամենաշատ պատասխանները Տիրոջից»:

Երկրորդ խոստումը․ «Ձեր երեխաները ոգևորված կսովորեն և կապրեն Փրկիչի ուսմունքներով»։ Դրա համար է, որ «մենք խոսում ենք Քրիստոսի մասին, մենք հրճվում ենք Քրիստոսով, [և] մենք քարոզում ենք Քրիստոսի մասին, … որ մեր զավակները կարողանան իմանալ, թե ինչ աղբյուրի նրանք կարող են ապավինել իրենց մեղքերի թողության համար»։¹⁶

Մենք դա անում ենք, որպեսզի մի օր, երբ մեր որդինները գնան աշխատանքի կամ լեռներում արշավելու կամ անտառներում գազաններ որսալու, ինչպես Ենովսը, նրանք կարողանան հիշել, թե մենք ինչ ենք նրանց ուսուցանել Քրիստոսի և ավետարանով ապրելու ուրախության մասին։ Եվ ո՞վ գիտի։ Միգուցե սա կլինի այն օրը, երբ նրանք վերջապես կզգան այն հոգևոր քաղցը, որն իրենց դարձնում է դեպի Հիսուս Քրիստոսը, որպեսզի նրանք կարողանան լսել Տիրոջ ձայնը, որն ասում է իրենց. «Քո մեղքերը ներված են քեզ, և դու կօրհնվես»:¹⁷

Երրորդ խոստումը․ «Հակառակորդի ազդեցությունը ձեր կյանքի և ձեր ընտանիքի վրա կնվազի»։ Ինչո՞ւ: Որովհետև որքան շատ ենք կենտրոնանում Հիսուս Քրիստոսի վրա, այնքան մեղքն ավելի շատ է կորցնում իր գրավչությունը:¹⁸ Երբ մեր տները լցված են Փրկչի լույսով, հակառակորդի խավարի համար ավելի քիչ տեղ է մնում:

Չորրորդ խոստումը․ «Փոփոխությունները ձեր ընտանիքներում կլինեն նշանակալից և շարունակական»։ Ինչո՞ւ: Որովհետև Հիսուս Քրիստոսի բերած փոփոխությունը «մի զորեղ փոփոխություն է»:¹⁹ Նա անմիջապես փոխում է մեր էությունը. մենք դառնում ենք «նոր ստեղծվածներ»:²⁰ Մենք աստիճանաբար ավելի ենք նմանվում Փրկչին՝ լցված Աստծո բոլոր զավակների հանդեպ Նրա մաքուր սիրով:

Ո՞վ չէր ցանկանա, որ այս խոստումները կատարվեն իրենց կյանքում և ընտանիքներում: Ի՞նչ պետք է անենք դրանք ստանալու համար: Պատասխանն այն է, որ պետք է մեր տները վերածենք հավատքի սրբավայրի և ավետարանի ուսուցման կենտրոնների: Իսկ ինչպե՞ս ենք մենք դա անում: Կենտրոնանում ենք Հոր և Հիսուս Քրիստոսի վրա՝ դարձնելով Նրանց մեր ընտանեկան կյանքի կենտրոնը, դարձնելով ամենակարևոր ազդեցությունը մեր տանը:

Կարո՞ղ եմ առաջարկել, որ սկսեք սուրբ գրություններում պարունակվող Քրիստոսի խոսքերը դարձնել ձեր առօրյա կյանքի մի մասը: Սուրբ գրությունների կատարյալ ուսումնասիրության համար սահմանված բանաձև չկա: Դա կարող է լինել օրական 5, 10 րոպե, կամ ավելի շատ, եթե կարող եք: Դա կարող է լինել օրական մի գլուխ կամ մի քանի հատված: Որոշ ընտանիքներ նախընտրում են ուսումնասիրել առավոտյան՝ դպրոց կամ աշխատանքի գնալուց առաջ: Մյուսները նախընտրում են կարդալ գիշերը՝ քնելուց առաջ: Որոշ երիտասարդ զույգեր ինձ ասել են, որ աշխատանքի գնալիս անհատական ուսումնասիրություն են անում, ապա տեքստային հաղորդագրության միջոցով կիսվում են հատվածներով, որպեսզի նրանց մեկնաբանությունները և քննարկումները գրանցվեն:

Եկ, հետևիր ինձ ձեռնարկում տրված են միջոցառումների և ռեսուրսների բազմաթիվ առաջարկներ, որոնք կարող են օգնել անհատներին և ընտանիքներին սովորել ավետարանի սկզբունքները սուրբ գրություններից: Աստվածաշնչի և Մորմոնի Գրքի տեսանյութերը կարող են նաև արժեքավոր գործիքներ լինել՝ սուրբ գրությունները ձեր ընտանիքի համար ավելի հասանելի դարձնելու համար: Երիտասարդներն ու երեխաները հաճախ ոգեշնչվում են սուրբ գրությունների հիշարժան պատմություններով: Այս պատմությունները և ավետարանի սկզբունքները, որոնք դրանք ուսուցանում են, վստահելի ընկերների նման կմնան ձեր երեխաների հիշողության մեջ, երբ նրանք ծառայության, առաքինության, հնազանդության, համբերության, հաստատակամության, անձնական հայտնության, գթության, խոնարհության և Հիսուս Քրիստոսի հանդեպ հավատքի լավ օրինակների կարիք ունենան: Ժամանակի ընթացքում Աստծո խոսքով սնվելու ձեր հետևողական ջանքերը կօգնեն ձեր երեխաներին ավելի ու ավելի մոտենալ Փրկչին: Նրանք կճանաչեն Փրկչին, ինչպես երբեք:

Տեր Հիսուս Քրիստոսն այսօր ապրում է: Նա կարող է ամեն օր ակտիվ ներկա լինել մեր կյանքում: Նա է մեր խնդիրների լուծումը, բայց մենք պետք է բարձրացնենք մեր աչքերը՝ Նրան տեսնելու համար: Նա նաև ասել է. «Նայեք ինձ ձեր բոլոր մտորումներում. մի կասկածեք, մի վախեցեք»:²¹ Երբ մենք կենտրոնանանք Նրա և մեր Երկնային Հոր վրա, կապենք և պահենք ուխտեր Նրանց հետ, և Նրանց դարձնենք ամենակարևոր ազդեցությունը մեր տանը և ընտանիքում, մենք կդառնանք այնպիսի մարդիկ, ինչպիսին նախագահ Նելսոնը պատկերացրել էր․ «Մի ժողովուրդ, որն ունակ է, պատրաստ և արժանի՝ ընդունելու Տիրոջը, երբ Նա նորից գա. մի ժողովուրդ, որն արդեն Հիսուս Քրիստոսին գերադասել է այս ընկած աշխարհից. մի ժողովուրդ, որն ուրախանում է Հիսուս Քրիստոսի ավելի բարձր, ավելի սուրբ օրենքներով ապրելու իր ազատ կամքով»։²² Հիսուս Քրիստոսի անունով, ամեն։