Ol Kingdom blong Glori

Aot long revelesen blong taem tedei, yumi save se las ples we evriwan long wol bae oli kasem hemi no wan tingting we i gud inaf , blong heven blong olgeta we oli stret mo gud mo harem nogud we i nogat en blong hel blong ol narawan. Plan blong God we i gat lav long ol pikinini blong Hem, i tekem tu trutok ia we Sevya blong yumi Jisas Kraes i tijim: “Long haos blong Papa blong mi, i gat plante rum i stap.”¹

Doktrin we i kam tru long revelesen insaed long Jos Ia we i kambak blong Jisas Kraes blong ol Lata Dei Sent, i tijim se evri l pikinini blong God—be sam nomo we bae yumi no tokbaot long ples ia—bae oli kasem wan long ol tri kingdom blong glori, iven hemia we i “bitim wanem we man i andastanem.”² Afta long wan taem we olgeta we oli no obei oli harem nogud from ol sin blong olgeta, we harem nogud ia i rere long olgeta long wanem we bae i kam, afta evriwan bae i girap bakegen long ded blong go long Faenol Jajmen blong Lod Jisas Kraes. Long ples ia, Sevya blong yumi we oli tijim long yumi se “ i givim glori long Papa, mo hem we i sevem evri wok blong han blong hem,” bae i sendem evri pikinini blong God long wan long ol kingdom blong glori folem tingting blong hat blong olgeta we oli bin soem tru long ol joes blong olgeta.

Wan doktrin mo praktis blong Jos we i kambak, hemi revelsen blong ol ol komanmen mo kavenan we i givim long evri pikinini blong God spesel tabu janis ia blong kwalifae from digri blong glori we i moa hae insaed long selestial kingdom. Ples ia we i moa hae—fasin blong kam olsem wan god long selestial kingdom—i lukluk ia nomo blong Jos Ia blong Jisas Kraes blong Ol Lata-dei.

Aot long revelesen blong taem tedei, Ol Lata-dei Sent oli gat wan defren andastaning abaot plan blong God blong fasin blong stap glad blong ol pikinini blong Hem. Plan ia i stat wetem laef blong yumi olsem ol spirit bifo yumi bon i kam long wol ia, mo i soem stamba tingting mo ol kondisen blong rod we yumi stap long hem long laef ia mo ples we bae yumi wantem blong go stap long hem afta.

Yumi save aot long revelesen blong tedei se “evri kingdom i gat wan loa blong hem”⁴ mo ol loa we yumi jusum blong folem long laef blong yumi long wol ia i talemaot wanem kingdom blong glori we bae yumi kasem long Faenol Jajmen. Insaed long plan ia we i gat lav, i gat plante kingdom—plante rum—mekem se evri pikinini blong God bae isave kasem wan kingdom blong glori we loa blong Hem oli save “laef gud folem.”

Taem yumi tokbaot fasin mo ol samting we i nidim blong wanwan long ol tri kingdom ia long plan blong Papa, yumi stat wetem hemia we i moa hae, we i lukluk ia nomo blong ol tabu komanmen mo odinens we God i soem tru long Jos Ia blong Jisas Kraes blong Ol Lata-dei Sent. Long “selestial” glori⁵ i gat tri level,⁶ we fasin blong kam olsem wan god, i moa hae long selestial kingdom. Ples ia i blong olgeta we “oli kasem evri samting blong God, mo glori blong hem,” from hemia, “oli ol god, mo tu, oli ol pikinini blong God”⁷ mo “oli stap long ples blong God mo Kraes blong hem, blong oltaem mo oltaem.”⁸ Tru long revelesen, God i bin soem ol loa, odinens, mo kavenan we oli no save finis, we oli mas folem blong developem ol fasin we i nidim olsem blong God, blong save kasem tabu paoa ia. Hemia i lukluk blong Jos Ia blong Jisas Kraes blong Ol Lata-dei Sent, from se stamba tingting blong Jos blong Hem we i kambak, i blong mekem ol pikinini blong God oli rere blong Lod i sevem olgeta insaed long selestial glori, mo moa speseli , blong kam olsem wan god insaed long Level (Digri) ia we i hae evriwan.

Plan blong God, we i stanap long trutok we i no save finis , i nidim fasin ia blong kam olsem wan god, bae oli save kasem nomo taem wan i fetful long ol kavenan blong wan mared we i no save finis, bitwin wan man mo wan woman insaed long tabu tempol,⁹ mo mared ia bae i stap blong evriwan we oli fetful. Hemia i from wanem yumi tijim se fasin “blong stap olsem man o woman, hem i wan stamba samting we i save talem stret huia nao yumi olsem man mo woman, … hemia long laef bifo yumi kam long wol ia, long laef long wol ia, mo long laef we bae yumi kasem we i no save finis from wanem hem i olsem.”¹⁰

Wan spesel mo impoten tijing blong helpem yumi rere blong kam olsem wan god, hem i 1995 Wan Ofisol Toktok I Go long Wol abaot famli.¹¹ Ofisol toktok ia i eksplenem ol samting we i nidim blong mekem blong rere long yumi blong laef wetem God Papa mo Pikinini blong hem Jisas Kraes, long selestial kingdom. Olgeta we oli no andastan fulwan plan blong Papa ia we i gat lav long ol pikinini blong Hem, bae oli save tekem se famli ofisol toktok ia, i jes wan nara toktok blong polisi, we oli mas jenisim. Be, long nara saed, yumi talem tru se famli ofisol toktok i stap long doktrin we oli no save sakemaot, mo i talem klia famli rilesensip long wol ia we bigfala pat blong divelopmen blong yumi we i no save finis, i save hapen long hem.

Aposol Pol i tokbaot ol tri digri blong glori, we i olsem ol glori blong san, mun, mo ol sta.¹² Hem putum nem blong digri we i moa hae “selestial” mo nambatu long hemia “terestrial.”¹³ Hem i no putum nem blong hemia we i moa daon, be tru long wan revelesen long Josef Smit, hem i ademap nem ia: “telestial.”¹⁴ Revelesen ia i tokbaot tu ol kaen man we oli jusum blong go long wanwan blong ol kingdom blong glori ia. Olgeta we oli no jusum “save obei long loa blong selestial kingdom”¹⁵ bae oli kasem wan nara kingdom, we i moa daon long selestial be bae i stret long ol loa we oli bin jusum mo save “laef gud folem.” Toktok ia laef gud folemwe i kamaot plante taem long ol skripja, i minim wan ples blong stap sef. .¹⁶ Eksampol, olgeta long terestrial kingdom—we fulap oli tingting long hem olsem heven—“oli olgeta we oli luk fes blong Pikinini, be oli no kasem ful paoa mo glori blong Papa.”¹⁷ Olgeta ia “oli olgeta gudfala man long wol, we oli bin kam biaen from ol giaman blong man,”¹⁸ be “oli no strong long testemoni long saed blong Jisas.”¹⁹

Revelesen we i tokbaot olgeta we oli putum olgeta long kingdom blong ol glori we i moa daon, we i telestial, hem i blong “hem we i no save obei long loa blong terestrial kingdom.”²⁰ Hemia i tokbaot olgeta we oli pusumaot Sevya mo ol fasin blong olgeta i no folem hemia blong God. Hemia i kingdom we olgeta we oli no stret mo gud oli laef long hem, afta we oli safa from ol sin blong olgeta. Olgeta ia, oli tokbaot olgeta long revelesen blong tedei olsem olgeta we “oli no bin akseptem gospel blong Kraes mo testimoni long saed blong Jisas

“Olgeta ia, oli olgeta we oli ol giaman man, ol man blong wokem blak majik, mo ol man blong mekem adaltri, mo olgeta we oli slip wetem man o woman bifo long mared, mo huia man we i laekem mo mekem giaman.”²¹

Taem hem i stap tokbaot ol tri kingdom blong glori wetem visen blong hem olsem wan profet, Presiden Russell M. Nelson i bin raetem i no longtaem i pas: “Laef long wol ia i moa smol long wan seken taem yu komperem wetem taem we i no save finis. !Be smol taem ia i impoten tumas! Tingting gud long olsem wanem hem i wok: Long taem blong laef long wol ia, yu save jusum wanem ol loa we yu wantem blong obei—olgeta blong selestial kingdom, o terestrial, o telestial—mo, folem hemia, wij kingdom blong glori we yu wantem laef long hem blong oltaem. !Plan ia gud we! Hem i wan plan we i rispektem fridom blong yu blong mekem joes fulwan. .”²²

Aposol Pol i bin tijim se oli givim ol tijing mo komanmen blong Lod blong mekem se yumi evriwan i save kam “olsem Kraes nomo, we hem i bigman tru”²³ Proses ia i nidim plante moa bitim blong stap kasem save nomo. Hem i no inaf nating blong biliv strong nomo long gospel; yumi mas mekem blong mekem se yumi jenis tru long hem. Difren long ol nara prijing we i tijim yumi blong save samting, gospel blong Jisas Kraes i jalenjem yumi blong kam wan samting.

Aot long ol tijing olsem, yumi kam blong lanem long en se Faenol Jajmen i no wan taem blong stretem wanwan evri gud mo nogud aksen blong yumi—wanem we yumi bin mekem. Hem i blong luksave faenol paoa blong ol aksen mo tingting blong yumi—wanem we yumi bin kam olsem Yumi kwalifae from laef we i no save finis tru long wan proses blong stap jenis. Olsem we oli yusum long ples ia, toktok ia we i gat plante mining, i saen blong bigfala jenis long fasin. Hem i no inaf blong eniwan blong i gohed mekem samting nomo mo no tingting. Ol komanmen, odinens, mo kavenan blong gospel oli no olsem wan lis blong mane blong dipositim long wan akaon blong heven. Gospel blong Jisas Kraes hem i wan plan we i soem long yumi olsem wanem blong kam olsem we Papa blong yumi long Heven i wantem yumi blong kam olsem.²⁴

From Jisas Kraes mo Atonmen blong Hem, taem yumi nogud long laef ia, yumi save sakem sin mo kambak long kavenan rod ia we i lidim yumi go long wanem Papa long Heven i wantem blong yumi.

Buk blong Momon i tijim se “laef ia, i taem [blong yumi] blong rere blong mitim God.”²⁵ Be jalenj blong sot taem ia blong “laef ia” i gat hop (ating blong sam pipol) tru long wanem Lod i bin givim tru long revelesen long Presiden Joseph F. Smith, we naoia oli rekodem long Doktrin mo Ol Kavenan 138. “Mi bin luk,” profet i raetem, “se ol fetful elda blong dispensesen ia, taem oli aot long laef long wol ia, oli gohed long wok blong olgeta blong prijim gospel blong sakem sin mo fasin blong pemaot man, tru long sakrifaes blong Wan Stret Pikinini Ia Nomo blong God, long medel blong olgeta we oli stap long tudak mo oli stap anda long fasin blong stap slef long sin insaed long bigfala wol blong spirit blong ol dedman.

“Olgeta dedman we oli sakem sin bae Lod i pemaot olgeta, tru long fasin blong obei long ol odinens blong haos blong God,

“Mo afta we oli pem panismen blong fasin blong olgeta blong brekem loa, mo Lod i wasem olgeta oli kam klin, bae oli kasem wan praes folem ol wok blong olgeta, from oli gat raet blong Lod i sevem olgeta.”²⁶

Antap long hemia, yumi save se mileniom, wan taosen yia afta long Seken Kaming, bae i wan taem blong mekem ol odinens we i nidim blong olgeta we oli no bin kasem olgeta long laef blong olgeta long wol ia.²⁷

I gat plante samting blong save abaot ol tri laef taem insaed long plan blong sevem man: (1) spirit wol blong laef bifo wol ia, (2) laef long wol ia, (3) mo laef afta long wol ia, mo rilesensip blong olgeta wetem wanwan long olgeta. Be yumi save ol trutok ia we i no save finis: “Blong God i sevem yumi, i wok blong yumiwanwan, be blong kam olsem wan god, i wok blong wan famle.”²⁸ Yumi gat wan Papa long Heven we yumi lavem we bae i luk se bae yumi kasem evri blesing mo mo evri gud samting we yumi wantem mo wanem we ol joes blong yumii letem. Yumi save tu se bae Hem i no fosem wan man blong mekem wan siling rilesensip sapos hem i no wantem. Ol blesing blong ol rilesensip we oli sil, oli tru blong olgeta we oli kipim ol kavenan blong olgeta be i no blong fosem wan rilesensip we i sil long wan nara wan we i no klin inaf o no wantem.

Ol dia brata mo sista blong mi, Mi testifae abaot trutok blong ol samting ia. Mi testifae se Lod blong yumi Jisas Kraes “we i bin man we i bin statemmo finisim fet [blong yumi],”²⁹ we Atonmen blong Hem, anda long plan blong Papa long Heven, i mekem evri samting i posibol, long nem blong Jisas Kraes, amen.