Taeting: Stap Openem Ol Windo blong Heven
Ol windo blong heven oli open long plante wei. Trastem taem blong Lod; oltaem ol blesing oli kam.
Ol dia brata mo sista, taem mi bin stap long Saot Amerika i no longtaem i pas, Brata Roger Parra blong Venezuela i serem eksperiens ia wetem mi:
“Long 2019, Venezuela i bin gat sam problem we i mekem se lektrisiti paoa i nogat blong faef dei.
“Ol samting oli olbaot mo i nogat atoriti blong loa long ol strit, mo plante pipol we oli stap long bigfala nid oli no gat inaf kaekae.
“Sam oli stat blong stap stil long bisnis blong kaekae, mo prapa spolem evri samting long rod blong olgeta.
“Mi olsem ona blong wan smol bekeri, mi bin wari tumas abaot bisnis blong mifala. Olsem wan famli, mifala i bin disaed blong givimaot evri kaekae insaed long bekeri blong mifala i go long ol pipol long nid.
“Long wan naet we i tudak tumas, i gat ol faet evri ples. Wan wari blong mi nomo hem i sefti blong waef mo ol pikinini we mi lavem tumas.
“Long eli moning we i haf tudak yet, mi bin go long bekeri blong mifala. Sore nomo, ol stilman oli bin prapa spolem gud evri bisnis blong kaekae we i stap kolosap. Be mi bin sapraes tumas blong luk se oli no tajem nating bekeri blong mifala. Oli no spolem wan samting nating. Wetem tingting we i stap daon, mi talem tangkyu long Papa blong mi long Heven.
“Taem mi kasem haos, mi talem long famli blong mi abaot blesing blong proteksen long bekeri we God i givim.
“Oli glad tumas.
“Bigfala boe blong mi, Rogelio, we i gat 12 yia nomo i talem, ‘!Papa! Mi save from wanem oli protektem stoa blong yumi. Oltaem yu mo Mama i stap pem taeting blong yutufala.’”
Brata Parra i talem laswan se: “Ol toktok blong Malakae oli kam long maen blong mi. ‘Mo bae mi tok strong long huia we i stap prapa spolem gud ol kaekae blong yufala, mo bae hem i no spolem ol frut blong graon blong yufala.’[Malakae 3:11]. Mifala i nildaon mo talem tangkyu long Papa blong mifala long Heven from merikel blong Hem.”1
Pruvum long Mi Naoia
Evri samting we yumi gat mo evri samting we i yumi, i kam long God. Olsem ol disaepol blong Kraes, yumi wantem blong serem samting wetem olgeta we oli stap raon long yumi.
Wetem evri samting we Lod i givim long yumi, Hem i bin askem yumi blong givimbak 10 pesen blong wanem yumi winim blong Hem mo kingdom blong Hem long wol. Hem i promesem yumi se taem yumi ones long ol taeting blong yumi, bae Hem i “openem skae, i letem olgeta gudgudfala samting i kam long yufala we i plante we i plante.”3 Hem i bin promesem yumi se bae Hem i protektem yumi long ivel.4 Ol promes ia oli sua,5 Lod i talemaot, “[Pruvum long mi naoia],”6 wan sot sentens we yu nomo save faenem long wan nara ples long skripja be long Malakae.
Ol windo blong heven oli open long plante wei. Sam oli blong wol ia, be plante oli long saed blong spirit. Sam oli smosmol mo oli isi blong yumi no luksave. Trastem taem blong Lod; oltaem ol blesing oli kam.
Yumi harem nogud wetem olgeta we oli faenem i had blong gat ol samting we i nidim blong gat long laef. I no longtaem i pas, Jos i bin givim 54 milian US dola blong givim rilif long ol pikinini mo mama raon long wol.7 Mo wetem ol fast ofring blong yu blong evri manis, ol gudfala bisop blong yumi i helpem plante man tumas evri wik, we oli gat ol nid blong kaekae long tebol, klos blong blokem olgeta, mo selta antap long ol hed blong olgeta. Ansa we bae i stap fogud long problem blong stap pua long wol ia, hem i gospel blong Jisas Kraes.8
wan sid blong fet
Aposol Pol i bin givim woning se waes blong man i andastanem ol samting blong man, be bae i had blong i andastanem ol samting blong God.9 Wol i tokbaot taeting long fasin blong mane blong yumi, be tabu loa blong taeting hem i abaot prinsipol blong fet blong yumi. Blong stap ones long ol taeting blong yumi i wan wei we i soem hamas yumi wantem blong putum Lod i faswan long laef blong yumi, mo bifo long ol kea mo intres blong yumiwan. Mi promesem yu se taem yu trastem Lod, ol blesing blong heven bae i folem.
Jisas i talem “samting we i blong Sisa, yufala i givimbak long Sisa. Mo samting we i blong God, yufala i givimbak long God.”10 Sevya we i girap bakegen long ded, i askem Ol man blong Nifae blong raetem ol promes blong Hem we i stap long Malakae, i go insaed long ol rekod blong olgeta.11 Long taem blong yumi, Lod i talem bakegen abaot tabu loa blong taeting se: “Mo hemia bae i stat blong ol pipol blong mi oli pem taeting. Mo oli mas pem wan aot long ten long evri samting we oli winim long wan yia; mo hemia bae i wan loa we bae i stap blong oli folem blong oltaem”12
Lod i talem i klia olsem wanem oli sapos blong pem taeting, “Yufala i mas tekem olgeta taet blong yufala i kam long haos* blong mi,”13 we i minim blong karem ol taeting i kam long kingdom blong Hem we i kambak we i Jos Ia blong Jisas Kraes blong Ol Lata-dei Sent.14 Hem i daerektem se kaonsel blong Fas Presidensi, Kworom blong Olgeta Twelef Aposol, Prisaeding Bisoprik, bae oli yusum ol tabu taeting wetem fulap prea mo “long voes blong mi i go long olgeta, Lod i talem.”15
Ol Tabu Mane blong Lod
Ol tabu mane ia i no blong ol lida blong Jos. Oli blong Lod. Ol wokman blong Hem oli save gud hamas tabu wok blong olgeta blong lukaotem gud.
Presiden Gordon B. Hinckley i tokbaot eksperiens blong hem taem hem i wan pikinini: “Taem mi wan smol boe, mi bin askem wan kwestin long papa blong mi … abaot olsem wanem oli stap spendem mane blong Jos. Hem i rimaenem mi se, hem i wan samting we God i askem mi blong mekem blong pem taeting mo fast ofring blong mi. Taem mi mekem olsem, [papa blong mi i talem,] hemia we mi givim, i nomo blong mi. Hem i blong Lod we mi mi givim i go long Hem.” Papa blong hem i ademap se: “Wanem we ol atoriti blong Jos oli mekem wetem mane ia, hem i no wari [blong yu, Gordon]. Olgeta bae oli ansa long Lod, we bae i nidim olgeta blong ansa from ol responsabiliti ia.”16
Mifala i filim bigwan weit ia blong “ansa long Lod.”
Ol Taeting mo Ofring We Yu Givim
Aot long ol taeting mo fast ofring we yu bin givim long Lod, las yia oli bin yusum moa long wan bilian US dola blong blesem olgeta long nid.17
Long impoten responsabiliti ia blong mifala blong tekem gospel we i kambak i go raon long wol, mifala i moa long 71,000 misinari we stap givim seves long 414 misin.18 From ol taeting mo fast ofring blong yufala, ol misinari, nomata long ol situesen blong famli long saed blong mane, oli save go mo givim seves.
Oli stap bildim plante tempol raon long wol. Naoia i gat 177 we i stap wok naoia, 59 oli stap bildim o fiksim, mo 79 moa we oli stap mekem ol plan mo disaen blong olgeta.19 Ol taeting blong yu i mekem se ol blesing blong tempol i save stap long ol ples we Lod nomo i bin save luk fastaem.
I gat moa long 30,000 kongregesen we oli stap yusum taosen blong ol japel mo ol nara fasiliti long 195 kantri mo eria.20 From yufala i stap fetful blong pem taeting, yumi save stanemap Jos long ol ples longlongwe we maet bae yu neva visitim mo ol stret mo gud Sent we maet bae yu neva save olgeta.
Jos naoia i stap sponsarem faef institiut we oli stap tijim ol moa hae stadi.20 I gat moa long 145,000 studen we oli stap go long ol ples ia. Oli stap tijim wan handred mo ten taosen klas evri wik, long ol seminari mo institiut blong yumi.22
Ol blesing ia mo plante moa blesing oli kam long olgeta we yang mo olfala we oli pem wan ones taeting nomata long situesen blong olgeta long saed blong mane.
Paoa long saed blong spirit we i kam long tabu loa blong taeting, oli no mesarem folem hamas mane we oli givim, from Lod i komandem tugeta, hemia we i gat samting mo hemia we i pua, blong givim 10 pesen blong mane we hem i winim.23 Paoa ia i kam taem yumi putum tras blong yumi long Lod.24
Plante samting we Lod i ademap antap long wanem we yufala i givim tru long ol taeting blong yufala, i bin mekem ol risos blong Jos i kam moa strong, blong stap givim janis blong muvum wok blong Lod bitim eni samting we yumi stap tingting long hem. Lod i save evri samting, mo long taem blong Hem, bae yumi luk tabu stamba tingting blong Hem i kam tru.25
Ol Blesing Oli Kam long Plante Wei
Ol blesing blong taeting oli kam long plante wei. Long 1998, mi bin folem Elda Henry B. Eyring i go long wan bigfala Jos miting long eria blong Utah we oli save naoia olsem Silicon Slopes, wan komuniti we oli gat ol bigfala aedia blong mekem jenis long teknoloji. Hem i wan taem we oli gro fulap mo gat plante gudfala samting, mo Elda Eyring i talem long Ol Sent blong lukaot blong stap komperem wanem oli gat wetem ol narawan mo blong stap wantem moa. Bae mi oltaem tingbaot promes blong hem se sapos oli gohed blong pem wan ones taeting, bae tingting blong hat blong olgeta blong wantem moa samting blong wol, bae i go daon. Long tu yia taem, ol bisnis oli fesem had taem long saed blong teknoloji. Plante oli lusum wok mo ol kampani oli trae had long taem ia we i gat plante jenis long saed blong faenens. Olgeta we oli folem kaonsel blong Presiden Eyring, oli kasem blesing.
Promes blong hem i bin rimaenem mi long wan nara eksperiens. Mi bin mitim Charlotte Hlimi we i gat 12 yia, kolosap long Carcassone, France, long 1990, taem mi stap givim seves olsem wan misin presiden. Famli Hlimi, oli wan fetful famli, mo oli stap long wan apatmen wetem eit pikinini. Oli gat wan pikja blong Sevya mo profet long wol blong haos. Mi bin askem Charlotte long wan intaviu blong petriakel blesing blong hem, sapos hem i stap pem wan ones taeting. Hem i ansa, “Yes, Presiden Andersen. Mama blong mi i bin tijim mi se i gat ol blesing long saed blong ol samting blong wol mo blong spirit, we i kam taem yumi pem taeting. Mama blong mi i tijim mi se sapos mifala i pem taeting blong mifala oltaem, bae mifala i no wantem wan samting. Mo Presiden Andersen, mifala i no wantem wan samting.”
Wetem raet blong serem stori blong hem, Charlotte we naoia i gat 45 yia mo i sil long tempol, i talem: “Testemoni blong mi abaot taeting i tru tumas long taem ia, mo i moa strong naoia. Mi talem tangkyu tumas from komanmen ia. Taem mi laef folem, mi stap kasem plante blesing.”26
Wan dei, wanwan long yumi bae i finisim wokbaot blong yumiwan long wol ia. Twante faef yia i pas, Mama blong waef blong mi we i ded from kansa, i bin kasem wan smol jek long melbokis blong hem, sam dei nomo bifo hem i ded. Kwiktaem hem i askem waef blong mi Kathy blong karem jekbuk blong hem blong pem taeting blong hem. From mama blong hem i nogat paoa nating, hem i no save raet nomo mo Kathy i askem sapos hem i save raetem jek ia blong hem. Mama blong hem i ansa se, “No, Kathy. Mi wantem mekem miwan.” Afta slo nomo hem i talem, “Mi wantem se mi stret long fored blong Lod.” Wan long ol las samting we Kathy i mekem blong mama blong hem, i blong givim envlop blong taeting blong mama long bisop.
Impoten Wok blong Wok
Ol brata mo sista blong mi, Jos Ia blong Jisas Kraes blong Ol Lata-dei Sent i “no stap long tudak,”26 mo i karem plante gudfala blesing i kam long wol. Bae i gat olgeta we oli leftemap tingting blong yumi i go fored, mo bae i gat olgeta we oli no mekem olsem. Mi bin tingting long sam toktok blong wan waes Gamaliel, we taem hem i harem ol merikel blong Aposol Pita mo Jon, hem i givim woning long kaonsel long Jerusalem:
“Yumi mas livim ol man ya i stap. … from we sipos samting ya i tingting mo wok blong man nomo, bambae i no save gotru.
“Be sipos samting ya i blong God, bambae yumi no save blokem olgeta. Maet bambae yumi faenemaot we yumi stap faet agens long God ya.”27
Yu mo mi i pat blong impoten wok blong God long wol ia. Bae hem i no stop be bae hem i gohed blong muv raon long wol, blong stap rere long rod blong Sevya we bae i kambak. Presiden Russell M. Nelson i bin talemaot: “Long ol dei we i stap kam, bae yumi luk Sevya bae i soemaot bigfala paoa blong Hem we wol i neva luk. Bitwin naoia mo long taem we bae Hem i kambak … , bae Hem i givim plante janis, blesing, mo merikel long olgeta we oli fetful.”29
Hemia i witnes blong mi. Jisas Hem I Kraes. Hemia i tabu wok blong Hem. Bae Hem i kambak bakegen. Long nem blong Jisas Kraes, amen.