Kompanion blong Yumi blong Oltaem

Ol brata mo sista blong mi we mi lavem. Long konfrens ia yumi gat blesing blong kasem plante revelesen. Ol wokman blong Lod Jisas Kraes oli bin toktok mo bae oli talem ol toktok blong trutok, leftemap tingting mo daereksen.

Ol testemoni we oli bin serem i bin tajem hat blong mi long konfrens ia, se Lod i stap toktok long yumi wanwan tru long Tabu Spirit. Taem yumi prea mo folem ol kwaet toktok blong tabu Spirit, yumi kasem moa save mo ol blesing blong lidim yumi tru long ol dei we oli had we oli stap kam antap bigwan.

Yumi harem bakegen ol woning blong Presiden Russell M. Nelson se “ long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”¹

Woning blong profet ia i mekem mi tingting hevi long wanem bae mi tijim long ol pikinini, ol apu pikinini, mo ol apu pikinini blong mi, abaot olsem wanem blong gat impoten gaed ia long ol dei ia we oli had blong olgeta we i stap kam.

Mekem se mesej ia tedei i wan sot leta i go long ol laen blong mi we maet bae i helpem olgeta, taem mi mi no stap wetem olgeta long ol gudfala dei we i stap kam. Mi wantem olgeta blong save wanem mi mi kam blong save, we i save helpem olgeta.

Mi kam blong andastanem gud moa wanem nao bae i tekem olgeta blong gat oltaem paoa blong Tabu Spirit long ol dei we bae oli stap laef hem. Mo mi filim strong blong toktok tedei abaot eksperiens blong miwan blong stap invaetem Tabu Spirit, i kam kolosap olsem we mi save, blong stap olsem kompanion blong mi oltaem. Prea blong mi se bae mi save leftemap tingting blong olgeta.

Bae mi stat blong mekem olgeta i tingbaot mo prea abaot ol boe blong Hileman, Nifae mo Lihae, mo ol nara wokman blong Lod we oli stap wok wetem olgeta. Ol pipol oli givim had taem long olgeta. Oli stap givim seves long wan ples we i fulap long rabis fasin mo oli mas fesem ol giaman fasin. Mi kasem strong paoa long tingting mo yu save, aot long wan ves long rekod blong Hileman:

“Mo long seventi mo naen yia i stat blong gat plante rao. Be i bin hapen se Nifae mo Lihae, mo plante long ol brata blong tufala we oli save long saed blong ol tru poen blong doktrin, oli kasem plante revelesen evri dei, from hemia, oli prij long ol pipol, i gogo kasem we ol pipol oli stopem ol rao blong olgeta long semfala yia ia.”²

Stori ia i leftemap tingting blong mi mo i save leftemap tingting blong yu. Ol boe blong Hileman oli kasem gaed mo tijing tru long plante eksperiens wetem Tabu Spirit. Hemia i soem long mi bakegen se Spirit i save tijim yumi mo yumi save lan long Spirit sloslo, mo kasem wanem we yumi nidim mo afta, taem we yumi redi, bae yumi kasem moa.

Stori blong Nifae i leftemap tingting blong mi long semmak wei tru long storian blong hem we oli askem hem blong gobak long Jerusalem blong karem ol gol buk long Leban. Yu tingbaot joes we hem i mekem. Hem i talem, “Bae mi go mo mekem ol samting we Lod i bin talem.”³

Eksperiens blong Nifae wetem Tabu Spirit long storian ia, i bin givim mi paoa long tingting plante taem, taem mi stap mekem ol wok we mi save se oli ol asaenmen we i kam long Lod, be i luk olsem i moa had bitim ol pas eksperiens blong mi mo i moa had long wanem we mi luk se mi inaf long hem.

Yu tingbaot wanem Nifae i bin talem abaot eksperiens blong hem: “Mo i bin naet taem; mo mi mekem se oli mas haedem [ol brata blong mi] bakegen aotsaed long ol wol Mo afta we oli bin haedem olgeta, mi, Nifae, mi wokbaot haed i go insaed long bigtaon, mo mi go kasem haos blong Leban.”

Hem i gohed blong talem: “Mo Spirit i lidim mi; mi no save yet wanem samting bae mi mas mekem.”⁴

Blong save se Spirit i lidim Nifae long evri minit tru long naet long wok ia blong Lod, i bin leftemap tingting blong mi.

Mifala i nidim mo bae yu nidim Tabu Spirit blong stap olsem kompanion blong yumi oltaem. Yumi wantem, be yet, yumi save aot long eksperiens se i no isi blong kasem. Wanwan i tingting, i talem, mo i mekem ol samting long evri dei laef we i save mekem Spirit i harem nogud.

Taem hemia i hapen, olsem we bae i hapen, yumi save filim se Lod i no glad long yumi. Mo maet temtesen i giaman long yumi blong filim se yumi stap yumiwan. Hem i impoten blong tingbaot long taem ia, sua promes we yumi kasem evri wik taem yumi sakem sin mo tekpat long sakramen “blong oli save gat Spirit blong hem i stap wetem olgeta.”⁵

Sapos yu bin filim paoa blong Tabu Spirit tedei, yu save tekem olsem wan swit pruf se Atonmen i stap wok long laef blong yu.

Olsem Elda Jeffrey R. Holland i bin talem: “Long eni taem we ol had taem ia i kam, yumi no mas foldaon long fraet ia se God i lego yumi o se Hem i no harem ol prea blong yumi. Hem i stap harem yumi. Hem i stap luk yumi. Hem i stap lavem yumi.”⁶

Hemia i helpem blong mekem mi kwaet. Taem mi filim se mi stap longwe long Lod, taem mi luk se ol ansa long ol prea blong mi oli slo, mi bin lanem blong folem kaonsel blong Presiden Nelson we i blong luklukbak long laef blong mi blong faenem ol janis blong sakem sin. Hem i rimaenem yumi se, “Blong sakem sin evri dei, i rod blong folem blong kam klin evriwan, mo fasin blong stap klin evriwan i tekem paoa i kam.”⁷

Sapos yuwan yu faenem i had blong filim Tabu Spirit, maet bae yu tingting hevi sapos i gat eni samting we yu nidim blong sakem sin mo kasem fogivnes from.⁸ Yu save prea wetem fet blong save wanem blong mekem blong kam klin mo kwalifae moa blong Tabu Spirit i stap olsem kompanion blong yu oltaem.

Sapos yu wantem blong kasem kompanion blong Tabu Spirit, yu mas wantem from ol raet risen. Stamba tingting blong yu i mas stamba tingting blong Lod. Sapos ol tingting blong yu oli selfis tumas, bae yu faenem i had blong kasem mo harem save ol kwaet toktok blong Spirit.

Ki ia blong yu mo mi, hemi blong save wanem Sevya i wantem. Ol tingting blong yumi oli mas kam long wan lav we i klin evriwan long Kraes. I nidim blong i olsem se “Evri samting we mi wantem i wanem we yu yu wantem. Bae mi mekem wanem we Yu Yu wantem.”

Mi traem blong tingbaot sakrifaes blong Sevya mo lav blong Hem long mi. Afta, taem mi prea long Papa long Heven blong talem tangkyu, mi filim lav mo sua se Hem i harem ol prea blong mi mo we bae mi kasem wanem we i moa gud blong mi mo olgeta we mi lavem. Hem i bildim testemoni blong mi.

Aot long evri samting we Tabu Spirit i testifae long hem, hemia we i gat moa valiu long yumi bae i we Jisas i Kraes, Pikinini blong God we i stap laef. Sevya i bin promesem: “Taem we Spirit blong Givhan i kam, hem bambae i save tokbaot mi long yufala. Spirit ya, hem i stamba blong trutok mo hem i kamaot long Papa blong mi.”⁹

Sam yia i pas, mi kasem wan fon kol i kam long wan mama we i harem nogud. Hem i talem long mi se gel blong hem i bin muvaot i go longwe long hom blong olgeta. Hem i filim long smol taem we hem i toktok wetem gel blong hem se wan samting i no stret nating. Hem i plis long mi blong help.

Mi faenemaot huia i hom tija blong gel blong hem. Wetem nem ia, yu save talem se hemi long taem bifo. Mi ringim hem. Hem i yang. Be hem i talem long mi se hem mo kompanion blong hem i bin wekap long naet from wari blong tufala long gel ia, mo tu from insperesen ia se bae hem i mekem sam joes we bae i karem bigfala harem nogud i kam. Wetem insperesen ia nomo blong Spirit, oli go blong luk hem.

Long stat, hem i no wantem tokbaot situesen blong hem long olgeta. Tufala i plis long hem blong sakem sin mo jusum rod ia we Lod i gat blong hem. Afta hem i luksave se mi mi biliv tru long Spirit, se wei ia nomo we tufala i bin save abaot laef blong hem, i tru long God. Wan mama i givim ol wari blong lav blong hem i go long Papa long Heven mo Sevya. Oli bin sendem Tabu Spirit i go long ol hom tija ia from oli wantem blong givim seves long Lod. Tufala i bin folem kaonsel mo promes we yumi save faenem long Doktrin mo Ol Kavenan:

“Lod i talem se yu mas letem insaed long yu i fulap long bigfala lav i go long ol man, mo long haos we i gat fet, mo yu mas letem klin fasin i flasem ol tingting blong yu oltaem; afta nao, tras blong yu bae i gro i kam strong long fored blong God; mo doktrin blong prishud bae i go insaed long sol blong yu sloslo, semmak olsem smol ren blong moning i foldaon long heven i kamdaon.

“Tabu Spirit bae i fren blong yu we i folem yu oltaem, mo stik blong king blong yu, bae i wan stik blong king we i no save jenis, blong fasin we i stret mo gud, mo trutok; mo rul blong yu, bae i wan rul we i no gat en, mo bae i kam long yu we i no gat man i fosem hem, blong oltaem mo oltaem.”¹⁰

Mi testifae se Lod i bin kipim promes blong Hem. Papa God i stap sendem Tabu Spirit i go long ol fetful kavenan memba blong Jos Ia blong Jisas Kraes. Eksperiens blong yu bae i defren, mo bae Spirit i lidim yu long bes wei we bae i stret long fet mo paoa blong yu blong kasem revelesen blong yu mo blong olgeta we yu lavem mo stap givim seves long olgeta. Mi prea wetem evri hat blong mi se tras blong yu bae i gro.

Mi talem witnes blong mi se God Papa i stap laef. Hem i lavem yu. Hem i stap harem evri prea blong yu. Jisas Kraes i bin prea long Papa blong i sendem Tabu Spirit blong i lidim, kamfotem, mo testifae abaot trutok long yumi. Papa, mo Pikinini blong Hem we Hem i Lavem Tumas, Tufala i kamaot long Josef Smit long wan bus blong ol tri. Profet Josef Smit i bin transletem Buk blong Momon tru long presen mo paoa blong God.

Ol mesenja blong heven oli bin putumbak ol prishud ki. Presiden Russell M. Nelson i profet blong God blong ful wol ia.

Olsem wan witnes blong Jisas Kraes, mi save se Hem i laef mo stap lidim Jos blong Hem. Yu mo mi i gat janis ia blong gat Tabu Spirit olsem kompanion blong yumi blong oltaem mo blong gat ol trutok ia we oli konfemem olgeta, taem yumi tingbaot mo lavem Sevya, sakem sin, mo askem blong lav blong Hem i stap long ol hat blong yumi. Mi prea se bae yumi gat blesing ia mo kampani blong Tabu Spirit tedei mo long evri dei blong laef blong yumi. Mi lavem yufala. Long tabu nem blong Jisas Kraes, amen.