Presem Man Ya

Ol dia brata mo sista blong mi, mi filim ona blong stap wetem yufala long moning ia. Mi prea se Lod bae i blesem mi.

Ol ae blong mi oli no moa gud olsem long bifo. Mi bin go long dokta blong ae, mo talem, “Mi no save luk telepromta.”

Mo hem i talem, “Yes, ol ae blong yu oli olfala. Bae oli no save jenis.”

So bae mi mekem bes we mi save mekem.

Mi wantem blong serem wetem yufala, sam samting we mi bin stap tingting plante long hem. Mi bin stap tingbaot plante Profet Josef long ol las manis we i pas. Mi bin sidaon mi tingting gud abaot bigfala responsabiliti blong hem blong kam olsem profet blong ol las dispensesen blong taem blong evri wok blong God i kam tru.

Mi tingbaot hamas, yumi olsem ol memba blong Jos Ia blong Jisas Kraes blong Ol Lata-dei Sent, yumi tangkyu tumas se Josef Smit, wan boe we i wantem save wanem hem i nidim blong mekem, blong oli fogivim ol sin blong hem. Hem i faenem strong paoa long tingting blong go long ol bus kolosap long hom blong hem long Palmaera, Niu Yok, mo nildaon blong prea, mo—folem ol toktok blong hem—hem i prea laod blong fas taem (luk long Josef Smit—Histri 1:14).

Long taem ia, taem Josef i stap nildaon long ples we yumi singaotem naoia olsem Tabu Bus, ol heven oli open. Tu Man, we oli saen strong bitim san blong medeldei, oli kamkamaot long hem. Wan i toktok long hem mo talem, “[Josef,] Hemia i Pikinini blong Mi we Mi Lavem Tumas. !Lisin gud long hem!” (Josef Smit— Histri 1:17). Mo olsem nao, Restoresen blong gospel blong Jisas Kraes we i fulwan mo we i no save finis, i stat.

From Jisas, Sevya mo Ridima blong yumi, i bin toktok long boe ia Josef mo i bin mekem ol las dei we yumi stap laef long hem i posibol, yumi singsing, “!Presem man ya hem i bin luk Jehova!” (“Presem Man Ya,” STSP, pej 50). Yumi talem tangkyu long Lod from Josef Smit mo from strong paoa long tingting blong hem blong go long bus ia long 1820, kolosap long hom blong hem long Palmaera, Niu Yok.

Mi bin stap tingting long evri gudfala samting we i gud tumas we yumi save mo evri samting we yumi gat. Ol brata mo sista we mi lavem tumas, testemoni blong mi long yufala long moning ia i we yumi gat bigfala blesing blong save evri samting we yumi save naoia from yumi gat Josef Smit, we i profet blong las dispensesen blong taem ia.

Yumi gat wan andastaning abaot stamba tingting blong laef mo huia yumi.

Yumi save huia i God; yumi save huia i Sevya, from se yumi gat Josef, we i bin go long bus olsem wan boe we i stap lukaotem blong kasem fogivnes long ol sin blong hem.

Mi ting se hem i wan long ol samting we i naes tumas mo gat glori, we eniwan long wol i save— se Papa blong yumi long Heven mo Lod Jisas Kraes i bin soemaot Tufala long ol las dei ia, mo we Josef oli jusum hem blong putumbak gospel ia blong Jisas Kraes we i fulwan mo no gat en.

Yumi gat Buk blong Momon. Buk blong Momon i wan gudfala presen long olgeta we oli memba blong Jos. Hem i wan nara witnes, wan nara testeman se Jisas Hem i Kraes. Yumi gat buk ia from Josef i klin inaf blong go karem ol gol buk, mo kasem insperesen long heven blong transletem buk ia tru long presen mo paoa blong God, mo blong givim buk ia long wol.

Nomata we mesej blong mi long moning ia i simpol, lav blong mi i dip mo fulwan long Profet Josef Smit mo evri brata mo sista blong mi, we oli bin sastenem hem mo wantem blong sastenem hem long yut blong hem.

Mi wantem soem respek blong mi long moning ia long mama blong Josef. Oltaem mi bin stap tingting se i naes tumas se taem Josef i kambak hom afta long eksperiens we hem i bin gat long Tabu Bus ia mo talem wanem i bin hapen long mama blong hem, Lusi Mak Smit i bin bilivim hem.

Mi talem tangkyu long papa blong hem mo ol brata, mo sista, mo famli blong hem we oli bin sastenem hem long bigfala responsabiliti ia we Lod i bin putum long hem blong kam profet ia we i putumbak gospel ia blong Jisas Kraes we i fulwan mo nogat en, bakegen long wol ia.

So testemoni blong mi long moning i we, mi save se Jisas Kraes i Sevya mo Ridima blong wol. Mi save tu se Papa blong yumi long Heven mo Lod Jisas Kraes i bin kamaot mo toktok long Josef mo redi long hem blong kam profet.

Mi sapraes, mo mi sua se plante long yufala i sapraes tu, long olsem wanem yumi gat blesing ia blong save wanem yumi save abaot stamba tingting blong yumi long laef ia, from wanem yumi stap ia, wanem yumi mas stap traem blong mekem mo winim long evri dei laef blong yumi. Yumi stap long rod ia blong stap traem blong rere long yumiwan, wan dei afta narawan, blong kam moa gud, blong kam moa kaen, blong rere moa from dei ia, we i sua se bae i kam, taem bae yumi ded mo gobak stap wetem Papa blong yumi long Heven mo Lod Jisas Kraes.

Dei ia i stap kam moa kolosap blong mi. I no longtaem bae mi gat 95 yia. Ol pikinini blong mi oli stap talem se oli ting se mi moa olfala long hemia samtaem, be hemia i oraet. Mi stap mekem bes we mi save mekem.

Be blong kolosap 50 yia, ol brata mo sista, mi bin gat janis ia blong go raon long wol long asaenmen blong mi olsem Jeneral Atoriti blong Jos. Hem i bin wan naes blesing tumas. Mi ting se kolosap mi kasem evri pat blong wol. Mi bin mitim ol memba blong Jos raon long wol.

O, mi lavem yufala tumas. Hem i wan naes eksperiens tumas—blong lukluk ol fes blong yufala, stap wetem yufala, mo filim lav blong yufala we yufala i gat blong Lod mo Restoresen blong gospel blong Jisas Kraes.

Bae Papa blong yumi long Heven i lukaot long yumi naoia mo blesem ol nara toktok mo sesen blong konfrens ia. Mo letem yumi gat Spirit blong Lod i stap long hat blong yumi, mo letem lav blong yumi from gospel ia blong Jisas Kraes—Sevya we yumi lavem, Lod Jisas Kraes—i kam moa bigwan taem yumi traehad blong givim seves long Hem mo obei ol komanmen blong Hem mo kam moa olsem Hem, olsem wan ansa blong kam long jeneral konfrens ia. Weaples yu stap long hem long wol ia, bae God i blesem yu. Bae Spirit blong Lod i stap wetem yumi. Letem yumi filim paoa blong heven taem yumi wosip tugeta long sesen blong konfrens ia.

Mi talemaot witnes mo testemoni blong mi se mi save se Jisas Hem i Kraes. Hem i Sevya mo Ridima blong yumi. Hem i bes fren blong yumi. Long tabu nem blong Jisas Kraes, amen.