Siling Paoa

Oli bin profesae stat long taem blong Aesea¹ se long ol las dei, ol kavenan pipol blong Lod blong bifo long haos blong Isrel, bae oli “kambak tugeta afta we oli bin seraot blong longtaem, aot long ol aelan blong solwota, mo long ol fofala pat blong wol”² mo kambak stap long “graon blong ol papa blong olgeta.”³ Presiden Russell M. Nelson i bin tokbaot oltaem mo wetem paoa abaot kam tugeta ia mo i singaotem se hem i “samting ia we i moa impoten we i stap tekples long wol tedei.”⁴

?Wanem i stamba tingting blong kam tugeta ia?

Tru long revelesen we i kamaot long Profet Josef Smit, Lod i talemaot wan long ol stamba tingting ia olsem proteksen blong ol kavenan pipol. Hem i bin talem, “Wok blong karem ol pipol oli kam wanples long graon blong Saeon, mo long ol stek blong hem, [bae] i blong oli save difendem olgeta, mo blong oli stap long wan sef ples long taem blong strong win, mo long taem blong bigfala nogud kros, hemia long taem we bae mi kapsaetem ful paoa blong hem long ful wol.”⁵ Yumi save andastanem toktok ia “nogud kros” olsem ol ansa blong fasin blong ol man we oli no stap obei long ol loa mo komanmen blong God.

Moa impoten, stamba tingting blong kam tugeta ia i blong karem ol blesing blong fasin blong sevem man mo kam olsem wan god, long evriwan we i wantem blong kasem. Hem i olsem wanem ol kavenan promes we oli bin givim long Ebraham bae oli kam tru. Lod i bin talem long Ebraham se tru long laen mo prishud blong hem “bae evri famli blong wol ia bae oli kasem blesing, we oli ol blesing blong Gospel, we oli ol blesing blong fasin blong sevem man, we i laef we i no save finis”⁶ Presiden Nelson i talem long wei ia: “Taem yumi akseptem gospel mo kasem baptaes, yumi tekem long yumi tabu nem blong Jisas Kraes. Fasin blong kasem baptaes hem i doa blong kam wan wetem Kraes long ol promes we Lod i bin givim long taem bifo long Ebraham, Aesak, Jekob, mo laen blong olgeta afta long olgeta.”⁷

Long 1836, Moses i kamkamaot long Profet Josef Smit long Ketlan Tempol mo “givim …ol ki blong wok blong karem Isrel i kam wanples aot long ol fo pat blong wol.”⁸ Long semmak taem ia, Elaeas i kamkamaot mo i “givim dispensesen blong gospel blong Ebraham, mo i talem se tru long mifala mo laen blong mifala, evri jeneresen afta long mifala bae i gat blesing.”⁹ Wetem atoriti ia, naoia yumi karem gospel blong Jisas Kraes—gud nius blong fasin blong pemaot man tru long Hem—i go long evri pat mo pipol blong wol mo karem tugeta evriwan we oli wantem gospel kavenan ia. Oli kam “laen blong Ebraham, mo blong jos mo blong kingdom, mo olgeta we God i jusum olgeta.”¹⁰

Long semmak taem ia tu long Ketlan Tempol, i gat wan moa mesenja blong heven we i kamkamaot long Josef Smit mo Oliva Kaodri. Mi stap tokbaot profet Elaeja, mo mi wantem tokbaot tedei abaot atoriti ia mo ol ki we hem i putumbak.¹¹ Paoa ia blong pruvum evri prishud odinens mo i rekodem olgeta long wol mo heven—we i siling paoa—i impoten blong stap karem tugeta mo rere long ol kavenan pipol long tugeta saed blong vel.

Plante yia bifo, Moronae i mekem i klia long Josef Smit se Elaeja bae i karem impoten prishud atoriti i kam: “bae mi soemaot Prishud long yu, tru long han blong profet ia, Elaeja.”¹² Afta, Josef Smit i eksplenem se: “?From wanem sendem Elaeja? From se hem i holem ol ki blong atoriti blong mekem evri odinens blong Prishud; mo [sapos nomo we] oli givim atoriti, oli no save mekem ol odinens ia long stret mo gud fasin,”¹³—hemia i minim, bae oli no rekodem ol odinens ia long taem naoia mo long taem we i no save finis.¹⁴

Long wan tijing we naoia i olsem wan skripja long Doktrin mo Ol Kavenan, Profet i bin talem: “Profet Josef Smit i se: “Long sam, oli ting se i wan gud doktrin we yumi tokbaot—i wan paoa we i rekodem o fasem yumi … long wol mo i fasem yumi long heven. Nomata hemia, long eni taem long wol, taem we Lod i givim wan dispensesen blong prishud long eni man tru long revelesen, o long eni grup blong man, oltaem hem i givim paoa ia i kam wetem. Folem hemia, wanem we man i bin mekem wetem atoriti, long nem blong Lod, mo i bin mekem i stret mo wetem stret fasin, mo i bin raetemdaon wan stret mo tru rekod abaot samting ia, nao i kam wan loa long wol mo long heven, mo oli no save tekemaot, folem ol toktok we hae Jehova i bin talem wetem atoriti.”¹⁵

Fulap taem yumi stap tingting long siling atoriti ia se hem i blong sam tempol odinens nomo, be, i nidim blong gat atoriti ia blong mekem pruf long eni odinens mo blong fasem odinens ia i go bitim ded.¹⁶ Eksampol, siling paoa i silim wok blong baptaes blong yu folem loa mekem se oli luksave long wol ia mo long heven. Oli mekem evri prishud odinens anda long ol ki blong Presiden blong Jos, mo olsem we Presiden Joseph Fielding Smith i eksplenem se, “Hem [Presiden blong Jos] i bin givim mifala atoriti ia, hem i bin putum siling paoa insaed long prishud blong mifala, from se hem i holem ol ki ia.”¹⁷

I gat wan narafala impoten stamba tingting blong kam tugeta blong Isrel, we i gat wan spesel mining taem yumi tokbaot siling long wol mo long heven—hemia i, bilding mo operesen blong ol tempol. Olsem we Profet Josef Smit i bin eksplenem: “?Wanem stamba tingting blong kam tugeta … blong ol pipol blong God long eni taem blong wol ia? … Stamba tingting i blong bildim wan haos long Lod, wan ples we Hem i save talemaot long ol pipol blong Hem, ol odinens blong haos blong Hem, mo ol glori blong kingdom blong Hem, mo tijim ol pipol wei ia blong fasin blong sevem man; from se i gat samfala odinens mo prinsipol we, taem oli tijim mo praktisim, oli mas mekem nomo long wan ples o haos we oli bildim from stamba tingting ia nao.”¹⁸

Pruf ia we siling paoa i givim long ol prishud odinens i tekem tu ol odinens we olgeta we oli laef oli mekem long bihaf blong olgeta we oli ded, long ples we Lod i mekem blong ol wok ia—tempol blong Hem. Long ples ia, yumi luk hamas paoa ia i bigwan mo i tabu—hem i mekem se fasin blong sevem wanwan man mo blong famli i kam olsem wan god, i stap blong evri pikinini blong God long eni ples mo eni taem, we oli laef long wol. I nogat eni nara stadi blong bilif relijin o man, o atoriti we i save givim wan janis olsem we i gat evri samting ia long hem. Siling paoa ia i soemaot gud evriwan, jastis, sore, mo lav blong God.

Wetem akses long siling paoa ia, ol hat blong yumi i lukluk i go long olgeta we oli ded bifo yumi. Kam tugeta blong ol las dei i go long kavenan i hapen long narasaed vel tu. Long wei mo fasin blong God, olgeta we oli laef oli no save eksperiensem fulwan laef we i no save finis, sapos oli no krietem ol koneksen ia we i stap strong, i go long “ol papa,” we oli ol bubu blong bifo. Long semmak wei, progres blong olgeta we oli ded finis, o bae oli ded be nogat blesing blong ol siling ia, i no finis kasem taem oli mekem ol odinens long bihaf blong olgeta blong fasem olgeta i kam long yumi, ol jeneresen blong olgeta, mo yumi i go long olgeta tru long tabu fasin.¹⁹ Yumi save tekem komitmen ia blong helhelpem yumi long tugeta saed blong vel olsem wan kavenan promes, we i pat blong niu kavenan mo kavenan we i nogat en. Olsem ol toktok blong Josef Smit, yumi wantem “silim ol dedman blong yumi blong oli girap [wetem yumi] long fas resureksen.”²⁰

Siling paoa we i moa hae mo tabu i stap long fasin blong wan man mo woman i kam wan tru long mared we i no save finis, mo blong joenem ol man tru long famli tru long evri jeneresen blong olgeta. From se atoriti blong mekem ol odinens ia oli tabu tumas, Presiden blong Jos hemwan i lukluk long olsem wanem blong givimaot wok ia long ol narawan. Olsem Presiden Gordon B. Hinckley i bin talem long wan taem, “Mi bin talem plante taem se sapos i nomo gat wan samting i kamaot tru long evri sore mo wok mo so blong restoresen be nomo paoa blong siling blong tabu prishud blong fasem tugeta ol famli blong oltaem, bae praes blong hem bae i stret long evri samting we i bin hapen.”²¹

Sapos i nogat ol siling we i mekem ol famli we i no save finis mo joenem ol jeneresen naoia mo hemia afta, bae yumi stap long taem we i no save finis mo nogat ol rus o ol branj—hemia i minim, nogat laen bifo o afta. Hem i ol wanwan man o woman we oli stap flot nomo olsem mo nogat laen, o ol koneksen we i no folem ol mared mo famli laen we God i givim,²² we bae i spolem stret stamba tingting blong kriesen blong wol ia. Sapos hemia i kam nomol, bae i semmak nomo blong oli sakem wan strong nogud tok long wol o blong “spolem gud wol” taem Lod i kam.²³

Yumi save luk from wanem “God i odenem mared bitwin man mo woman mo famli hem i stamba blong plan blong Krieta, blong ol pikinini blong Hem oli save gobak stap long ples blong olgeta kasem taem we i no save finis.”²⁴ Long semmak taem, mifala i luksave se long taem naoia we i no stret evriwan, hemia i no wan tru laef o wan tru posibiliti blong sam. Be yumi gat hop long Kraes. Long taem we yumi stap wet long Lod, Presiden M. Russell Nelson i rimaenem yumi se “ol skripja mo ol profet blong ol las dei ia oli konfemem se evriwan we oli fetful blong kipim ol kavenan blong gospel, bae oli gat janis blong laef olsem wan god.”²⁵

Sam oli bin eksperiensem ol situesen blong famli we i no helti mo no hapi, mo oli no filim tumas blong joen tugeta olsem wan famli we i no save finis. Elda David A. Bednar i luksave hemia: “Long yu we yu bin eksperiens soa blong hat from wan divos long famli blong yu o filim harem nogud blong tras we i brok, plis tingbaot [se wei blong God blong gat famli] !i stat wetem yu bakegen! Ating wan joen long laen blong jeneresen blong yu i bin brok, be i gat ol nara stret mo gud joen mo laen we i stap oli impoten semmak long taem we i no save finis. Yu save ademap paoa long laen blong yu mo ating, yu save help tu blong putumbak ol joen we oli brok. Wok ia bae i finis wan afta wan.”²⁶

Long ol fenerol seves blong Sista Pat Holland, waef blong Elda Jeffrey R. Holland long las Julae, Presiden Russell M. Nelson i tijim: “Wetem taem, bae Patricia mo Jeffrey i joen tugeta bakegen. Afta, bae tufala i joen bakegen wetem ol pikinini blong tufala mo laen blong tufala we i stap holemtaet kavenan, blong eksperiensem fulwan, glad we God i gat i stap blong ol fetful pikinini blong Hem. Taem yumi save hemia, yumi andastanem se deit we i moa impoten long laef blong Patricia hem i no betdei o deit we hem i ded long hem. Deit we i moa impoten long hem hem i 7 Jun, 1963, taem hem mo Jeff tufala i sil long Sent Joj Tempol. … ?From wanem hemia i impoten tumas? From, stret risen from wanem oli krietem wol ia, i blong krietem ol famli mo blong oli sil long olgeta wanwan. Blong God i sevem yumi, i problem blong yumiwan nomo, be blong kam olsem wan god, i wan famli problem. Nogat wan i save kam olsem wan god hemwan.”

I no longtaem i pas, mi mo waef blong mi i bin joen wetem wan dia fren long wan siling rum long Baontiful Yuta Tempol. Fas taem mi bin mitim fren ia, i taem hem i wan pikinini long Córdoba, Ajentina. Mi mo misinari kompanion blong mi i stap noknok long ol doa blong sam pipol we oli stap kolosap nomo long misin ofis, mo hem i openem doa taem mifala kam long haos blong hem. Long stret taem blong hem, hem mo mama mo ol brata mo sista blong hem oli joenem Jos, mo oli bin stap ol fetful memba kasem tedei. Naoia hem i wan naesfala woman, mo long dei ia, mifala i stap insaed long tempol blong silim papa mo mama blong hem we oli ded mo afta silim hem i go long tufala.

Wan kapol we oli bin kam ol gud fren ova long ol yia, tufala i ripresentem papa mo mama blong hem long olta. Hem i wan taem wetem ol gud filing we i kam moa gud, taem fren blong mitufala blong Ajentina i sil long papa mo mama blong hem. I gat sikis long mifala nomo long taem ia, long wan kwaet aftenun longwe long wol, mo yet hem i wan long ol samting we i moa impoten, i stap hapen long wol. Mi talem tangkyu tumas we wok blong mi blong stap noknok long ol doa olsem wan misinari, i bin kam fulwan long taem ia,, we i plante yia afta long misin, mo stap mekem ol siling odinens we i joenem hem wetem papa mo mama mo ol jeneresen blong hem long pas.

Siling ia we i stap hapen i stap hapen plante taem raon long wol long ol tempol. Hemia i bigfala mo lasfala step blong stap karem ol kavenan pipol i kam tugeta. Hem i janis ia we i moa hae we yu save kasem olsem wan memba insaed long Jos Ia blong Jisas Kraes. Mi promes se taem yu fetful blong lukaotem janis ia, long stret taem o taem we i no save finis, bae janis ia i blong yu tru.

Mi testifae se siling paoa mo atoriti we i kambak long wol tru long Josef Smit hem i tru, mo wanem we oli rekodem long wol, oli rekodem tru long heven. Mi testifae se Presiden Russell M. Nelson, olsem Presiden blong Jos, i wan man ia nomo long wol tedei we tru long ol ki blong hem, i daerektem yus blong bigfala tabu paoa ia. Mi testifae se Atonmen blong Jisas Kraes i mekem laef we i no save finis i wan trutok, mo posibiliti blong ol famli rilesensip blong kam olsem wan god, i tru. Long nem blong Jisas Kraes, amen.