Putum Tingting I Stap Daon blong Akseptem mo Folem

Long namba faef japta1, blong Alma oli askem wan kwestin: “?Yufala i save talem se sapos God i singaotem yufala naoia blong ded, insaed long yufala bakegen, bae yufala i ting se tingting blong yufala i bin stap daon inaf?”¹ Kwestin ia i tokbaot se fasin blong putum tingting i stap daon i wan impoten samting we i rere long yumi blong yumi save go bak long ples blong God.

Yumi evriwan i laekem blong gat tingting ia se yumi gat tingting i stap daon, be sam eksperiens long laef i mekem yumi luksave se yumi evriwan i gat hae tingting insaed long yumiwan.

Plante yia i pas, taem we tufala gel blong mi i stap yet long haos, mi disaed blong soem long tufala mo waef blong mi, eria blong bisnis we mi lukaotem long kampani we mi wok long hem.

Stamba tingting blong mi i blong soem long olgeta wan ples we, i no olsem hom blong mifala, evriwan bae oli mekem stret wanem mi askem olgeta blong mekem mo bae oli no askem kwestin long mi. Taem mifala i kasem get long fored, we oltaem bae i open nomo taem trak blong mi kam kolosap, mi sek se long taem ia get i no open. Be, i gat wan niu sekiuriti we mi neva luk bifo i kam long trak mo askem mi ID blong kampani blong mi.

Mi talem long hem mi neva nidim wan ID blong draev i kam insaed long propeti ia wetem trak blong mi mo wetem fasin blong flas mi askem hem: “?Yu yu save se yu stap toktok long huia?”

Afta hem i ansa, “Okei, from yu no karem kampani ID blong yu, mi no save se yu yu huia, mo taem mi mi stanap long get ia bae yu no save kam insaed long propeti ia taem yu nogat ID.”

mi stap tingting blong lukluk long mira long fored blong jekem fes blong tufala gel blong mi, be mi save se ol gel blong mi oli laekem evri seken blong taem ia. Long saed blong mi waef blong mi i stap saksakem hed we i no agri long fasin blong mi. Las joes blong mi i blong talem sore long sekiuriti ia mo talem mi sore tumas we mi tritim nogud hem. “Mi fogivim yu,” hem i talem, “!be sapos yu no holem kampani ID blong yu bae yu no save kam insaed tedei!”

Afta mi draev slo i gobak hom blong karem ID blong mi, mi lanem wan gudfala lesen: Se taem yumi jusum blong no putum tingting i stap daon, bae yumi sem nomo.

Insaed long Ol Proveb, “Sipos yu stap flas, yu stap leftemap yuwan,… Be sipos yu mekem tingting blong yu i stap daon, ol narafala man bambae oli tinghae long yu.” Blong mekem fasin blong gat tingting i stap daon i kam moa gud, yumi nid blong andastanem wanem i minim long saed blong gospel

Sam pipol i stap konfius long tingting i stap daon wetem ol narafala samting olsem hemia, eksampol blong stap pua. Be i gat plante we oli pua mo oli gat hae tingting mo plante we oli rij mo oli gat tingting i stap daon. Ol narafala oli sem tumas o oli no bilif long olgetawan be i luk olsem se oli gat tingting i stap daon be insaed long olgeta oli fulap long hae tingting.

?So wanem nao hem i fasin blong gat tingting i stap daon? Long Prijim Gospel blong Mi, hem i “blong wantem blong mekem wanem Lod i wantem. … Blong wantem kasem tijing. … [Hem i] impoten blong leftemap tingting blong gro long saed blong Spirit.”³

I gat plante janis blong yumi evriwan i mekem fasin blong yumi olsem hemia blong Kraes i kam moa gud. Mi laekem blong yumi lukluk faswan long olsem wanem yumi bin putum tingting blong yumi i stap daon o sapos blong mekem olsem, blong stap folem kaonsel blong profet blong yumi. I gat wan tes blong yumi wanwan we i:

• ?Yumi stap talem ful nem blong Jos long evri storian blong yumi? Presiden Russell M. Nelson i talem: “Blong karemaot nem blong Lod long nem blong Jos blong Lod, i wan bigfala viktri long Setan.”⁴

• ?Yumi stap letem God i win insaed long ol laef blong yumi taem yumi stap akseptem invitesen ia blong profet blong yumi? “Tedei, mi stap singaotem ol memba blong yumi long evri ples blong lidim rod blong lego fogud ol fasin mo ol aksen we oli no gat jastis long man.”⁵

• ?Yumi stap winim wol, stap trastem doktrin blong Kraes moa bitim save blong man, olsem we profet blong yumi i tijim?⁶

• ?Yumi stap kam ol man blong mekem pis taem yumi stap talem ol naes samting long mo abaot ol pipol? Presiden Nelson i tijim yumi long las jeneral konfrens: “Sapos i gat samting we i klin, i luk naes, o i gudfala mo i nambawan tru we yumi save talem abaot wan nara man—long fes blong hem stret o biaen bak blong hem—hemia nao fasin blong yumi blong toktok.”⁷

Olgeta ia oli ol simpol be ol instraksen we i gat bigfala paoa. Tingbaot, evri pipol blong Moses oli nidim blong lukluk nomo snek we oli mekem long bras we hem i leftemap, blong oli kam gud bakegen. Be “from wok we oli mas mekem, i blong lukluk nomo; mo from we wei ia i no had, o i isi, i gat plante we oli ded.”

Long taem blong konfrens ia yumi harem mo bae yumi harem ol stret kaonsel blong ol profet mo ol aposol. Hem i wan stret taem we yumi mas mekem tingting i stap daon i kam moa gud mo letem ol strong tingting blong Lod i winim yumi tru long ol lida we Lod i jusum.

Antap long evri samting blong mekem tingting i stap daon i kam moa gud, yumi mas andastanem mo akseptem se yumi no save winim ol jalenj blong yumi o blong mekem wanem yumi save mekem tru long ol traehad blong yumiwan nomo. Ol man we oli leftemap tingting, ol man blong raet, ol koj, mo ol man long sosol media raon long wol, speseli olgeta we oli stap long sosol media, bae oli talem se evri samting i dipen long yumi mo ol aksen blong yumi. Wol i biliv long han blong bodi blong mit mo bun.

Be tru long gospel we i kambak yumi lanem se yumi dipen long bigfala kaen hat blong Papa long Heven mo Atonmen blong Sevya blong yumi Jisas Kraes , “from mifala i save se hem i tru long gladhat blong God we Lod i sevem mifala, afta evri samting nomo we mifala i save mekem.” Hemia i from wanem hem i impoten blong mekem mo kipim ol kavenan wetem God, taem yumi mekem olsem bae i givim long yumi ful raet long hiling, letem mo mekem i kam gud evriwan paoa blong Jisas Kraes tru long Atonmen blong Hem.

Go long sakramen miting evri wik mo wosip insaed long tempol evri taem blong tekpat long ol odinens mo blong kasem mo riniu olgeta kavenan i wan saen we yumi luksave se yumi dipen long Papa long Heven mo Sevya blong yumi Jisas Kraes. Hemia bae i invaetem paoa blong Tufala i kam long laef blong yumi mo helpem yumi long ol problem blong yumi mo mekem stamba tingting blong yumi stap long wol ia i kam tru.

I no long taem i pas, oli testem level blong tingting blong mi blong stap daon mo fasin blong mi blong dipen long Lod, bakegen. Mi stap long wan taksi blong go long eapot blong go long wan sot flaet long wan ples we i gat wan had situesen blong fiksim. Taksi draeva, we i no wan memba blong Jos, i lukluk mi tru long mira mo talem se, “!Mi luk save luk se yu no oraet tedei!”

“?Yu luksave?” Mi askem.

“O yes,” hem i talem. Afta hem i talem wan samting olsem. “!Luksave nomo long fes blong yu!”

Mi eksplenem long hem se mi gat wan had situesen blong lukluk long hem, afta hem i askem mi ?Yu yu mekem evri samting long paoa blong yu blong fiksim problem ia?”

Mi ansa se mi mekem evri samting we mi save mekem.

Afta hem i talem se wan samting mi neva fogetem, “Letem hemia long han blong God, mo evri samting bae i wok aot gud.”

Mi konfes se kolosap bae mi askem hem, ?Yu yu save se yu stap toktok long huia?” !Be mi no mekem! Wanem mi mekem, mi putum tingting i stap daon bifo long Lod truaot long wan aoa flaet ia, mi stap askem tabu help blong Hem. Taem mi stap lego eaplen, mi lanem se had situesen we i nid blong fiksim oli fiksim finis mo oli nomo nidim mi.

Ol brata mo sista, komanmen, invitesen mo promes blong Lod i klia mo i gat kamfot: “ Putum yu daon; mo bae Lod God i lidim yu, mo givim ansa blong ol prea.”

Bae yumi putum tingting i stap daon blong folem kaonsel blong ol profet mo akseptem se God nomo mo Jisas Kraes i save jenisim yumi—tru long ol odinens mo ol kavenan we yumi kasem insaed long Jos blong Hem—i mekem huia yumi, mo kam moa gud long laef ia mo, wan dei, blong mekem yumi i kam stret gud evriwan long Kraes. Long nem blong Jisas Kraes, amen.