Olgeta We Oli Folem Kraes Wetem Pis

Yumi laef long wan taem we “ olgeta we oli folem Kraes wetem pis”¹ oli eksperiensem ol jalenj we oli defren. Olgeta we oli bilif long, wosip wetem tingting i stap daon, mo testifae abaot Jisas Kraes oli oltaem fesem hadtaem, safa bigwan, mo ol fasin blong agens.¹ Waef blong mi, Mary, mo mi i no defren. Long las yia mifala i luk plante long ol haeskul fren mo ol misinari kompanion blong mifala mo sam long ol waef blong olgeta, mo sam fren we mifala i bin wok tugeta, oli ded, o olsem Presiden Russell M. Nelson i talem, oli graduet i go long narasaed vel. Mifala i bin luk sam we oli bin groap long fet mo bilif oli gowe long rod blong kavenan.

Sori tumas, mifala i bin lusum wan apu boe blong 23 yia we i ded long wan nogud aksiden long trak. Sam dia fren, famli memba, mo ol fren blong wok oli bin fesem tu ol jalenj long saed blong helt.

Eni taem hadtaem i kam, yumi krae mo traehad blong leftemap wanwan long yumi.³ Yumi sore from ol samting we oli no save hapen mo ol singsing we oli no save singim.⁴ Ol nogud samting i hapen long ol gud pipol long laef ia. Ol faea we i spolem gud evri samting, long Maui Hawaii, Saot Jili, mo Is blong Kanada oli ol eksampol blong ol nogud samting we samtaem ol gud pipol oli stap fesem.

Yumi ridim long Perel blong Bigfala Praes se Lod i soemaot long Ebraham evri samting long spirit blong olgeta. Ebraham i lanem abaot laef blong yumi bifo laef ia, odinesen bifo laef ia, Kriesen, taem oli jusum wan Ridima, mo laef long wol ia, we i seken laef blong man.⁵ Ridima i mekem i klia:

“Bae yumi mekem wan wol we olgeta ia bae oli save stap long hem,

“Mo bae yumi testem olgeta long wei ia, blong luk sapos bae oli mekem evri samting we Lod, God blong olgeta bae i givim oda long olgeta.”⁶

Naoia, yumi evriwan i stap long ples ia we i seken laef blong yumi blong progres i go long wan kingdom we i gat glori olsem pat blong bigfala plan blong God blong sevem man mo kam olsem wan god. Oli blesem yumi wetem fridom blong joes mo yumi save fesem ol hadtaem blong laef ia. Hemia i taem we oli givim long yumi, blong stap rere blong mitim God.⁷ Yumi kasem blesing ia blong save Jisas Kraes mo rol blong Hem insaed long plan ia. Yumi gat janis ia blong kam ol memba blong Jos blong Hem we i bin kambak bakegen—Jos Ia blong Jisas Kraes blong Ol Lata-dei Sent. Olsem olgeta we oli folem Kraes wetem pis, yumi traehad blong stap folem ol komanmen blong Hem. I no bin isi nating blong olgeta we oli folem Hem. Hem i no isi tu blong Sevya blong mekem misin blong Hem long wol ia i hapen.

Ol skripja oli klia, plante bae oli folem toktok ia “kakae, dring, mo stap glad, from tumoro bae yumi ded”.⁸ Ol narawan we oli no bilif oli go bak tugeta olsem wan grup blong pipol wetem semfala tingting blong toktok from “nekis niu samting”⁹ mo ol save blong man.¹⁰ Oli no save wea ples blong faenem trutok.¹¹

Olgeta we oli folem Kraes wetem pis oli no folem tufala rod ia. Wea ples yumi stap, yumi ol memba blong ol komuniti we i aktiv mo mekem fren. Yumi lavem, serem, mo invaetem ol pikinini blong God blong folem ol tijing blong Kraes.¹² Yumi folem toktok blong profet blong yumi we yumi lavem, Presiden Nelson; yumi jusum rol blong wan man blong mekem pis, naoia mo oltaem.¹³ Wei ia i semmak oltaem wetem tugeta skripja mo daereksen blong profet.

Long 1829 Jos we i bin kambak i no oganaes yet, mo Buk blong Momon tu oli no pablisim yet. Wan smol grup blong pipol we oli stap traehad, spirit blong God i tajem olgeta, oli folem Profet Josef Smit. Lod i soemaot long Josef, toktok blong ol hadtaem: “From hemia, smol grup, no fraet; mekem gud; letem wol mo hel i kam wan agensem yufala, from we sapos yufala i stanap antap long strong ston blong mi, bambae oli no save win.”¹⁴ Hem i talem tu long olgeta se:

“Lukluk long mi long evri tingting blong yutufala; no gat tu tingting, no fraet.

“stap fetful, stap obei long ol komanmen blong mi mo bambae yutufala i save kasem kingdom blong heven.”¹⁵

I klia i stap, taem yumi fesem ol hadtaem i no jenisim ples blong yumi long heven. Long Hibrus, oli talem long yumi blong “mekem tingting blong yumi i strong, nao yumi kam long fes blong God we hem i stap givhan long yumi long gladhat blong hem, nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.”¹⁶ Jisas Kraes i “prapa man blong sevem man.”¹⁷

Mi laekem ol toktok blong Momon, we boe blong hem Moronae i kwotem, i tokbaot “olgeta we oli folem Jisas Kraes wetem pis from wokbaot blong yufala we i gat pis long medel blong ol pikinini blong man.”¹⁸

Olgeta long yumi insaed long Jos we oli stap traehad blong stap olsem “olgeta we oli folem Kraes wetem pis wan gudfala taem i stap wet long yumi taem yumi stap lukluk nomo long Lod mo Sevya blong yumi, Jisas Kraes. Ol hadtaem oli pat blong laef long wol mo i stap hapen long laef blong evriwan raon long wol. Hemia i tekem ol bigfala raorao bitwin ol kantri mo wanwan man o woman.

Oltaem, oli stap askem ol jos lida, “From wanem God i letem ol nogud samting i hapen, speseli long ol gud pipol?” mo “From wanem olgeta we oli stret mo gud mo oli stap mekem wok blong Lod oli no save gat paoa blong blokem ol hadtaem?”

Yumi no save evri ansa; be, yumi save ol impoten prinsipol we i letem yumi fesem ol hadtaem, ol bigfala hadtaem, mo ol samting we i kam agensem yumi wetem fet mo strong tingting long wan gudfala fiuja we i stap wet long yumi wanwan. I no gat wan gud eksampol long skripja wetem respek blong pas tru long bigfala hadtaem we i bitim kaonsel we Lod i talem long Profet Josef Smit, taem hem i stap olsem wan prisena long Kalapus long Libeti.

Lod i talem long pat ia:

“Sapos ol stret jo blong hel oli open bigwan blong solemdaon yu, nao yu mas save, boe blong mi, se evri samting ia bae i givim eksperiens long yu, mo bae i blong gud blong yu.

“Pikinini blong Man i bin kamdaon mo fesem i bitim evri samting ia. ?Olsem wanem? ?Yu yu moa hae long hem?

“… Yu no fraet long wanem we man i save mekem, from we God bae i stap wetem yu blong oltaem mo oltaem.”¹⁹

Hem i klia, yumi gat wan Papa long Heven we i save mo lavem yumi wanwan mo andastanem gud safaring blong yumi. Pikinini blong Hem, Jisas Kraes, i Sevya mo Ridima blong yumi.

Presiden Russell M. Nelson mo Presiden M. Russell Ballard i ripitim bakegen hamas impoten niufala seken edisen blong Prijim Gospel blong Mi.²⁰ Mi serem intres blong tufala. Niu edisen ia, i witnes long tabu skripja mo givim paoa long mesej ia se:

“Long Atonmen blong Hem we i pemaot praes, Jisas i tekem long hemwan ol sobodi, ol harem nogud, mo ol wiknes blong yumi. From hemia, Hem i save tru ong bodi, olsem wanem blong helpem ol pipol blong hem folem ol wiknes blong olgeta.(Alma 7:12; luk tu long ves 11). Hem i givim invitesen ia, Kam long mi, mo taem yumi mekem, Hem i givim spel long yumi, hop, mekem yumi strong, givim wan lukluk we i go longwe, mo hiling.(Matiu 11:28; luk tu long ol ves 29–30).

“Taem yumi stap dipen long Jisas Kraes mo Atonmen blong hem, Hem i save helpem yumi blong stanap strong agensem ol hadtaem blong yumi, ol siknes mo harem nogud blong yumi. Yumi save gat fulap glad, pis, mo haremgud. Evri samting we i no stret tumas abaot laef, i save kam stret tru long Atonmen blong Jisas Kraes.”²¹

Yumi save stap glad olsem olgeta we oli folem Kraes wetem pis.

Plan blong Papa blong yumi blong ol pikinini blong Hem i no laef bifo mo laef long wol ia nomo, be tu, i gat wan laef we i no save finis, wetem bigfala kam tugeta wetem olgeta we yumi bin lusum olgeta finis. Evri samting we i rong bae i kam stret, mo bae yumi luk mo andastan wetem klia lukluk we i stret gud mo i no gat rong long hem.

Ol lida blong Jos oli komperem lukluk ia long wan we i stap wokbaot long medel blong wan ak we i gat tri plei.²² Olgeta we oli no gat save ia abaot plan blong Papa, oli no andastanem wanem i bin hapen long fas ak o laef bifo long wol ia mo ol stamba tingting we oli stanemap longwe; oli no gat wan klia save mo no save wanem blong mekem long namba tri ak, we hem i plan blong Papa i kam blong hapen.

Plante oli no glad se tru long bigfala plan blong Hem we i gat lav, olgeta we oli no save mekem tru, from se i no rong blong olgeta, long en oli no gat samting i holemtaet olgeta.²³

Ol skripja oli klia: olgeta we oli folem Kraes wetem pis we oli stret mo gud, oli folem Sevya, mo kipim ol komanmen blong Hem bae oli gat blesing. Wan long ol skripja we i moa impoten blong olgeta we oli stret mo gud, no mata wanem situesen blong olgeta long laef, i pat blong toktok blong King Benjamin long ol pipol blong hem. Hem i promes se olgeta we oli fetful blong kipim ol komanmen oli kasem blesing long evri samting long laef ia mo “go insaed long heven … [mo] stap wetem God long wan ples blong hapi we i neva gat en.”²⁴

Mifala i luksave se kolosap evriwan long yumi i bin eksperiensem ol strong win long ol laef blong yumi long saed blong bodi mo spirit, sam i nogud tru. Wan Papa long Heven we i gat lav mo Pikinini blong Hem Jisas Kraes, we i stap long hed blong Jos blong Hem we i bin kam bakegen, oli bin givim ol skripja mo ol profet blong mekem yumi rere, wonem yumi abaot ol denja, mo lidim yumi blong rere mo protektem yumi. Sam daereksen ia i nidim blong tekem kwik aksen long olgeta, mo sam i givim proteksen blong plante yia long fiuja. Introdaksen blong Lod insaed long Doktrin mo Ol Kavenan, seksen 1i talem long yumi blong “lisin gud long ol toktok blong ol profet.”²⁵

Seksen 1 i givim ol woning tu long yumi, “Yufala i rere, yufala i rere long wanem we bae i kam.”²⁶ Lod i givim wan janis long ol pipol blong Hem blong rere long wanem we bae i kam.

Lod i givim wan revelesen we i gat paoa long Presiden Brigham Yang long 14 Jenuware, 1847, long Winta Kwota.²⁷ Revelesen ia i namba wan eksampol blong Lod we i stap mekem i rere ol pipol long wanem we i stap kam. Ol fetful sent oli statem wokbaot blong olgeta i go long tabu hil blong Sol Lek Vale. Oli bin gat sakses blong bildim flatem Nauvu Tempol mo kasem ol tabu odinens. Oli bin ronemaot olgeta long Misuri mo ol man blong mekem trabol oli aotem olgeta long Nauvu long rabis sisen blong kolkol. Revelesen we i kam long Brigham i givim stret olsem wanem oli save rere blong statem wokbaot blong olgeta. Lod i mekem i klia gud blong tekem gud kea long ol puaman, ol wido, olgeta we oli nogat papa, mo ol famli blong olgeta we oli givim seves long Momon Batalien taem grup blong ol Sent oli statem wokbaot blong olgeta long rabis taem ia.

Antap long ol nara toktok blong laef long stret mo gud laef, Lod i givim tu nara prinsipol we i gohed blong stap long yus tedei.

Faswan, Hem i leftemap tingting blong olgeta blong “presem Lod wetem singsing, wetem miusik, wetem danis, mo wetem wan prea blong presem Hem mo talem tangkyu long Hem.”²⁸

Seken, Lod i talem sapos oli “harem nogud, prea long Lod, God blong yu, mo prea strong, blong mekem se sol blong yufala i gat glad.”²⁹

Tufala advaes ia oli ol gudfala toktok blong dei blong yumi. Ol laef we oli fulap long fasin blong presem Hem wetem, miusik, mo talem tangkyu long Hem, oli gat blesing we i moa defren. Blong stap glad mo dipen long help blong heven i wan gudfala wei blong stap olsem olgeta we oli folem Kraes wetem pis. Traehad oltaem blong stap hapi, i help blong no harem nogud long saed blong spirit.

Lasfala laen blong wan impoten hym i givim ansa long wan naesfala wei: “Wol i nogat sore we heven i no save hilim.””³⁰

Olsem wan Aposol blong Lod Jisas Kraes, mi testifae se “olgeta we oli folem Kraes wetem pis bae oli faenem pis long olgetawan long laef ia mo wan kam tugeta long heven we i gat glori. Mi serem wan sua witnes blong Sevya se Hem i tabu mo Atonmen blong Hem i ril. Hem i Sevya mo Ridima blong yumi. Long nem blong Jisas Kraes, amen.