God I Save mo I Lavem Yu

Laef i had tumas. Plante man i filim daon, stap olgetawan, seraot long ol man, mo taet. Taem ol samting i had, yumi save filim se yumi go longwe o no save progres. Taem yumi save se yumi ol pikinini blong God mo ol memba blong famli blong Hem we i no save finis bae i putumbak wan filing blong stap pat mo gat stamba tingting.²

Presiden M.Russell Ballard i bin serem: “I gat wan impoten aedentiti we yumi evriwan i serem naoia mo oltaem. … Hemia se yu bin mo oltaem wan pikinini boe mo wan gel blong God.… Andastanem trutok ia—blong andastanem gud mo akseptem— bae i jenisim laef.”³

No konfius mo tingdaon long hamas yu yu impoten long Papa blong yu long Heven. Yu no wan mistek blong stap long laef ia, o wan we i nogat papa mo mama, o wan ansa blong wan mata, plas taem plas janis. Long ples we i gat disaen, i gat wan man blong disaen i stap.

Laef blong yu i gat mining mo stamba tingting. Kambak blong gospel blong Jisas Kraes we i stap gogohed i tekem i kam laet mo andastaning blong tabu aedentiti blong yu. Yu yu wan pikinini blong Papa long Heven we Hem i lavem tumas. Yu yu wan impoten topik long evri parabol mo ol tijing ia. God i lavem yu tumas nao Hem i sendem Pikinini blong Hem, Jisas Kraes, blong hilim, sevem mo pemaot yu.⁴

Jisas Kraes i luksave tabu fasin mo praes blong wanwan man we i no save finis.⁵ Hem i eksplenem olsem wanem tu bigfala komanmen blong lavem God mo lavem neiba blong yumi oli stamba blong evri nara komanmen blong God.⁶ Wan long ol tabu responsabiliti blong yumi i blong yumi tekem gud kea long olgeta we oli stap long nid.⁷ Hemia nau, from wanem olsem ol disaepol blong Jisas Kraes, yumi “glad blong karem ol hevi samting blong wanwan, … mo krae wetem olgeta we oli krae …, mo leftemap tingting blong olgeta we oli nidim fasin blong leftemap tingting.”⁸

Relijin i no abaot rilesensip blong yumi wetem God nomo; hem i abaot rilesensip blong yumi wetem wanwan long yumi. Elda Jeffrey R. Holland i bin eksplenem se Inglis toktok blong relijin hem i kam long lanwis toktok blong Latin religare,i minim “blong fasem” o “blong fasem gud bakegen.” Mo, “tru relijin hem i blong fasem yumi i go long God mo long yumi wanwan.”⁹

Hao yumi tritim wanwan lo yumi hem i impoten tumas. Presiden Russell M. Nelson i tijim se, “Mesej blong Sevya i klia: Ol tru disaepol blong Hem, oli bildim, leftemap, leftemap tingting, pulum intres, mo givim insperesen.”¹⁰ Hemia i moa impoten taem sam man blong travel oli filim se oli lus, oli stap olgetawan, oli fogetem olgeta, o oli karemaot olgeta.

Yumi no nid blong lukluk i go longwe blong faenem olgeta we oli stap traehad. Yumi save stat taem yumi helpem wan insaed long famli blong yumiwan, kongregesen, o lokol komuniti blong yumi. Yumi save lukaotem tu blong karemaot ol harem nogud blong 700 milian pipol we oli stap safa long bigfala trabol taem¹¹ o 100 milian pipol we oli fosem olgeta nomo blong kamaot long ol haos blong olgeta from fasin blong stap raorao mo fosem man.¹² Jisas Kraes i stret eksampol blong stap tekem kea long olgeta we oli stap long nid—olgeta we oli hangre, strenja, sikman, puaman, olgeta we i stap long prisen. Wok blong Hem i wok blong yumi.

Elda Gerrit W. Gong i bin tijim se “wokbaot blong yumi i go long God, yumi oltaem faenem tugeta.”¹³ Olsem hemia, evri wod blong yumi i mas stap olsem wan sef ples blong evri pikinini blong God. ?Yumi stap aktiv blong go long Jos o aktiv blong bildimap komuniti we stamba tingting i blong wosip, tingbaot Kraes, mo givhan long wanwan man?¹⁴ Yumi save luksave kaonsel blong Presiden Nelson we i blong katemdaon fasin blong jajem man mo gat moa lav mo soem moa klin lav blong Jisas Kraes tru long ol toktok mo aksen blong yumi.¹⁵

Atonmen blong Jisas Kraes i bin wan bigfala impoten samting we i soemaot lav we Papa blong yumi long Heven i gat blong ol pikinini blong Hem.¹⁶ Toktok ia atonmen i tokbaot tingting ia blong “kam wan” we i soem taem tu man i kam tugeta blong stretem wan samting mo kam wan.

Misin blong Sevya blong yumi i blong provaedem tugeta wan wei blong gobak bakegen long Papa long Heven mo kasem help long rod ia. Sevya i save tru long eksperiens blong Hem olsem wanem blong sapotem yumi tru long long ol jalenj blong laef.¹⁷ No mekem mistek, Kraes i Man we i sevem yumi mo i Man we i hilim sol blong yumi.

Taem yumi putum fet long aksen, Hem i helpem yumi go tru long ol hadtaem. Hem i gohed blong mekem invitesen wetem lav mo sore blong Hem:

“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.

“Putum yok blong mi long solda blong yufala, mo wok wetem mi; … nao bae yufala i faenem spel long laef blong yufala.”¹⁸

Pikja stori blong yok i gat paoa. Olsem we Presiden Howard W. Hunter i eksplenem: “Yok i wan samting we i letem ‘paoa’ blong nambatu animol blong joen tugeta mo stap wan long efot blong wan animol, stap serem mo mekem i godaon ol hevi wok we i stap blong mekem. Wan hevi samting we i lukluk ova o maet i no isi blong wan i save tekem stret be tu i save karem tugeta wetem wan yok.”¹⁹

Presiden Nelson i bin tijim: “Yu kam long Kraes blong yok wetem Hem mo wetem paoa blong Hem, blong mekem se yu no stap pulum hevi samting blong laef yuwan. Yu stap pulum ol hevi samting blong laef wetem Sevya mo Ridima blong wol.”²⁰

?Olsem wanem yumi yok o joenem yumi wetem Sevya? Elda David A. Bednar i tijim:

Elda Bednar i eksplenem se: “Blong stap mekem mo kipim ol tabu kavenan, i joenem yumi long mo wetem Lod Jisas Kraes. Long hemia, Sevya i stap askem strong yumi blong dipen mo kam tugeta wetem Hem. …

Yumi no stap mo neva nid blong stap yumiwan.”²¹

Long eniwan we i stap karem ol hevi samting, i lus, i konfius, yu no nid blong mekem hemia yuwan.²² Tru long Atonmen blong Kraes mo ol odinens blong Hem yu save yok o fasem yu strong long Hem. Wetem lav bae Hem i provaedem paoa mo hiling we yu nidim blong fesem rod we i stap long fored blong yu. Hem i ples blong kam haed blong yumi long ol trabol taem.²³

Blong infomesen blong yufala, Jasper i fani, i gat lav, i waes, mo i strong hed. Be impoten pat blong stori ia i we hem i blong mi. Hem i pikinini boe blong mi, mo mi lavem hem bitim we hem i save. Sapos wan papa blong wol ia we i no stret evriwan i gat filing ia abaot pikinini blong hem, ?yu yu save pikjarem long maen, olsem wanem wan Papa long Heven we i stret gud evriwan, i fulap wetem lav mo glori i filim abaot yu?

I go long ol dia fren blong mi blong jeneresen ia we i stap kam antap, Gen Z mo Gen Aloga( Olgeta Yut mo Ysa/Yang Jeneresen): Plis save se fet i nidim aksen.²⁴ Yumi laef long wan taem we long plante oli mas luk nomo “blong save bilivim”. Blong gat fet i wan jalenj mo i nidim ol joes. Be ol prea oli gat ansa.²⁵ Mo ol ansa yu save filim.²⁶ Sam long ol samting we i tru long laef ia yu no save luk, be yu save filim, save mo eksperiensem. Olgeta tu oli ril.

Jisas Kraes i wantem yu blong save mo gat wan rilesensip wetem Papa blong yu long Heven.²⁷ Hem i tijim, “?Huia man ia, long medel blong yufala we i gat wan pikinini boe, mo pikinini ia i stanap aotsaed mo i talem: Papa, openem doa blong haos blong mi save kam kakae insaed wetem yu, bae yu no talem: Kam insaed boe blong mi; from wanem we i blong mi i blong yu, mo wanem we i blong yu i blong mi?”²⁸ ?Yu save tingting long wan pikja blong wan man we i gat love olsem Papa blong yu long heven?

Yu yu pikinini blong Hem. Sapos yu filim se yu lus, yu gat ol kwestin, o nidim waes tingting, sapos yu stap traehad long ol situesen blong yu o traehad long saed blong spirit tanem yu i go long Hem. Prea long hem blong kasem kamfot, lav, ansa, mo daereksen. Wanem nid we yu gat, mo wea ples yu stap, talemaot hat blong yu long Papa blong yu long Heven. Blong sam, bae yu wantem blong folem invitesen blong Presiden Nelson mo “askem sapos i tru Hem i stap ia—sapos Hem i save yu. Askem Hem olsem wanem Hem i filim abaot yu. Mo afta, yu lisin”²⁹

Ol dia brata mo sista:

• Save Papa blong yufala long Heven. Hem we i stret evriwan mo i gat lav.

• Save huia i Jisas Kraes.³⁰ Hem i Sevya mo Ridima blong yumi. Fasem yuwan mo olgeta we yu lavem i go wetem Hem.

• Mo save huia yu. Kam blong save tru tabu aedentiti blong yu. Plan blong God blong stap glad i abaot yu. Yu yu pikinini we i impoten tumas long Hem mo gat bigfala valiu. Hem i save mo lavem yu

Blong ol simpol be fandesen trutok ia, mi testifae long nem blong Jisas Kraes, amen.