“Ol Mak blong Fasin blong Stap Hapi”

Taem mi stap long wan bisnis trip plante yia i pas, mi faenem miwan mi sidaon nekis long wan man Nedalan. Mi wantem tumas blong visitim hem afta long misin blong mi long Nedalan olsem wan yang misinari.

Taem mitufala i kam blong save mitufala, hem i givim long mi bisnis kad blong hem wetem wan spesel taetol we i “profesa blong stap glad”.  Mi givim komen long naes wok blong hem mo askem hem wanem wan profesa blong stap glad i mekem. Hem i talem se hem i tijim ol pipol olsem wanem blong gat wan hapi laef taem oli setemap wan rilesensip we i gat mining mo ol gol. Mi ansa, “Hemia i gud tumas, be ?olsem wanem sapos yu save tijim olgeta rilesensip blong oli save gogohed bitim gref mo ansa long ol nara kwestin blong sol?, olsem, ?wanem i stamba tingting blong laef?, ?olsem wanem mi save winim wiknes blong mi?, mo ?bae yumi go wea afta we yumi ded?” Hem i talem se bae hem i gud tumas sapos yumi gat ol ansa long ol kwestin ia, mo mi glad tumas blong serem wetem hem wanem yumi mekem.

Tedei, mi laekem blong luklukbak long sam long ol stamba prinsipol blong tru fasin blong stap hapi we wol ia i mekem plante oli out long hem, we plante samting i gud tumas be sam nomo i impoten.

Alma i tijim ol pipol long dei blong hem: “From luk, mi talem long yufala i gat plante samting we bae oli kam; mo luk, i gat wan samting we i moa impoten long evriwan—from luk, taem i no longwe tumas we Ridima i stap laef mo i stap kam long medel blong ol pipol blong hem.”¹

!Mesej ia i impoten semmak long yumi tedei taem yumi stap wet mo rere from Seken Kaming blong Kraes!

Mekem se, fas lukluk blong mi i blong bildim fandesen blong Jisas Kraes i impoten long fasin blong yumi blong stap hapi. Hem i wan stret fandesen, “ wan fandesen we sapos ol man i bild long hem bae oli no save foldaon.” Taem yumi mekem hemia i rere yumi long ol jalenj blong laef, no mata wanem i hapen.

Plante yia i pas mi go long wan sama Skaot Kamp wetem boe blong mi Jastin. Taem ol aktiviti i stap tekem ples, wetem glad hem i talem se hem mo ol fren blong hem oli wantem blong kasem ajeri merit baj. Blong pasem hemia, ol boe ia oli mas pasem wan sot tes we oli raetem mo sutum wan taget wetem ol aro blong olgeta.

Hat blong mi i brok. Long taem ia Jastin i no strong inaf from hem i gat sik insaed long ol kat blong hem, we hem i gat taem hem i bon i kam long wol. Mi stap tingting se sapos hem i save pulum aro ia inaf blong hem i save sutum taget ia.

Taem hem mo ol fren blong hem i lego ajeri klas, mi prea kwaet nomo se bae hem i no mekem sem long hemwan tru long eksperiens ia. Sam aoa afta, mi luk hem i stap ron long rod i kam long mi wetem wan bigfala smael. “!Papa!”, hem i singaot. “!Mi karem merit baj blong mi! !Mi sutum stret long medel, hem i nekis taget kolosap long mi, be mi sutum stret long medel!” Hem i pulum aro ia wetem ful paoa blong hem mo letem i flae, we hem i no save kontrolem stret taget blong hem. Mi glad tumas long tija blong ajeri ia we i andastanem, we i neva talem: “!Sore rong taget!” Be, hem i luk hamas Justin i save mekem mo traehad blong hem, hem i ansa wetem kaen fasin, “!Gud wok!”

Hemia i olsem ia taem yumi traem bes blong yumi blong folem Kraes mo ol profet blong Hem iven long hamas yumi save mekem. Sapos yumi kam long Hem taem yumi kipim olgeta kavenan blong yumi mo stap sakem ol sin blong yumi, wetem glad bae yumi harem komen blong Sevya: “!Ei, yu yu mekem wan gudfala wok! Yu yu wan gudfala man we yu lukaot gud long ol wok blong mi.”

Mi talemaot tabu witnes blong mi blong Sevya blong wol mo long lav blong Hem blong pemaot man mo paoa blong hilim, mekem i kam strong, mo leftemap yumi taem yumi stap traehad blong kam long Hem. Be long narasaed, yumi no save muv wetem plante man i go long Jisas. Sevya i winim ded, sik, mo sin mo i givim wan wei blong yumi kam stret sapos we yumi folem Hem wetem ful hat blong yumi.

Nambatu lukluk blong mi hem i impoten tumas long fasin blong stap glad blong yumi, blong yumi tingabaot se yumi ol pikinini boe mo gel blong wan Papa long Heven. Blong save mo trastem hemia i jenisim evri samting.

Sam yia i pas, long wan flaet blong go hom long wan Jos asaenmen, Sista Sabin mo mi i sidaon biaen kolosap long wan bigfala man we i gat wan bigfala tatu blong fes blong wan man we i kros biaen long hed blong hem we i bolhed wetem namba 439biaen long hem.

Taem mifala i lan, mi talem, “Sore, brata. ?Mi save askem namba ia biaen long hed blong yu ia i minim wanem?” Be mi no wantem askem abaot fes ia we i kros.

Hem i talem; “Hemia mi ia. Hemia huia mi. !Eria blong 219 i blong mi!”

Be fo handred tetinaen nao i stap long hed blong hem, mekem se mi sapraes blong luk se hem i rong from i impoten tumas long hem.

Mi tingting se i luk nogud we aedentiti blong man ia mo huia hem i dipen long wan namba we i go wetem grup blong pipol long eria blong hem. Mi stap tingting long miwan, man ia we i luk se i strong,i wan taem, hemi smol boe blong wan man we i nidim blong hem i luk olsem wanem hem i impoten. Sapos nomo hem i save huia hem mo hem i blong hu, from yumi evriwan, “Hem i pemaot yufala(yumi) finis long bigfala praes.”⁵

I gat wan waes laen blong wan singsing long muvi The Prince of Egypt [Prins blong Ijip] hem i talem, “lukluk tru long laef blong yu tru ol ae blong heven.”⁶ Taem yumi save wea ples yumi kam long hem mo wea ples yumi stap go long hem, bae yumi save lukluk laef long wan wei we i gat mining, mo openem rod blong stap lan mo gro, iven olsem we “yumi stap luk long wan glas we i no klia gud”⁷ blong wan sot taem.

Nambatri mak blong fasin blong stap glad i blong oltaem tingbaot tru valiu blong wan sol. Yumi mekem bes blong folem wanem Sevya i talem: “se yufala i mas lavlavem yufala, olsem we mi mi lavem yufala.”⁸

Hem i tijim se “Taem we yufala i mekem olsem long wan brata blong mi we i daon moa long ol narafala brata blong mi, be i olsem we yufala i mekem long mi nomo.”⁹

Buk blong Ol Proveb i givim kansel wetem waes: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.”

Bae yu no neva sore from fasin blong stap kaen. Long ae blong God, fasin blong stap kaen i semmak olsem blong gat gud valiu. Pat blong stap kaen i blong fogivim mo no jajem wan man.

Plante yia i pas, yangfala famli blong mi i stap blong go luk wan muvi blong famli haos naet. Mifala evriwan i stap long trak, be wan ol boe blong mitufala mo waef blong mi Valerie. Ples i tudak aotsaed, mo taem boe blong mitufala i openem doa mo ron from trak, hem i mestem mo kikim wanem hem i ting se puskat blong mifala long vranda. Be sore nomo long boe blong mitufala mo waef blong mi, we i stap kam biaen long hem, i no puskat blong mifala be hem i wan skank [wan animol we i save sprei long wan mo smel blong hem i strong), !we i letem olgeta i save! Mifala i kambak long haos, tugeta i swim mo wasem hea blong tufala wetem jus blong tomato, from se oli talem se hem i meresin blong karemaot strong smel blong skank. Taem we oli finis blong swim mo jenisim ol klos blong olgeta, strong smel ia i nomo gat, mifala i disaed se i STRET IA NAO blong mifala i go long muvi. 

Afta we mifala i sidaon biaen long cinema, wan afta wan ol pipol raon long mifala oli disaed blong go karem popkon. Taem oli kambak, oli nomo sidaon long ples oli sidaon long hem bifo.

Mifala i laf taem mifala i stap tingbaot eksperiens ia, be ?olsem wanem sapos evri sin blong yumi i gat smel? ?Olsem wanem sapos yumi save smelem giaman, filing mo tingting long saed blong seks, jalus, hae tingting? Wetem wiknes blong yumiwan we i kamkamaot, hop se bae yumi mas tingting moa long ol narawan mo tu olgeta wetem yumi taem yumi mekem ol jenis we nidim long laef blong yumi. Mi laekem smel blong tabak insaed long jos, from se hem i soem se wan i stap traem blong jenis. Olgeta i nidim yumi blong openem han blong yumi long olgeta.

Presiden Russell M. Nelson i talem: “Wan long ol isi wei blong faenemaot wan tru man blong folem Jisas Kraes, hem i hao wan man i mekem gud wan nara man wetem lav mo sore.”¹¹

Pol i raet i go long Efesas, “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.”

Olsem ol disaepol blong Jisas Kraes, oli askem yumi blong trastem Papa long Heven mo Sevya blong yumi mo no traem blong riplesem Olgeta. Jisas Kraes i save gud ol rong blong yumi mo bae i jajem gud yumi.

Nambafo mak blong fasin blong stap glad i blong holemtaet wan lukluk long laef we i no save finis. Plan blong Papa i go kasem ol taem we i no save finis, hem i no isi blong lukluk ol samting naoia mo fogetem ol samting we bae i kam.

Oli tijim mi lesen ia wetem paoa sam yia i pas tru long gel blong mitufala Jenifa we hem i gat 16 yia. Hem i stap rere blong oli transferem tu lang blong hem, hem i gat faef sik long lang blong hem we bae oli karemaot fulwan mo putum tu niu lang we i helti, we tu naes fren we i gat fasin blong Kraes i givim. Ol step blong hem i denja tumas, be yet long naet bifo operesen blong hem, Jennifer kolosap i prij long mi abaot 41 kilo blong hem, i talem, “!Papa, yu no wari! Tumoro bae mi wekap wetem ol niu lang o, tumoro bae mi wekap long wan moa gud ples. Tugeta wei bae i gud we.” Hemia i fet; hemia i fasin blong lukluk we i no save finis. Blong lukluk laef long poen we i no save finis i soemaot se i klia, kamfot, strong paoa long tingting, mo hop.

Afta long sejeri, taem dei ia we oli stap wet long hem i kam blong karemaot masin we i helpem Jennifer blong pulum win, mifala i wet wetem fraet se bae tufala lang blong hem ia bae i wok o no. Taem hem i pulum fas win blong hem, hem i stat blong krae. Hem i luk wari blong mifala, hariap nomo i talem, “ I gud tumas blong pulum win.” 

Evri dei, mi talem tangkyu long Papa long Heven long moning mo naet from we mi save pulum win. Ol blesing i stap raon long yumi we oli plante we yumi tekem se i nating nomo sapos yumi no tekem not long hem. Long narasaed, sapos yumi no stap ekspektem samthing be stap glad long evri samting, laef bae i kam olsem majik.

Presiden Nelson i talem: “Evri moning i wan blesing we i kam long God. Iven ea we yumi pulum win long hem we i wan kaon we i kam long Hem. Hem i holemtaet yumi tedei mo i sapotem yumi long wan taem i go long narafala taem. Mekem se hem i fas wok blong moning i blong wan prea blong talem tangkyu.”¹³

Hemia i karem mi kam long nambafaef mo las lukluk blong mi, we i, bae yu yu kam moa hapi taem yu gat fasin blong stap talem tangkyu.

Lod i talem: “Mo hem we i akseptem evri samting wetem fasin blong talem tangkyu, bambae mi mekem hem i gat glori.”¹⁴ Ating hemia i from fasin blong talem tangkyu i givim plante narafala fasin blong stap klin.

Olsem wanem nao ol save blong yumi bae i jenis sapos evri moning taem yumi wekap wetem ol blesing we yumi glad long hem naet bifo. Taem yumi no glad long ol blesing we yumi gat i save mekem yumi i no glad, mekem se i save stilim yumi long fasin blong stap glad we fasin blong talem tangkyu i mekem. Olgeta we oli stap long bigfala bilding ia oli lidim yumi blong lukluk i go ova long mak, mekem se yumi mestem ol samting we oli impoten.

Blong talem tru, bigfala fasin blong stap glad mo blesing blong laef long wol we bae yumi faenem tru long lav blong God taem yumi mekem mo kipim olgeta tabu kavenan wetem Hem. Sevya blong yumi bae i saenem mo mekem yumi kam klin long ol blesing blong sakrifaes blong hem mo i talem long olgeta we oli wantem folem Hem, “ bambae oli blong mi long dei we bae mi kam blong jusum ol flas samting blong mi.”¹⁵

Mi promes long yufala se sapos yumi bildim laef blong yumi long fandesen blong Jisas Kraes, gat valiu long tru aedentiti blong yumi olsem ol pikinini boe mo gel blong God, tingbaot se praes blong sol i bigwan, holemtaet wan lukluk we i no save finis, mo glad long ol plante blesing blong yumi, speseli invitesen blong Kraes blong kam long Hem, mekem se yu save faenem tru fasin blong stap glad we yumi stap lukaotem long rod blong wol ia. Laf bae i gat ol jalenj blong hem, be yumi save fesem wetem wan stamba tingting mo pis blong ol trutok we i no save finis we yumi andastanem mo laef folem.

Mi talem witnes blong mi long yufala se God i stap laef, Papa we I No Save Finis mo Pikinini blong Hem we Hem i Lavem, Jisas Kraes. Mi testifae long ol profet we oli stap laef, ol sia, mo ol reveleta. I wan blesing blong kasem kaonsel blong heven tru long olgeta. Olsem we Sevya i talem: “I nomata oli kamaot tru long voes blong miwan o tru long voes blong ol wokman blong mi, i semmak.”¹⁶ Long tabu nem blong Jisas Kraes, amen.