Rongorongo Ni Kakawari n Reirei
A Bane Aomata ni Karikaki ni Katotongan te Atua
Reireiniia koroboki aika tabu ao rongorongo ake a na kaaitara kainnanoia aine ake ko kawaria. Kaota am kakoaua ibukin te reirei. Kaoia naake ko reireinia bwa a na tibwaua te bwai are a namakinna ao a reiakinna.
Tera ae Ti Ataia i aon Arora ni “Karikaki ni Katotongan te Atua”?
E taekinaki ni Moses 2.27: “Bwa te Atua, e karika te aomata ni katotongana, e karikiia ni katotongan Ana Rikitemanna. E karikiia bwa te mwaane ao te aine.”
Beretitenti Gordon B. Hinckley (1910–2008): “A bon tabu rabwatara. A karikaki ni katotongan te Atua. A rangi n tamaroa, te kabanea ni kakannato n Ana karikibwai te Atua. Akea te bwai n rawetamnei ae bootau ma kamiimin matan te aomata. Akea te bwam ae e a tia ni karaoaki ae kona ni mwakuri n te tai ae maan ao ni uota te mwakuri ae rawawata ae botau ma buroon te aomata. Te taninga ao te kaburoro bon taian kakai… . Baikai, ma bwain te rabwata ma kanoana, a tei ibukin te Atua, te Atua ae moan te mwaaka ao moan te wanawana” (“Be Ye Clean,” Ensign, Meei 1996, 48).
Beretitenti Thomas S. Monson: “Te Atua are Tamara bon iai taningana are E kakauongo iai ara tataro. Iai matana are E taratarai iai ara mwakuri. Iai wiina are E kona n taetae iai nakoira. Iai nanona are E namakina iai te nanoanga ao te tangira. Boni iai. E boni maiu. Ngaira natina aika ti karikaki ni katotongana. Titebo taraakira ma ngaia ao ngaia titebo taraakina ma ngaira.” (“I Ataia E Maiu Iesu,” Tambuli, Eberi 1988, 6).
Tera te Kaokoro ni Maiu Ngkai I Ataia bwa I Karikaki ni Katotongan te Atua?
Unimwaane LeGrand Richards (1886–1983) man Aia Kooram Abotoro Ake Tengaun ma Uoman: “A mwaiti aomata aika a taku bwa rabwataia bon oin aia bwai ao bwa a kona ni karaoa are a bon tangiria ma ngaia, ma Bauro e kamataata bwa rabwataia tiaki oin aia bwai, bwa kam kaboaki n te bwai ae kakaawaki, ao bwa ‘Ngkana e urua mwaneaban te Atua te aomata, ao ngaia e na uruaki iroun te Atua; bwa e tabu mwaneaban te Atua, are boni ngkami’ [1 I-Korinto 3:17]” (A Marvelous Work and a Wonder, te boki ae e a tia ni manga rinanoaki [1966], 380).
Unimwaane Joseph B. Wirthlin man Aia Kooram Abotoro Akea Tengaun ma Uoman: “Ti riai n ‘ataiko … te Atua ae ti temanna ae koaua, ao Iesu Kristo, ae Ko kanakomaia’ (Ioane 17:3). ‘… Ataakin te Atua bon te iangoa are e iangoia, te namakina are e namakinna, ni karekea te mwaaka are irouna, ni mataata ni koaua ake e atai, ao ni karaoa are e karaoia. Naake a ataa te Atua a bon riki n ai arona, ao a maiuakina aron maiuna, are bon te maiu ae akea tokina.’ … E reireiniia ana taan reirei ake I-Nibwaite: ‘Aekan aomata raa ngkami? E koaua ae I tuangngkami, kam na riki n ai arou’ (3 Nibwaai 27:27)” (“Our Lord and Savior,” Ensign, Nobembwa 1993, 7).
Susan W. Tanner, beretitenti ni kabuta ngkoa n te Bootaki n Ataeinaine: “Tinam ke tamam a [karaoa] ae a [kauringko] bwa ko na ‘uringnga … bwa ngkoe natin te Atua ao ko riai ni karaoa ae riai’[?] Mitinare a bwaina te baeti (badge) bwa te kauring ae teimatoa … ni bwaini kunnikai aika mano iai rabwataia ao a taraa raoi, ni bwaina te karinerine nakoia aomata, ao ni kekeiaki ni karekea tein taraakin Kristo i moaia… . Man te berita, ngaira naba ti a tia ni katoka aran Kristo i aora. Ti riai n ururinga Arana n taai nako. N aron aei, ti kantaningaaki bwa ti na karaoi mwakuri aika a tau irouia natin Tamara are i Karawa, are, n aron taraakina, e kanakoira nako aon te aba ma te kauring ‘Uringnga bwa antai ngkoe!’” (“Natin Tamara are i Karawa aika Aine,” Riaona, Meei 2007, 107).
Bwaai riki tabeua ibukin te kamatebwai, tara Iobi 7:17; Joseph Smith—History 1:17.