Ko Tangiria n Nakon te Moanrinan ma Ngai?

Ni kabane ake n te koraki teniua a bon kukurei, n ikotaki ma ngai, bwa Christy bon te kabanea n rabakau n te tabo n takakaro i aon te biti ni minomino ao n tietie. Akea temanna ae kona n baiti n tamatama ke ni karieta tietiena n aron ae kona Christy. Ao e bon konai ma n rooti naba aron waaki n takakaro ake tabeua. Ma te bwai ae moan te kakawaki irou ibukin Christy bwa neiei ao Ngai bon raao aika moan te tamaroa. N te bong teuana n tain te motirawa ae uarereke n te reirei, ao e a tuangai Christy, “Ko tangiria n nakon te Moanrinan ma ngai?”

I bon tuai man ongo taekan te Moanrinan mai mwaaina. I a titirakinna “Tera te bwai anne?”.

E a kamataata Christy, “Te Moanrinan bon te bwai ae okoro n au ekaretia, ae ti ibukiia ataei. Ngkana ko iria, ko na anenei kuuna, n reke raoraom aika boou, n reiakin bwaai aika boou, ao ko na kona ni kaitibo ma au tia reirei n te Moanrinan, ae bon moan te rangi, n tamaroa.”

“N tamaroa n aiaron Nei Palmer?” I titiraki, ni kakoaua bwa akea te tia reirei ae kona n tamaroa riki nakon ara tia reirei n te koraki-teniua n reirei.

E ngare Christy. “Eng, neiei e tamaroa n aiaron Nei Palmer.”

Imwin te reirei ao I biri ni karokoa te auti n titirakina tinau ngkana I kona n nakon te Moanrinan. Ma tinau e aki rangi ni kukurei n te iango anne n ai arou. E taku “I kan ataa riki rongorongona,”. “Tera aran ana aro Christy?”

E raoiroi, anne bon te titiraki ae matoatoa ae ko na waaki mai iai ibukina bwa, ngke aron ae I tuanga Tinau, “I bon aki uringa arana. Bon te ara ae abwabwaki ao I bon tuai man ongongo mai mwaaina.” I kona n ataia man moamoan Tinau n raraoma bwa bon te bwai ae bure taekinana.

“Taninga moa. N na wetea Christy ngkai naba!” I biri nakon te tareboon ao n orea ana nambwa Christy imwain ae na manga taekina te bwai teuana Tinau.

Uoua tangin te tareboon imwain ae tabekia Christy. “Hello?”

“Christy!” I takarua. “Tera ngkoa aran am ekaretia?” I kakauongo raoi ao ma n taku imwina, “Tinau, aran ana ekaretia Christy bon Ana Ekaretia Iesu Kristo Ibukiia Aika Itiaki ni Boong Aika Kaitira.” Ngke e aki toki moamoan Tinau n raraoma, I a ataia ae I kainnanoa te ibuobuoki. I a taku iaon te tareboon, “Christy, n am iango e na kona tinam n taetae nakon tinau ibukin te Moanrinan?”

I taku bwa Christy e ongo aron te bwanaa ni ingainga ngkai e kona n roko tinana nakon te tareboon inanon ti nimaua te teekan. A uaia tinara n taetae n aroia raao aika a kaman kakaitibo. Imwiina e taku tinau nakon tinan Christy bwa, eng, I a kona n nakon te Moanrinan!

Ngke I a roko n te Moanrinan n te moan tai, ai bon aron are e taekin ni kabane Christy ao e mwaiti riki. E bon koaua Christy—ara tia reirei n te Moanrinan e bon rangi, n tamaroa. Ai bon aekakin raoi tamaroan Nei Palmer. I bon anganaki naba oin au boki uarereke ibukin onimakinan te Atua.

I a nakon mweengau n te bong anne ao ni kaota au boki nakon Tinau ao n taekina ni kabane aron te Moanrinan. I bon anenea naba te “Hello Song” (Children’s Songbook, 260) nakoina ao uoman tariu, are a bon aneneia ataei ni kabane nakoiu. Ngke e karaua Tinau ni kamatebwaia tamnein Iesu Kristo i aon moan baan au boki ao ni wareki tabeua baana inanona, e a bon karaurau, man iango n aron taraan moamoana. Imwina e taku bwa I a kona n nakon te Moanrinan ma Christy ni katoa wiiki ngkana I tangiria n nako.

I bon tangiria raoi n nako, ma I bon ti nako ti tabeua riki te tai i mwiin anne ibukina bwa e a motirawa naba ara reirei ao ara utu a nako ni motirawa ibukin tain te tiamwa. Ti kaona ara kaa ao ti buti mai California ni karokoa ana tabo ni man ao n ununiki tibu te aine iaon Illinois.

Inanon ara kauoua ni bong ni mwananga, inanon ara tai ni buti nako Utah, ti noori kairababa i rarikin te kawai aika bubura ma aran ana ekaretia Christy iaoia. A bon kaoia aomata bwa a na noora te bwai teuana ae arana aia tienta irua iaon Salt Lake City. E taku Tinau bwa e kan toki ikekei bwa e kan kakaea riki taekan te Ekaretia.

Ngke ti a nakonako rinanon mataroan aia tienta irua ao ti a bon kamauraki iroun te mwaane ae rangi ni moamoa aomata ae bwaina te beeba ae iai arana i aona. Inanon ana tai ni kaneweabaira, a rangi ni mwaiti ana titiraki Tinau, ao te mwaane arei e tara n rangi ni kukurei ni kaekai titiraki ni kabane. Ngke e a toki te raun ni mamataku, e a korea arana ao ana tabo ni maeka Tinau inanon te boki ibukiia irua ao ni kaeta te taeka ae “ENG” i rarikina, are nanona bwa e kan karekei riki rongorongo ibukin te Ekaretia.

Ngke ti a okira mweengara man ara motirawa, uoman ataeinimwaane ae a taku bwa ngaia bon unimwaane ake a roko nakon ara auti. A tuangira bwa ngaiia mitinare ake a karekea te rongorongo man aia tienta irua i Salt Lake City bwa Tinau e kan karekei riki rongorongo ibukin te Ekaretia. A taku bwa a bon tangiria ni kan reireinia kaain ara utu ni kaineti ma ana babaire Tamara are i Karawa ao ana euangkerio Iesu Kristo. Ikanne are a bon moanna n reireinaki iai ara utu irouia mitinare.

Te moan tai ngke ti uaia n nakon te taromauri, I tuangia au utu bwa a na taraia raoi bwa a na booti baia ngkana ti a rinnako n te umwantabu. I a tia n reiakinna n te Moanrinan bwa aio te kawai ni kaota aron te karinerine. Ti bon bane ni kataia ni booti baira, ma a bon mwaiti aomata ake a nakoira man kamaurira ao ni butimwaira nakon te taromauri ngaia are a aki tei maan baira ni bootaki.

N tokin ara reirei ma mitinare, a titirakina Tinau ngkana e tangiria ni bwabetitoaki man riki bwa kaain Ana Ekaretia Iesu Kristo Ibukiia Aika Itiaki ni Boong aika Kaitira. E taku tinau bwa e kan tataro moa ibukina. Te ingabong are imwina n te aoa 6:00 n te ingabong, e a tarebonia mitinare Tinau ao n tuangia ae e a tia n tataro n te tairiki arei ibukin bwabetitoakina ao ni karekea te kaeka ae eng! Ngai ma tariu ti tuangiia naba ae ti tangiria ni bwabetitoaki.

I bon teimatoa n ururinga arou n tei inanon te ran n te tabo ni bwabetito. I bon bwainai n te mainaina ao n namakina te kukurei i nanou ao n tangiria n takarua ni ngare n te tai arei. I tararake ma n noora Tinau n tang ma ranin matana ni kukurei. Imwiina I tara Christy, are ngaia ae e bon rangi ni kukurei naba n ai arou ibukina bwa e bon moanaki mai rouna ngke e tuangai, “Ko tangiria n nakon te Moanrinan ma ngai?”