Ana Mwane Ae Uarereke te Ataeinimwaane
I baireia ngai ma toau ni mitinare bwa ti na bairea te tabo ae ti na kakaea ngke ti a roko naba iroun temanna te aine ae tabe n rin ni mweengana. Ti koaua raoi bwa e a okira mweengana bwa e na katauraoa ana katawanou ibukina bwa taabo ni maeka i tinanikun Buenos Aires, Argentina, a motirawa moa ibukin te katawanou. Imwaain ae I ataia, e angareirei toau nakoina iaon taekan moan tuua n te euangkerio, ao I kakoaua koauana. E kukurei n ara rongorongo Narda ao e kaoiira bwa ti na manga okiria n te wiiki are imwiina riki.
Ngke ti a roko ni mweengan Narda, a bane n tekateka natina aika niman ni katobibia te taibora n tataningaira. Akea mai rouia kaaro ae karekea te mwakuri ae teimatoa taina, ao ti rangi n nanokaawaki ibukiia ngkai ti a ataia bwa e kuri n aki tau aroia ni maiu. Akea burooan mweengaia ke te ran ae maiu, ao taian o a matabwara neeranakiia. Bon tii aia bwai are a na kaabueiia iai bon te titoobu ae uarereke ae ti teaina wiikina.
E ngae ngke e kananoanga aron te utu, a boni kaubwai n tangiran reiakinan riki taekan te Atua. E tangira ao e kan kamatebwaia te Baibara Narda ao e tangiriia natina bwa a na karekea naba aaia ae ti te arona naba. Cristian ae tebwi ma uoua ana ririki e kukurei ni kakauongo nakon aia reirei mitinare. Imwiin ae ti katuka teuana Ana Boki Moomon iroun te utu, e ingainga ni wareki tabeua karaki mai moana. E kan ongora naba buun Narda, ma e maama ao e ongora man te ruu ni matu.
Ibukin aia kangaanga n te mwane, ti taona moa te reireiia iaon taekan te mwane n aki mamatam ao te kabwianibwai. Ti tangiriia bwa a na karekea aia koaua ae matoatoa iroun Iesu Kristo ao Kaokan Bwaai imwaain ae ti kaoti moan tuua ake a na kainnanoa riki te onimaki. Ma ibukin ae ataei aika a ikawai riki a tia ni moana aia wareware n Ana Boki Moomon ao ni kaei taromauri, iai aia titiraki ake ti kainnanoaki bwa ti na kaekai.
“Titita,” e taku Cristian, “n te taromauri ao n Ana Boki Moomon, aomata ni kabane a taetae i aon te aki mamatam. Tera nanon te aki mamatam?” Ti reirei ao ti kakoaua kakaawakin te aki mamatam ao imwiina ti kainabwabu n tataro bwa te utu aei e na butimwaea te tua aio.
E tibwaua ana koaua nakoira Cristian imwiina. “N te bong teuana, e anganai au mwane tinau bwa N na kabooa au kanre. Ngke I tabe n nakonako nakon te titoa, I uringa ami reirei iaon te aki mamatam, ao I tangiria ni kataia. Ma iai ti teutana te mwane irou. E ngae n anne I baireia bwa N na aki mamatam ao I kabongana te mwane anne bwa au anga mwane.”
Narda e kabwara nanon Cristian man te anga nako te mwaiti ae uarereke, ma e bon nanomatoa. E tangiria ni maiuakina ni kabane ana tua te Atua ao n anga are e kona n anga. Teuana te wiiki imwiina ngaia ma uoman mai buakoia tarina a bwabetitoaki. A kaaina te Ekaretia ana karo n te ririki are imwiina.
Ngkai n te tai are I taku iai bwa I aki kona n anga au mwane n aki mamatam, I uringa Cristian ma ana kakaonimaki, ao I ataia bwa iai ae bati irou ae tau bwa N na anga. Ana anga mwane e kauringai te aine temanna ae aki kaubwai ae mate buuna (tara Mareko 12:42–44). E bon rangi ni uarereke, ma e anga Cristian ibukina bwa e tangira te Atua ma nanona ni koaua ao e tangiria n ongeaba.