E Bon Kawara Raoi America Iesu?

N 1960 I kaitibo ma te kairake ni mwaane n te bootaki ae e tuangai bwa e a tia Iesu Kristo ni kawara America imwiin Manga Utina. I kunea bwa e kamiimi te iango ao I tangiria ni kan ataa raoi riki koauana, ai ngaia are I a moana au ukeuke n taabo n tango boki ao n titiraki aekan bootaki n aro nako n te kaawa are I maeka iai ae San Miguel, El Salvador.

I kakae i nanon te maan ae kaania teniua te ririki ao akea te bwai ae I kunea. Ngke I taekina ae I a tia n ongo rokon Kristo i America nakoia taan kairiiri n aro aika a kakaokoro, a tuangai bwa I a tia ni keweaki. Ibukina bwa akea te rongorongo ae reke irou n au kakae, n tokina I a kakoauaia bwa a koaua.

N te bong teuana a roko n au auti uoman mitinare man Ana Ekaretia Iesu Kristo Ibukiia Aika Itiaki Ni Boong Aika Kaitira ao n taku bwa iai aia rongorongo ae kakaawaki ibukin au utu. I waekoa n uringa au titiraki are mai mwaaina ao I titirakiniia, “Kam ataia bwa e roko Iesu Kristo i America?”

Temanna mai rouia ataeinimwaane e taku, “Ti kakoaua n anne.”

N te tai naba anne I namakina te kukurei ae korakora n au iango ao i nanou, ao I titiraki, “Kam kanga n ata anne?”

E kaotinakoa te boki man ana baeki ao e taku, “Ti ataia bwa e roko Kristo ikai i bukin te boki aei, Ana Boki Moomon.”

E karika au kangaanga te bwai are a reireinai mitinare n te moan marooro, ao I nanououa n rongorongon ana kaotioti te Burabeti Iotebwa Timiti iroun te Tama ao te Nati. Ma e ngae n anne, e kaingaingaai Ana Boki Moomon, ao a teimatoa mitinare n reireiai taian reirei.

Te bwakantaai teuana, a titirakinai tenaan mitinare, “Ko a tia n tataro ni kakaea raoi ngkana e koaua te bwai are ti reireiniko?”

I tuangiia ae I a tia ma I tuai ma ni karekea te kaeka.

“Ko riai n tataro ma nanom ae koaua,” a taku.

I a tia ni wareka Ana Boki Moomon i nanon tabeua tairiki ao n tia ni wareka taekan ao ni kakoauaa kaotin Iesu Kristo nakoia Nibwaite, ma I teimatoa n tuai ma ni butimwaea ana kaotioti Iotebwa Timiti. E rangi ni korakora kurakaiu ni kekeiaki.

Te tairiki teuana I katorobubua n tingai ao I taekin ni kabane au namakin nakon te Atua. I Tuangnga bwa I tangiria n ataia ngkana E a bon tia ni kaoti Ngaia nakon Iotebwa Timiti. Ngkana E a tia, I berita nako Ina bwa N na bwabetitoaki nakon te Ekaretia ao ni beku Ibukina ni kabane maiu.

Ngke I moantaai n uti n te ingabong are i mwiina, e roko te kaeka nakoiu rinanon te Tamnei ae Raoiroi. I a kona ni iangoia raoi, ao e kaonaki nanou n te rau. Man te tai anne, bon akea riki te nano kokoraki i rou bwa Iotebwa Timiti bon ana burabeti te Atua ni koaua, ao bwa Ana Boki Moomon bon kakoauan taekan Iesu Kristo, ao bwa Iesu bon ara Tia Kamaiu ao ara Tia Kabooira.

I ataia bwa e roko Kristo nakoia kaain America imwiin Manga Utina. E kukurei tamneiu n te atatai ae tamaroa aei, n reiakinaki ma te koaua ni mwaakan te Tamnei ae Raoiroi.

E kabwarabwara te tari bwa ngke e tabe ni katauraoi ibukin te taromauri n te Taabati, e rinanon te bwai ae kanga titebo ma te wirikiriki ae okoro bwa e na uota te tukuruturaiwa nakon te taromauri.