N Nuni Baina Ni Kiba

Imwiin banen te angareirei iaon te moan kiba i Phoenix, Arizona, I anga au kakoaua imwiin tabeua au aoa ni kiba n te kaai temanna bwa N na karaoa au moan kiba n te kaai temanna nakon iteran te aba are teuana. Aei e na bon kainnanoa te kawai ae uoua aoana mai Phoenix nako Tucson ao n oki nako Phoenix.

I rangi ni kukurei ni ingainga nakon te kibakiba n tii ngai 10,000 te buuti (3,000 m) i etan te aba ma ni matakuakini tamaroan naang, maunga, kamwanono, ao te rereua, I aki bati ni iangoa aki taun au atatai ao kangaanga aika a kona n riki ake a tataningaai.

I tuoa kanoan te bong, ribootina babairean kibau, ao I anaa te reerio, kambwati, ao bwaai ni mwakuri ibukin te kiba. N aron ae e bwabwainaki ni kaetietin te mwaneka ni kiba aio, e bon aki tau au kataneiai ni kabonganaan bwaai ni mwakuri aika boou. Ma te waanikiba ae mane riki are N na kiba iai bon akea iai bwaai ni mwakuri aika a kangaanga aroia are e na aki kona iai te bwairati n noori aaba ake a katoobibia.

E bon nako nanou teutana ngke I a mwemwerake n tii ngai i nanon au waanikiba ae babobo ae tii teuana intinna, ma e bon nakoraoi te kiba mai Phoenix nako Tucson. I bon kakatonga ma konabwaiu ae boou ni kiba.

I kimwareirei ao n nanomatoa bwa ai tii 120 te maire (190 km) n nako, I mwemwerake mai Tucson ibukin kaean Phoenix n te bwakantaai anne. Ma e ngae n anne, imwiin ae I mena i nanon te eea, I a rinanon karekaren te ang ae korakora n akea kaantaningakina are e a karika te kangaanga n taua aron rietan au waanikiba. N te tai ae waekoa ao e a katobibiai te angibuaka ae taurouro, ao I aki kona n noori bwaai. N tabatoutou man te iterana nakon iterana, I a kabua tauan arona ao I a moanna ni kamangaoaki ao ni maaku, n ataia bwa I a rangi ni kaan nakon rinanin maungan Catalina.

Inanon te maaku ae korakora I a iangoa aron maiu. I bon kabae ao N na mare n te namwakaina are imwiina n te Mesa Arizona Tembora. I a tia ni beku bwa te mitinare ae bwanin ana tai. I a tia n taainako ni kataia n ongeaba nakon tuua ao ni kakauongo nakon ana wirikiriki te Tamnei ae Raoiroi. Ngkana I kainnanoa te kairiiri mai roun te Atua n te taina, ao bon n te tai aei. Ma te kuri ni bwarannano, I karaurau n tataro. E waekoa ni wirikiriki te Tamnei nakoiu, “Onimakina am reerio, am kambwati, ao bwaai ni mwakuri akana i matam, ao ruo rikaaki ni karinanoa rietam.”

I waekoa n ruo rikaaki tabe bubua te miita. E teimatoa n aki itiaki te taratara, ma I kona ni kinai kawai aika abwabwaki ao kawain turein ake i nanoaau. Ni kabonganaan au bwai ni mwakuri ao ni iriiran kanikinaean taian tia, I a bon kona n ruo n te aba n te marae ni waanikiba i Phoenix imwiin rinanoan uoua te aoa n raraoma.

N na rangi ni kakaitau n taai nako ibukin ana wirikiriki te Tamnei ae Raoiroi ao te berita are n Taian Areru: “N na kamaiuai n nuni baim ni kiba” (Taian Areru 57:1).