Te I-Tamaria ma te Tukuruuturaiwa

I rangi n tabetabe ni ikoikoti au bwai imwiin te angareirei n aia reirei Ataeinaine aika 14-15 aia ririki, ao kainabau, Garry, e tei mai buki n te ruu n tautaua natira te mwaane ae teuana ana ririki. Natira ae teniua ana ririki, Zach, e waekoa n rirarikira nakon te auti ae bubura ae onrake irouia aomata ao n ririmwiin temanna te aomata ni kaineta mataroan te autinibootaki. Ibukina bwa ngai ma kainnabau ti taku bwa e mena Zach iroun are temanna, e ana tabeua te miniti ataakin ae e a bua.

Ngke ti a tibwa ataia ae e a bua, e a kaoti Zach i tabon te auti ae bubura. Ma iai te bwai teuana ae e a riki. E a uraura tabana, a bwaro ranin matana rikaaki i aon ubuna, ao e koona baina are te atai. Ara bitiobi, are e kairia nakoira, e tara n raraoma. I waekoa n namakina ae I kaairua. E a tia ni ikoaki natiu te mwaane, ao I aki mena ikekei bwa N na buokia.

E a kaman ongo te bitiobi tangin Zach n taenoa ao e kawaekoa ni buokia. E waekoa n ataaki ana kangaanga Zach, ma katokana e bon tuai n reke. E a tia n tena tabonibaina i marenan te mataroa ae tinebu ma mataniwiina. Kaukan ao kainan te mataroa e a kakorakora riki te ikoaki; tiotion te mataroa e a katenaa riki tabonibaina ao ni burita baina, ni karekea te maraki ae korakora.

Ngke a kataia te bitiobi ao te taanga n te uoote ni iangoia bwa e na kanga n nako tabonibain Zach, te tari temanna man te uoote are teuana ae e boowi n ara kateitei e noora te bwai ae riki. E ana te tukuruturaiwa man ana buua ao e karinna n te mwaawa i marenan te mataroa ao mataniwiina. Imwiina, e kabongana te tukuruturaiwa ni kaumwa, e kawarebwea te bwangabwanga ae tau ni kainaomata iai Zach.

Ibuakon te kabebeteaki, e kabwarabwara te tari bwa ngke e tabe ni katauraoia ibukin te taromauri n te Taabati n te ingabong anne, e rinanon te bwai ae kanga titebo ma te wirikiriki ae okoro bwa e na uota te tukuruturaiwa nakon te taromauri. E rangi ni korakora ao ni mataata n ana iango ai ngaia are e a karinnakoa te bwai ni mwakuri nako nanon buuan ana kawaerake mwarairai.

Te aekaki ni mwakuri ni ibuobuoki ae e riki man te kairiiri mai karawa e anganai namakinan ana tangira te Atua ao e kaona nanou n te kakaitau. Tamara are i Karawa e bon tararua natiu te mwaane ae teniua ana ririki ao e wirikiriki nakon te tari ae tamaroa bwa e na kaeka.