Bwaintituaraoi Ibukin Te Euangkerio

Te Kaonobong bon te bong ni mwaakete ni kabutaa te aonaaba. i aon Ghana, Ecuador, ao aban Philippine, a uoti aia bwai nako aomata ibukin te kabobwai nakon te kaawa ae bubura. A taetae ma naake a kaitibo ma ngaia iaon te kawai. I buakoia naakanne bon Aomata Aika Itiaki ni Bong Aika Kaitira. Mwaitin aia taetae bon titebo ma ake ko na ongo n taabo riki tabeua n te aonaaba. Ma e na iai te kaokoro irouia Aomata Aika Itiaki ni Bong Aika Kaitira. Ko kona n noora te kaokoro i nanon mataia n aron ae mwaiti n aia taeka. A kakauongo raoi ma ana taratara temanna ae mwamwannano.

Ngkana e na raka te marooro nakon tabeua miniti, e na kaineti nakon bwaai ake a uaia ni mamate nanoia iai. A na taekin bwaai ake a onimakinna ae na uota te kakukurei ao ae na uota te kananokawaaki. N tabetai ao a na titirakinaki Aomata aika Itiaki ni Boong aika Kaitira, “E aera ngkai ko a rangi n rau?” Ao imwiina e na roko te kaeka ae maraara. Tao e na kona n ae taekan Tamara are i Karawa ao Natina, Iesu Kristo, ni kaoti nakon te mwaane ae kairake ae Iotebwa Timiti. E na kona n ae ibukin ana mwakuri ni ibuobuoki te Tia Kamaiu ae mangauti, n aron ae taekinaki i nanon Ana Boki Moomon.

Tao ko kona n titiraki ni kangai, “N na kanga ni karaoa anne? N na kanga n riki n tamaroa man tibwauaan au onimaki?”

I a tia ni karaua ni kamatebwaia ao n tataro mwaaka ibukiia tabeman ake a kakaonimaki ao taan kakoaua aika nakoraoi ibukin te Tia Kamaiu ao Ana Ekaretia. Bon akea teuana te banna n te bwai are a karaoia. Tabeman aki toki ni uouota Ana Boki Moomon n angaanga nako. Tabeman a bairea te tai ibukin temanna are na reireinaki irouia mitinare. A tia n tataro n tatabemania bwa a na ataa ae a na karaoia.

Ni karaoa are ti kantaningaaki bwa ti na karaoia, ti na kona n riki n ai aroia i nanon ti uoua kawai. Te moan, a namakinna bwa ngaia bon natin Tamara are i Karawa ae tatangiriia. Ibukin anne, a waekoa n tan nako Ina ao n tataro n taai nako. Te kauoua, naake a tataekina te euangkerio n akea te kangaanga bon taan iriira Iesu Kristo ni koaua. E bon rangi ni kakawaki irouia bwa tera nanon te euangkerio nakon maiuiia. Ururingan te bwaintituaraoi ake a tia ni karekei e karekea te ingainga n nano ibukiia tabeman bwa a na karekei naba. A tia n namakina ana tangira te Tia Kamaiu.

Tataro ibukin karekean te tai ni kaitibo ma aomata ake a namakinna bwa iai te bwai teuana ae kona ni katamaroaki riki i nanon maiuia. Tataro bwa kam na ataa ae kam na riai ni karaoia ni buokiia. A na kaekaaki ami tataro. Kam na kaitibo ma aomata ake a katauraoaki iroun te Uea. Ao kam na namakini ngkami ni kaan riki nakon Tamara are i Karawa, n ataakin ae kam a tia ni karaoa are E bubuti ngkami, ibukina bwa E tangiri ngkami ao E onimakini ngkami.