Natin te Atua aika Mwaane ao Aine

I a tia ni bungiaki irouia kaaro aika tamaroa. Tamau ao tinau a maiuakin tuua aika kakawaki ibukin te kokoaua ao te etieti ake e reirei te Ekaretia, ma a bon aki kakaonimaki n te Ekaretia. E ngae n anne, a nanakon te Moanrinan raoraou, ngaia are I bon nako naba. I namakina te kukurei ikekei ao I aki tangiria ni kabua au tai n roko iai.

E a riki te Moanrinan bwa au utu n te Ekaretia. I nakon te bootaki n toa ni katoa wiiki ao man tekateka ma raoraou n te Moanrinan. I aki ataa raoi nanon te bootaki n toa, ma I ataia bwa I karekea te namakin ae okoro ngkana I taua te toa. I ataa raoi te namakin ibukin te berita ae tabu mwaain ae I reiakina te taeka anne.

Ngke ai 12 au ririki, au kooram n te Nakoanibonga n te Aaron a riki bwa au kauoua n utu n te Ekaretia. I namakina te tangira ae korakora ao te karinerine ibukin te nakoanibonga. Inanon au tai ni beretitenti n te kooram n riikan, I kairi bootakin te kooram, ao ngkana e katabuaki te riikan ae boou, I butimwaia n taetae ae uarereke. I ururinga taekinan, “Bon aio te nakoanibonga ibukin te Atua. Ko riai ni karinea.”

Imwin banen au reirei n te kauarinan I nakon te kataneiai i bukin te bonomwi n te taanga ni buaka. E anganai tibwangau au mataniwi n aobitia bwa N na riki bwa te aobitia ni kairiiri n ana taanga ni buaka te U.S. E rangi n akoi ao e bubura naba ma n tikiraoi taraana. E bubutimwaeaki n taai nako irouia aomata. I titirakinna ngkana I kona n okira mweengau ao ni iangoia riki.

I tataro n te tairiki arei, ao e a roko iangoan te tataro ni bwabetito ae e kuneaki n te Doctrine and Covenants 20:73: “N tia n anganaki te kariaiakaki mairoun Iesu Kristo, I bwabetitoiko n aran te Tama, ao te Nati, ao te Tamnei ae Raoiroi.”

I oki rikaaki n te ingabong are imwina ao n tuanga au mataniwi n aobitia bwa I a tia ni baireia bwa N na butimwaea te kariaiakaki—ma anne are N na kariaiakaki iai iroun Tamara are i Karawa ao Natina, Iesu Kristo. I kamataata bwa N nang nako ni mwakuri ni mitinare i bukin au ekaretia.

Te namakin ibukin kaekaan te tataro arei e bon tamaroa, ao I namakina okiokina nakoiu ngkana I tataro ibukin babaire aika kakawaki. E tara n ae I a kaman ataia ae Tamara are i Karawa ao Iesu Kristo a bon ataai ao a tangirai. I riai ni kaman moana rairakiu ngke I iriira te Moanrinan ao man namakina te Tamnei ikekei. E reitinako i nanon au kooram n te Nakoanibonga n te Aaron ao i nanon au mwakuri ni mitinare. E bon reitinako naba n te bong aei.

Ngaira ni kabane bon naati mwaane ao aine iroun Tamara are i Karawa. E aki kona ni mwaninga aei, ma n tabetai ngaira ti mwaninga. Ai ngaia are E anganira te moan tua ibukin te onimaki bwa e na buokira n ururingnga. E anganira te bwaintituaraoi ibukin te rabakau Tamara are i Karawa, bwa e na buokiira ni karikirakea ara onimaki i Rouna. Ngke I a tara aron maiu ngkoa, I bon kakaitau ibukin taian rabakau ake a tia ni buokai ni karikirakea au onimaki.

Kukurei n te rabakau are E na anganiko Tamara are i Karawa. Reiakin mai iai bwaai ake E tangiriko bwa ko na atai. Tamara are i Karawa E anganira n tatabemanira nako taian rabakau ake a na buokira ni karikirakei ara onimaki Irouna ao Natina.

Ngkana arona bwa tabeua rabakaum a kananokawaaki, taiaoka n ururingnga bwa ngkoe bon te nati te mwaane ao te aine iroun Tamara are i Karawa ao E bon tangiriko. Bon aio te atinroo ni koaua are e aki kona ni kanakoaki. N aki toki! Bon akea tokina ao bon mwakoron te babaire ni kamaiu ae matoatoa. Ko riai n taua ni kamatoako n aki tabeakina riki te bwai teuana.