Bain te Atua ni Kairiiri

Ngke I tabe ni ikawai rake, e bwenaua Germany. Te itera maeao, are I maeka iai, e inaomata ao e inaomata ana tautaeka ao e rikirake kaubwaina. Te itera mainiku e tautaekanaki n te waaki ni komuniti are e iraorao ma te Soviet Union. Iai te tia ae kaokoroa te itera mainiki ma maeao, are kanikinaeaki n taian oo, bwaabu uaea, taabo aika taunaki iai boom, taian taua aika teiakinaki irouia tautia ma aia mitinikan. A bae n te itera mainiku, i akuun te tia, tabeman Aomata Aika Itiaki ni Boong Aika Kaitira aika kakaonimaki ao a rangi ni kantaninga inaomataia n nebonebo ao ibukin kakabwaia n te tembora.

Ngaira kaain te Ekaretia ti ataia bwa n te bong teuana—ibukin kakoroan nanon te taetae ni burabeti—e na taetaekinaki te euangkerio n aaba nako (tara Mataio 24:14). Ma ibukina bwa a tara n rangi ni mwaaka taanga ni buaka ao e matoatoa nanon taian tautaeka, ti maakina ae ti te anga ae e na kona n roko te bitaki i Germany Mainiku, Poland, ao aaba riki tabeua ake a mena i aan ana tautaeka te Soviet bon man te bobuaka ae e korakora n aban te aonaaba ke kangaanga riki tabeua n te aonaaba.

E atai bwaai ni kabane te Uea. Beretitenti Spencer W. Kimball (1895–1985) e kakaewenakoia kaain te Ekaretia ni kabane bwa a na tataro bwa a na kaukaki tiia. E bon koaua bwa a karaurau n riki taian kakai. Te tautaeka i Germany Mainiku, e kariaia katean te tembora i abana, ao e katabuaki te Freiberg Germany Tembora n te 1985. Imwiina n te 1988, imwiin aia bubuti taan kairiiri n te Ekaretia, te tautaeka e kariaia mitinare bwa a na rin n abana ao mitinare mai Germany Mainiku, bwa a na beku i tinanikun abaia. N Nobembwa 1989 te tautaeka i Germany Mainiku, e kauka te oo are te Oon Berlin, ao tabeua te tai imwiina e a uruakaki. E bwaka te tautaeka, ao e katiteuanaaki Germany i aan te tautaeka ae inaomata.

Taan korea rongorongon ngkoa a karinani bukin rikin waaki aika korakora aikai. Ma bon akea te nanokokoraki n au iango bwa i akuun bwaai ni kabane, te Uea e bon kairiia aaba aikai nakon nneia are a kaman baireaki bwa e aonga ni kakoroaki nanon Ana kaantaninga.

Bon titebo te Atua are e nano iroum ao e na kairiko ao ni barongaa maium ibukin oin kakabwaiakim ao ibukin kakabwaiakiia tabeman—ngkana ko kaoa bwa E na karaoia. I ataia ibukina bwa e a tia ni barongaa maiu ao ni kawakina Ana berita are ngkana I karimoa ni bwaai, E na kakabwaiaai ma bwaai ni kabane ake I kainnanoi. I tia n noora aio bwa e riki i nanon maiu n taai aika mwaiti.

Ara utu bon ti ngaia Aomata Aika Itiaki ni Boong Aika Kaitira n ara kaawa ae 60,000 kaaina. Ti karaoa ara kabanea ni konaa ni maiuakina te euangkerio. I namakina te Tamnei n angiin te tai, ao I aki nanokokoraki ni koauan te Ekaretia. Ma ngke I mwakuri n te taanga ni buaka, e korakora nanou ni kan ata koauan Ana Boki Moomon i bon ibukiu. Ngaia are I a nakon te tabo ae akea kaaina ao I karaoa are taekinaki n ana reirei Ana Boki Moomon (tara Moronaai 10:4–5). I bubutia te Atua. Ao I karekea te kakoaua—te namakin mai iroun te Tamnei ae abue, e karau nano, te rau, ao te kukurei ae korakora ae I aki kona ni mwanuokinna.

Imwiin banen au mwakuri n te taanga ni buaka, I a reitanako au reirei n tararuan te taanga ni buaka n te tautaeka i Germany Maeao, E bon kangaanga te mwakuri, ma I karekea au atatai ae bati iaon te kataumwane, te bwaibwai n te aba ao kateitei, mwakuri aika irekereke ma te tua, ao a mwaiti riki. Iai naba nakoau are I beku iai n te beretitentii n te mwakoro. N aia tai ni kamatebwai raou n reirei n te Taabati, ao ngai I tabe ni karaoa nanon katabeau n te Ekaretia ao I kawaria au utu. E boni matoatoa, ma ana berita te Uea a bon koaua, ao ko kona ni mwioko iai. E bon nakoraoi au kekeiaki n ai aroia naba raou n reirei.

Ngke e a bane au reirei, I mwakuri ibukin te tautaeka i nanon waniua te ririki. E kamatoaki mwakuriu i nanon maiu ao au mwane n ritaea ae tamaroa. E tara n ae e karauaaki ni kamweraoaki maiu ibukiu. Imwiina te Bitioburiki ae Tararua n te Ekaretia e titirakinai ngkana I kukurei ni mwaing nako Frankfurt ao ni mwakuri bwa te tia tei n te aono i Europe. N na riai ni bubai man au mwakuri ae tia ni kamatoaki ao au mwane n ritaea nakon taai aika a na roko. Ma ngke ti tataro ibukina ngai ma buu, ti namakinna bwa bon te bwai ae ti riai ni karaoia. Man te tai arei, e bitaki aron maiu ma e rangi ni kakabwaiaaki.

Au kataneiai n te tautaeka e a tia ni katauraoai ibukin bwaai aika mwaiti ake I karaoi ni mwiokoau ae boou. Butimwaean te mwakuri aio e bon karekea au tai ni beku i mwiina bwa te beretitenti n te mition, te bwai ae N na aki kona ni karaoia ngke arona bwa I tiku ni mwakuri n te tautaeka.

I tibwauai bwaai aikai nakoimi ma te kakaitau ae bati ao I aki kamoaai iai ma I kaotia nakoimi bwa te Uea e na bon barongaa aron maium ibukin Ana kaantaninga ngkana ko anganna bwa E na karaoia. Ao mwiina bon kakabwaia aika korakora. I kona ni berita nakoimi bwa E aki ti kakabwaiako ni bwaai aika kakaawaki n aron am mwakuri i nanon maiu, ma ngkana ko nakoina n te tataro, E na kakabwaiako ni kataakim aika uarereke, ni katoa bong. E a mwaiti au tai n rinanon aio i nanon maiu.

I uringnga ngke I beku bwa te beretitenti n te mwaanga ao I tabe ni mwakuri i aon ara ribooti n te ririki ibukin te kabwianibwai. Bon te bong ae tikiraoi n tain te kamwaitoro, ao buu e tataningaai bwa ti na nako n nakonako. I bon tataneiai ni mwakuri ma te mwane ngke I mwakuri n te tautaeka, ngaia are e boni beebete karaoana irou. Ma ni katoa te tai are I kabaeranti taian ware, a bon aki eti. I a kaokiokia ni karaoia, ma e bon aki nakoraoi, ao I a moanna n ebu. I bubutia Tamara are i Karawa buokau.

Ngke I teirake imwiin au katorobubua, akea te bitaki ae I nooria. Ma I namakina te kairiiri bwa N na manga rinanon te mwakoro ae onoti ibukin beeba ni kakoaua i aon te bwakamwane. N taai akekei beeba ni kakoaua a kanimwaki n te bwai ni kanim bwa booki aika uarereke, ao n te tai aei I a kunea bwa uoua beeba ni kakoaua a bon nimba kanga taraan ae ti teuana. E a reke tokin te kangaanga.

Tao kataakim bon te bwai ae aki toki n riki n aron are e reke irou n te tai ae aki maan n nako. I kaboa te modem ae baiti (te bwai ni itoman ae kabongana rainin te tareboon) ibukin au kombiuta, ma ngke I a kanimwi mwiina n aron are e kaotaki, e aki mwakuri. I rinanon kaetieti ibukin buokan kakaean ao katokan te uruaki, ni manga moan kanimwi mwiina, ao I tarebonia te aobiti ni ibuobuoki n te tabo are e karaoaki iai, ma e bon aki naba mwakuri. E bon tuoaki naba n te titoa are I kaboa iai, ma akea te kangaanga ae kuneaki. Ngaia are I a uoti nakon mweengau. Ma n te tai aei I uringnga n tataro. Bon ti anne te bwai ae kaokoro ae I karaoia. N te tai aei ao e a nakoraoi te bwai ni mwakuri, ao e mwakuri ni karokoa ngkai.

Ngkai, tabeua bwaai aika riki a bon rootaki iai tenaan botanaomata. Tabeua a bon roota waakin maiu ae bwanin. Ao tabeua a bon uarereke ni kabotauaki ma korakoran bwaai tabeua. Ao bon anne te bwai ae I kan taekinna. Bon titebo te Atua are e taetae nakoia burabeti ao are biti aia waaki botanaomata ma are e kan taetae nakon nanom rinanon Tamneina. E na kaira waakin maium ao ni katamaroa riki arom nakon are ko kona ni karaoia ibukim. Ao e na buokiko ma kataakim n te bong koraki i nanon maium ngkana ko onimakinna ao ko mwioko Irouna.

E ataiko, E tangiriko, ao a bon koro bukin Ana berita.