Aio te Tai

Iai ana koaua Oksana ibukin Iesu Kristo, ma n te tai are a anganna raraona katooton Ana Boki Moomon ao e a tibwa reke iai ana koaua ibukin Ana euangkerio ae kaokaki.

“Ngke I wareka rongorongon Iesu Kristo ngke e taetae nakoia I-Nibwaite, e roko irou te namakin ae korakora, ao I ataia bwa e Tangirai. I tataro ao e reke au koaua bwa boni Ngaia au Tia Kamaiu ao Ana Boki Moomon e boni koaua,” e taku Oksana.

“I ataia bwa ngkana e raira Ana Boki Moomon Joseph Smith ao Ana Boki Moomon e boni koaua, boni ngaia raoi ana burabeti te Atua ao e a tia ni manga kaoka ana euangkerio Iesu Kristo,” e taku neiei.

A reireina ae mwaiti riki raraona i aon te euangkerio ibukina bwa akea mitinare i Khmel’nyts’kyy n te tai arei. E kamatebwaia te euangkerio i nanon aua te ririki ao e maiuakina tuana nakon ana kabanea ni kona, n tataro bwa a na roko mitinare.

N tokina, a roko ni Maati 2006. Oksana ao raraona ae Sasha Kubatov boni ngaia uoman aika moan bwabetitoaki i Khmel’nyts’kyy.

Ai tibwa 14 ana ririki Sasha ngke e anganaki Ana Boki Moomon iroun mwaanena ae ikawai riki, are e kaaina te Ekaretia n te kaawa teuana.

“A katuruturua te iango ae 14 au ririki, n aron Iotebwa Smith ngke e reke i rouna te Moan Kaotioti. E rangi ni kakabwaiaaki n rorona ae uarereke, ao ngai I kona naba ni kakabwaiaaki,” e taku teuaei

Ngaia are e a moana ana wareware. E wareware ni karokoa e roko ni mwakoron Itaia n te ka 2 Nibwaai, ao e a toki naba. E a manga wareka Ana Boki Moomon teuana te ririki imwiina, bwa kanga ai aron rongorongon ngkoa, akea nanona ni kan ataia bwa e koaua.

Ma ngke e wareka Ana Boki Moomon te kateniua n tai, e aki katuua ana iango Sasha i aon rongorongon ngkoa ma e katuua ana iango i aon ana mwakuri te Atua are a koreaki i nanona.

“Ngke I tabe ni warekia, I taku bwa e boni koaua, ma e tuai n reke au koaua ae matoatoa,” e kaotia teuaei. “I tangiria ni marooro ma mitinare.”

Ngke a roko mitinare aika mwaane tabeua te ririki imwiina, a bane ni kaekaaki ana titiraki ao a buokia ni katauraoia bwa e na bwabetitoaki ao ni kamatoaki.

“Ngke I ruo nako nanon te ran ni bwabetito, ao a bane ni bua au nanokokoraki, ao I ataia bwa Joseph Smith bon te burabeti ao e boni koaua te euangkerio,” e taku teuaei. “I aki maaku, e ngae ngke I ataia bwa e nang bitaki maiu man te tai arei.”

E a boni bitaki maiuna ngkai. Ngkai e tia reirei n te mweenga Sasha e a bon tabe n reiakina aron kakorakoraan te nakoanibonga are irouna ao ni beku n abanuean te Uea.

Imwaain koron teuana te ririki imwiin bwabetitoana ao Sasha e bwabetitoa tinana ao tibuna te mwaane. A bane kaain ana utu ni kaaina te Ekaretia ngkai, ao Sasha e rangi ni ingainga ni kan uota te euangkerio nakoia tabeman.

“I a katauraoi ibukin te mwakuri ni mitinare bwa I aonga ni kona n tataekina te euangkerio ao ni uota temanna riki nakon te Atua,” e taku. “E riai ni waaki nako Ana mwakuri.”

Akea ana kaantaninga Misha Sukonosov bwa irakin taian kiraati n te Ingiriti irouia mitinare i Chernihivnever e na kairia nakon Ana euangkerio Iesu Kristo ae kaokaki. Ma e bitaki anne tabeua te namwakaina imwiin irirakin taian kiraati.

E tatangira te tamnei are e namakinna Misha ngkana a reireinna mitinare te Ingiriti. Ao n tokina ngke e a butimwaea aia kakao bwa e na iriia nakon ana bootaki n taromauri te Ekaretia, e aki miimi ngke e namakina te tamnei naba arei n te Umwantabu.

N tokina, e kaoaki Misha iroun temanna te mitinare bwa e na karaoa are e ataia bwa eti ao ni bwabetitoaki.

E ataia Misha bwa e kainnanoa te ninikoria ae korakora ni kaitara katein ana utu. I Ukraine angiia aomata a kaaina te ekaretia ae rangi ni mwaiti kaaina man kinaaki inanon maiuia. Ai bon aroia naba ana utu.

Tinana e tangiria bwa e na tataninga tabeua te ririki imwaain ae bwabetitoaki, ngaia are e kariaia bwa e na tataninga ni karokoa e koro 16 ana ririki. Inanon te tai anne e iriiri n taromauri ni katoa wiiki ao e beku bwa te tia katanga te biano n te mwaanga anne.

“E buokai anne bwa N na roko ni katoa Taabati, ibukina bwa I riai n roko ke akea ae na katangitang,” e taku Misha.

N tokina, ngke e a toki ana tai n tataninga, e bwabetitoaki Misha n te karanga ae te Desna River n Turai 1, 2006. N te tai arei, bon akea ana atatai ae a na waekoa ana utu ni ira ana banna ni katooto.

Tinana ae, Olga, e moana iriirina n te taromauri n reirei riki taekan ana aro ae boou natina te mwaane. E aki toki ni iriiri neiei n te aro are e a butiia te beretitenti n te mwaanga bwa e na katanga te aokan n tain te bootaki n toa bwa e aonga ni weteaki Misha bwa te tia kaira te katangitang.

Imwiin onoua namwakaina n ongora aia koaua kaain te Ekaretia, ni ikotaki ma ana koaua natina te mwaane, ao Olga e a moanna n rikirake oin ana koaua. E bwabetitoa tinana Misha n Ritembwa 2006.

E teimatoa ni kakatanga te aokan Olga. Misha, ai 17 ana ririki, e katabetabea ni buokiia kaain te beretitenti n te mwaanga, ni beku bwa te mitinare n te mwaanga, ao ni kaira te anene n tain te bootaki n toa.

“I ataia bwa e kainnanoai te Ekaretia,” e taku teuaei. “I rangi ni kakaitau ibukin reken au tai ni beku. E buokai te Ekaretia ngkai I buokia tabeman.”

I L’viv, te kaawa i Ukraine maeao, Yuri Voynarovich ma ana utu a moana kakaean te koaua ngke 10 ana ririki. I nanon ririki ao a kaakawari ekaretia aika kakaokoro. Ngkanne e kaoia aitamana bwa a na iri n ana mwaanga Ana Ekaretia Iesu Kristo Ibukiia Aika Itiaki ni Boong Aika Kaitira, ao ana karo Yuri a bwabetitoaki ao a kamatoaki tabeua te tai imwiina.

“I aki iri n te moan tai,” e taku Yuri. “I tabe ni kakae ibon irou.”

Ma ana karo, a ataia bwa e koaua te Ekaretia, ao aki bwara nanoia iroun natiia te mwaane. A kaoa Yuri nakon te reirei n te Ingiriti ao aia waaki ni kukurei kairake ni ikotaki naba ma taian bootaki n te Taabati. N tokina, a bon kaoa mitinare nakon taian kiraati n te Ingiriti.

“I aki kona n taekina ae I rawa nakoia,” e taku Yuri. Ngaia are e a iri. Imwiina e iri n te taromauri. N tokina ao e a bwabetitoaki naba.

“Man te bong arei I a tia n rinanon bwaai aika bati aika a karikirakea ao ni katea aron au koaua ao anuau nakon arou ae ngkai,” e taku teuaei.

“I aki toki n nooria aomata aika rawawata man aia rinerine aika aki raraoi are a karaoi,” e taku teuaei. “I ataia bwa n tabetai e boni kangaanga ibukin taian kariiri ao kairaraang irouia raraoia, ma ti riai n aki bwarannano. Imwiina ti na bon noori kakabwaia aika reke man te ongotaeka.”

Yuri, ai 17 ana ririki ngkai, e beku bwa te tia kairiiri n te mition ibukin te mwaanga ao te kiraaka n te mwaanga i L’viv.

“I rangi ni kakaitau ibukin te Ekaretia ao bwaai ni kabane are e karaoi ibukiu,” e taku Yuri. “I tangira te Ekaretia aio. I kaungaia aomata nako bwa a na taua te kai te biti ao a na aki kaakia.”