Kinahanglan ba Akong Mohunong og Eskwela para Magmisyon?

Migradwar ako sa high school niadtong 1992 ug dayon misumiter sa akong mga papeles aron sa pagserbisyo og full-time nga misyon. Sa panahon nga miabut ang akong tawag, ako nadawat sa usa labing maayo nga unibersidad sa Nigeria nga moeskwela og medisina.

Sa Nigeria ang pagkadawat ngadto sa medikal nga eskwelahan usa ka kompetensya ug kinahanglang dili balibaran. Sa dihang ang pagpamugos sa pipila ka mga higala ug mga miyembro sa pamilya sa pagsalikway sa akong tawag sa misyon, ako mipasabut nga ako adunay responsibilidad sa pagserbisyo ug nagpaabut sa pagbuhat niini sukad sa akong pagpasakop sa Simbahan unom ka tuig na ang milabay. Nakasiguro ako nga ako madawat ra pag-usab sa medikal nga eskwelahan human sa akong misyon, apan daghan ang nagtuo nga ako magbasol sa akong desisyon.

Mapasalamaton ako sa mga home teacher, mga sakop sa pamilya, ug sa mga higala sa Simbahan kinsa misuporta sa akong desisyon sa pagserbisyo. Ang pagtambong sa seminary, pagtuon sa mga kasulatan, ug pagpuyo sa ebanghelyo nakapahimo nako sa pagbarug sa akong pagtuo.

Isip usa ka misyonaryo naghimo ako og personal nga mga tumong ug mitrabaho pag-ayo. Paglabay sa baynte kwatro ka mga bulan nakadawat ako og madungganong pagka-release. Ang Ginoo mipanalangin sa mga returned missionary apan wala mosaad nga sila dili na maapektohan sa mga pagsulay. Alang sa usa ka Nigerian nga returned missionary, ang mga pagsulay naglakip sa walay trabaho ug kakulang sa kwarta alang sa edukasyon.

Sa unang tulo ka mga tuig human sa akong misyon, mikuha ug nakapasar ako og tulo sa entrance examination, apan wala na ako madawat pag-usab sa medikal nga eskwelahan. Sa maong sama nga tulo ka tuig, wala ako makakita og trabaho. Natintal ako sa pagtuo nga ang akong ubang mga higala ug mga sakop sa pamilya sakto tingali ug nga kadto usa ka sayop nga gibalibaran ang akong pagkadawat sa medikal nga eskwelahan.

Sa akong misyon ako nakakat-on sa pagsalig sa akong gisagubang diha sa Ginoo, mao nga ako mitugot Kaniya sa paggiya sa akong kinabuhi sumala sa Iyang kabubut-on. Sa dihang gihimo nako, ang mga butang nagsugod sa pagdapig kanako—apan dili sumala sa akong plano.

Usa ka Dominggo sa puasa nakahukom ako nga magpuasa ug mag-ampo sa tinud-anay alang sa panabang sa Ginoo. Nianang gabhiona dihay mituktok sa pultahan. Sa dihang akong giablihan ang pultahan, natingala ako nga nakita ang kaila nga akong nahimamat sa security training nga akong natambongan unom ka bulan na ang milabay. Giingnan ako niya nga adunay oportunidad alang sa usa ka security operative ang miabli sa kompaniya nga gitrabahoan sa iyang magulang nga lalaki ug nga ang kompaniya gusto nga mabutangan dayon ang posisyon. Ako lamang ang tawo nga miabut sa iyang hunahuna.

Pagkasunod adlaw ang kompaniya midawat kanako. Kanang mao nga kasinatian mikumpirmar kanako nga ang Langitnong Amahan wala mobiya kanako ug nga ako kinahanglang mosalig Kaniya. Ang trabaho maoy nahimong latayanan sa laing mga trabaho.

Ang balaanon nga mga panalangin dili masukod sa temporal nga mga kalampusan lamang. Naningkamot ako sa mga katuigan human sa akong misyon sa pagpangita og temporal nga kapaninguhaan, apan ang Ginoo mipanalangin kanako sa espirituhanon. Ang akong patriyarkal nga panalangin migiya kanako nga magminyo ug nagsulti kanako nga ang oportunidad sa mas taas nga edukasyon moabut. Mao gayud.

Bisan og wala ako maadto sa medikal nga eskwelahan, nakaangkon ako og pareho nga mga degree sa accounting ug mathematics. Ang Ginoo sa katapusan mipanalangin kanako og igong materyal nga kapaninguhaan nga ako nakahimo sa pagminyo.

Kon kita moserbisyo og madungganon nga misyon, ang Ginoo mapugos sa pagpanalangin kanato kon kita mangita og mga oportunidad alang sa mas taas nga edukasyon human niana. Sa kinabuhi sa usa ka batan-ong lalaki ug babaye walay makalabaw pa sa mga kasinatian, pagkat-on, ug mga panalangin sa full-time nga misyonaryo nga pagserbisyo.