Pagpanganta ug Pag-istorya
Sa dihang ang akong asawa nga si Sandra, ug ako gitawag nga moserbisyo sa South Africa Durban Mission, nagsugod kami sa pagpangita og proyekto sa pagserbisyo sa komunidad. Miyembro ako sa Mormon Tabernacle Choir sobra na sa 20 ka tuig, ug ang akong asawa, usa ka library aide, migahin og panahon sa pag-istorya sa elementarya nga eskwelahan. Sa dihang ang among presidente sa misyon nakahukom nga moabli og misyonaryo nga buhat sa duol nga lungsod, nasayud kami nga kini mao na ang among kahigayunan.
Among gibisitahan ang lungsod ug nakadiskobre nga walay mga librarya ang mga eskwelahan, usa lang ka gamay nga librarya sa komunidad diha sa lungsod. Ang batan-ong mga elder mipaila-ila kanamo sa direktor sa librarya. Mipasabut kami kaniya nga gusto kaming mohimo og senemana nga story time alang sa mga bata. Nagduha-duha siya, apan human sa paghunahuna miuyon siya nga ipahibalo kini ug mahimo kaming mosulay.
Sa unang adlaw lima ka mga bata ang mitambong. Sa hinay-hinay nagkadaghan ang miapil. Paglabay sa pipila ka bulan nangayo kami og tabang sa usa ka batan-ong babaye, bag-o nga nakabig, kinsa makasulti og nindot nga Iningles ug Zulu. Ang nanambong sa story time midaghan, ug ang direktor ug ang mga ginikanan nadasig sa unsay nahitabo.
Ang katawhan sa Zulu ganahan nga mokanta, mao nga among gidugangan og yano nga mga kanta ug mga garay sa among story time. Sa hinapos sa among misyon, naghimo na kami og duha o tulo ka mga sesyon sa mga kanta ug story time sa usa ka semana aron makaapil ang sobra sa 100 ka mga bata nga mitambong. Unsa gayud ka panalangin nga among makita ang mga bata bisan asa ug sila mosugod sa pagkanta sa among mga kanta ug mobalak sa mga garay ngari kanamo.
Laing panalangin ang miabut tungod sa among pagserbisyo niini nga dapit. Sa dihang midaghan ang mga miyembro sa Simbahan ug nagkinahanglan kami og lugar aron sa pagsugod sa among mga miting sa Dominggo, ang direktor sa librarya namugos nga among gamiton ang librarya nga walay bayad.
Mapasalamaton kaayo kami nga ang Ginoo mitabang kanamo sa pagpangita og paagi sa paggamit sa among mga talento, pagserbisyo sa komunidad, ug sa pagtabang sa pag-abli sa usa ka lugar sa misyon.