Siksika ang mga Kasulatan sa Makugihong Paagi

Presidente Howard W. Hunter (1907–95): “Ako mopahimangno kaninyo sa mga pagpadayag sa Dios isip sumbanan diin kita kinahanglang mopuyo sa atong mga kinabuhi ug diin kita kinahanglang motimbang-timbang sa matag desisyon ug matag buhat. Sa ingon, kon ikaw adunay mga kabalaka ug mga hagit, atubanga kini pinaagi sa pagdangup sa mga kasulatan ug mga propeta” (“Fear Not, Little Flock,” sa 1988–89 Devotional and Fireside Speeches [1989], 112).

Presidente Ezra Taft Benson (1899–1994): “Ang kalampusan sa pagkamatarung, ang gahum nga makalikay sa pagpangilad ug ang pagbuntog sa pagtintal, ang giya sa matag adlaw sa atong mga kinabuhi, ang pag-ayo sa kalag—kini mao lamang ang pipila sa mga saad sa Dios nga ihatag niadtong kinsa modawat sa Iyang pulong. … Piho nga mga panalangin ang makaplagan lamang diha sa mga kasulatan, diha sa pagtuon lamang sa pulong sa Dios ug sa hugot nga mokupot niini. …

“… Ipasalig pag-usab sa inyong mga kaugalingon ang pagtuon sa mga kasulatan. Igahin ang inyong mga kaugalingon kada adlaw aron makabaton kamo og gahum sa Espiritu nga motabang kaninyo diha sa inyong mga calling.” Basaha kini uban sa inyong mga pamilya ug tudlui ang inyong mga anak sa paghigugma ug paghatag og bili niini” (“The Power of the Word,” Ensign, Mayo 1986, 82).

Presidente Spencer W. Kimball (1895–1985): “Samtang ikaw nag-anam anam og kapamilyar sa mga kamatuoran diha sa kasulatan, ikaw mag-anam anam og ka epektibo sa paghupot sa ikaduhang dako nga sugo, ang paghigugma sa imong silingan sama sa imong kaugalingon. Ang pagkahimong batid sa mga kasulatan—dili mopaubos sa uban, kondili mobayaw kanila.! Sa katapusan, kinsa man ang adunay mas labaw nga panginahanglan nga ‘moamping’ sa mga kamatuoran sa ebanghelyo (diin sila mahimong magsalig diha sa panahon sa panginahanglan) kaysa mga babaye ug mga inahan kinsa nagbuhat og hilabihan sa pag-amuma ug pagpanudlo?” (“The Role of Righteous Women,” Ensign, Nob. 1979, 102).

2 Nephi 4:15: “Kay ang akong kalag nalipay sa mga kasulatan, ug ang akong kasingkasing namalandong kanila, ug nagsulat kanila alang sa kasayuran ug kaayohan sa akong mga anak.”

Julie B. Beck, kinatibuk-ang presidente sa Relief Society: “Usa sa maayong paagi sa pagsugod sa pagtuon sa kasulatan mao ang ‘pagpahisama’ niini sa atong mga kaugalingon (tan-awa sa 1 Nephi 19:23). Pipila sa mga tawo magsugod pinaagi sa pagpili og hilisgutan sa Giya Ngadto sa mga Kasulatan nga sila kinahanglang mas masayud kabahin niini. O sila magsugod sa sinugdanan sa usa ka basahon sa kasulatan ug mangita og piho nga mga pagtulun-an. …

“Bisan asa nga pamaagi nga ang usa ka tawo magsugod sa pagtuon sa mga kasulatan, ang susi sa pagsabut sa importanting kahibalo mao ang pagpadayon sa pagtuon. Ako wala gayud kapuya sa pagdiskubre sa maanindot kaayo nga mga bahandi sa kamatuoran diha sa mga kasulatan tungod kay kini nagtudlo sa ‘kayano, gani ingon kayano nga mahimo sa usa ka pulong’ (2 Nephi 32:7). Ang mga kasulatan nagpamatuod kang Kristo (tan-awa sa Juan 5:39). Kini mosulti kanato sa tanang mga butang ang atong kinahanglang buhaton (tan-awa sa 2 Nephi 32:3). Kini ‘makahimo [kanato] nga maalamon ngadto sa kaluwasan’ (2 Timoteo 3:15)

“Pinaagi sa akong pagbasa sa mga kasulatan ug mga pag-ampo kuyog sa akong pagtuon, nakabaton ako og kaalam nga naghatag kanako og kalinaw ug nagtabang sa akong mga kusog sa pagpokus sa mahangturon nga mga prayoridad. Tungod kay misugod ko og basa sa mga kasulatan kada adlaw, nakat-on ako kabahin sa akong Langitnong Amahan, sa Iyang Anak nga si Jesukristo, ug unsa ang akong angayan nga buhaton aron mahisama Kanila” (“Ang Akong Kalag Nalipay sa mga Kasulatan,” Liahona ug Ensign, Mayo 2004, 108–9).

Presidente Thomas S. Monson: “Ang balaang mga kasulatan mopanindot sa atong mga butangan og mga libro. Siguradoa nga kini makahatag og pag-amuma sa atong mga hunahuna ug giya sa atong mga kinabuhi” (“The Mighty Strength of the Relief Society,” Ensign, Nob. 1997, 95).