Ang mga Saad sa usa ka Propeta

Sa akong tibuok kinabuhi akong nakat-unan nga kon kita mosunod sa mga pagtulun-an sa atong mga propeta, kita makadawat sa gisaad nga mga panalangin. Niadtong Abril 1986 nga kinatibuk-ang komperensya, si Presidente Ezra Taft Benson (1899–1994) misaad nga kon ang mga pamilya mobasa sa mga kasulatan kanunay, ang Espiritu mopuno sa ilang mga panimalay.¹

Ang akong minahal nga asawa ug ako nakahukom nga mosunod niana nga tambag. Naghimo kami og tumong nga mobasa og usa ka kapitulo gikan sa Basahon ni Mormon uban sa among tulo ka mga anak —Jorge, 10; Susi, 9; ug Luis, 3. Nagbasa kami matag adlaw, matag usa kanamo mobasa og usa ka bersikulo. Bisan og si Luis dili pa makabasa, gusto siyang moapil. Molingkod siya sa akong paa, mag-atubang nako, nga ang Basahon ni Mormon anaa sa among tunga. Kon turno na nako sa pagbasa, kaming duha mosunod sa akong tudlo samtang akong itudlo ang matag pulong, ug si Luis kusog nga mosubli sa matag pulong nga akong gibasa samtang motan-aw niadtong nagtuwad nga mga pulong.

Sa wala pa siya mag-edad og lima ka tuig, si Luis nangutana, “Kanus-a ang akong turno sa pagbasa?”

Among gipasabut nga kon siya modako na, moeskwela siya ug makat-on sa pagbasa.

Mitubag siya, “Kahibalo na akong mobasa!”

Natingala, akong gitunol niya ang Basahon ni Mormon. Iyang giablihan ang basahon nga pinatuwad, mitan-aw sa ibabaw, ug nagsugod sa pagbasa nga sakto. Nakat-on siya sa pagbasa pinaagi sa pagsunod sa Basahon ni Mormon!

Sa dihang nag-edad na siya og unom ka tuig, si Luis usahay mokuyog nako nga mobisita og mga miyembro sa Simbahan. Ako mohangyo kaniya sa pagpaambit sa iyang pagpamatuod ingon man usab sa paghatag og mubo nga mensahe sa kasulatan nga akong gitudlo kaniya. Kon mobasa siya sa Basahon ni Mormon, iya kining tuwaron ug motan-aw sa ibabaw.

Ako mopamatuod kaninyo nga kon kamo mosugod sa pagbasa sa mga kasulatan gikan sa panahon nga kamo gamay pa nga bata, kamo mas makasabut sa mga saad sa Ginoo ug kamo masayud unsay Iyang gipaabut gikan kaninyo. Sa umaabut kamo mahimong usa ka ginikanan ug makabaton og gagmay nga mga bata sa inyong kaugalingon. Tudloi sila sa pagbasa sa mga kasulatan, ug kamo makakita sa katumanan sa saad diha sa Mga Proverbio 22:6 “Bansaya ang bata diha sa dalan nga iyang pagalaktan: ug bisan kon siya matigulang na siya dili mobiya gikan niana.”

Hapit na karon mahuman si Luis sa iyang pagtuon sa unibersidad ug nagtrabaho og full-time. Bisan unsa pa ka dugay siya makauli gikan sa trabaho, eskwelahan, o sa buluhaton sa Simbahan, mobasa gihapon siya og usa ka kapitulo gikan sa Basahon ni Mormon sa dili pa siya matulog. Ang saad sa propeta tinuod gayud nga natuman. Isip resulta sa among pagbasa niining sagrado nga basahon, ang among pamilya gipanalanginan pag-ayo ug kami mas nagkahiusa.

Ako modapit kaninyo sa pagbasa sa mga kasulatan kada adlaw. Kon mahimo, basaha kini uban sa inyong pamilya. Ako moawhag kaninyo mga batan-ong lalaki sa pagpangandam nga mosebriyso og mga misyon. Ako modapit kaninyong tanan sa paghimo og tumong nga mabugkos sa templo alang sa tanang kahangturan. Ug sa katapusan gusto nakong inyong mahinumduman ang dinasig nga tambag ni Presidente Gordon B. Hinckley (1910–2008), kinsa misulti kanato: “Nagkinahanglan kamo sa tanang edukasyon nga inyong makuha. … Bisan og pag-ayo ba sa refrigerator, o trabaho sa hanas nga surgeon, kinahanglan inyong bansayon ang inyong mga kaugalingon.”²

Minahal kong mga bata, paminaw sa inyong mga magtutudlo, pagbinuotan diha sa klasehanan, buhata ang inyong labing maayo, ug pagkat-on kutob sa inyong mahimo. Ang Ginoo nag-andam og daghang mga panalangin alang kaninyo ug sa inyong mga pamilya. Ang atong katungdanan mao ang “pagsunod sa propeta; nasayud siya sa dalan.”³