Ang Gasa sa Kahibalo [Literacy]

Ang among kinamagulangan nga anak nga lalaki ganahan sa kindergarten ug maayo ra sa eskwelahan Pagka grade 1, hinoon, klaro kaayo namo nga siya dili kamaong mobasa. Makabasa siya og pipila ka mga pulong apan naglisud gani sa unang mga buluhaton sa pagbasa. Milabay ang mga bulan, ug ang mga kahanas sa among anak sa pagbasa hinay nga miuswag. Ang akong bana ug ako nabalaka na pag-ayo.

Usa ka adlaw niana nahinumdom ko sa akong presidente sa misyon nga mitudlo nako sa una. Gitawag ako ngadto sa usa ka misyon nga lahi ang pinulongan. Ang pagkat-on sa pinulongan nga Russian usa ka hagit sa nagkalain-lain nga mga ang-ang alang sa kada misyonaryo, ug ang among presidente sa misyon mitambag kanamo sa pagbasa sa Russian nga Basahon ni Mormon kada adlaw. Misaad siya nga ang gahum sa Basahon ni Mormon motabang kanamo sa among abilidad sa pagpakigsulti ginamit ang Russian. Sakto gayud siya. Sa paglabay sa panahon nahimo akong maayo sa pagsulti ug sa pagsabut sa pinulongan, ug ang akong pagpamatuod mitubo.

Mga tuig human sa akong misyon, ako naghunahuna, “Kon nahimo nako sa Russian, nganong dili man mahimo alang sa akong anak sa Iningles?” Human masultihi ang among anak mahitungod sa akong pakigbisog nga makat-on sa Russian ug sa tambag sa akong presidente sa misyon, ang akong bana ug ako mihagit kaniya sa pagbasa sa Basahon ni Mormon kada adlaw sa iyang kaugalingon. Mogahin siya og panahon sa pagkolor sa mga pulong Dios ug Ginoo inigkakita niya niini diha sa mga pahina. Sa wala madugay siya mipadayon ngadto ni Jesus. Human niana mopili siya og mga pulong nga iyang makita ug mangutana unsa kini. Nagkugi siya sa iyang pagbasa kada adlaw, ug sa pagkatapos sa tuig ang level sa pagbasa milabaw sa among mga gipaabut.

Karon ang among anak anaa na sa ika-unom nga ang-ang. Usa siya ka talagsaong magbabasa ug motabang sa pagtudlo sa iyang lima ka mga manghud mahitungod sa gasa nga iyang nadawat pinaagi sa pagbasa sa Basahon ni Mormon. Matag usa sa among mga anak nakapalambo og dakong mga abilidad sa pagbasa ug kinaiya sa pagbasa sa Basahon ni Mormon. Nagsugod na sila sa pagbati sa gamhanang espiritu niini samtang nagtubo ang ilang mga pagpamatuod.