Pagtudlo sa Tinuod nga Doktrina

Ang pulong sa Dios mao ang doktrina nga gitudlo ni Jesukristo ug sa Iyang mga propeta. Si Alma nasayud nga ang mga pulong sa doktrina may dakong gahum. Makaabli kini sa mga hunahuna sa katawhan aron makita ang espirituhanong mga butang nga dili makita sa natural nga mata. Ug kini makaabli sa kasingkasing ngadto sa mga pagbati sa gugma sa Dios ug gugma sa kamatuoran. Ang Manluluwas mikuha niadtong duha ka mga kapanguhaan sa gahum, sa pag-abli sa atong mga mata ug pag-abli sa mga kasingkasing, sa ika-18 nga seksyon sa Doktrina ug mga Pakigsaad samtang Siya nagtudlo sa Iyang doktrina ngadto niadtong Iyang gusto nga mahimong moalagad Kaniya isip mga misyonaryo. Samtang kamo maminaw, paghunahuna nianang batan-ong lalaki diha sa inyong pamilya nga karon nagduhaduha sa pag-andam sa iyang kaugalingon alang sa misyon. Ania kon giunsa sa Magtutudlo sa pagtudlo ang Iyang duha ka mga sulugoon ug sa unsa nga paagi nga kamo makatudlo sa Iyang doktrina ngadto sa batan-ong lalaki nga inyong gimahal:

“Ug karon, Oliver Cowdery, ako mamulong nganha kanimo, ug usab ngadto kang David Whitmer, pinaagi sa sugo; kay, tan-awa Ako nagsugo sa tanan nga mga tawo sa tanan nga dapit sa paghinulsol, ug Ako namulong nganha kanimo, gani ingon kadto kang Pablo nga akong apostol, kay kamo natawag bisan niana nga mao gihapon nga katungdanan diin siya gitawag.

“Hinumdumi ang bili sa mga kalag mahinungdanon sa panan-aw sa Dios” (D&P 18:9–10).

Siya misugod pinaagi sa pagsulti unsa ka dako ang Iyang pagsalig kanila. Dayon Siya midani sa ilang mga kasingkasing ngadto Kaniya pinaagi sa pag-ingon kon unsa ka dako sa gugma sa Iyang Amahan ug Niya ngadto sa matag kalag. Pagkahuman Siya mihisgot sa katukuran sa Iyang doktrina. Siya mihulagway unsa ka dako sa hinungdan nga kita mahigugma Kaniya:

“Kay, tan-awa, ang Ginoo nga imong Manunubos nag-antus sa kamatayon diha sa lawas; busa siya nag-antus sa kasakit sa tanan nga mga tawo, nga unta ang tanan nga mga tawo maghinulsol ug moduol ngadto kaniya.

“Ug siya nabanhaw pag-usab gikan sa mga patay, nga siya unta modala sa tanan nga mga tawo ngadto kaniya, uban sa mga kondisyon sa paghinulsol.

“Ug unsa ka dako ang iyang hingpit nga kalipay diha sa kalag nga naghinulsol!” (D&P 18:11–13).

Human nakahatag sa doktrina sa Iyang misyon sa pag-abli sa ilang mga kasingkasing, Siya mihatag kanila sa Iyang sugo: “Busa, ikaw gitawag sa pagsangyaw og paghinulsol ngadto niini nga mga katawhan” (D&P 18:14).

Sa katapusan, Siya miabli sa ilang mga mata aron makakita sa umaabot. Siya midala kanila ug kanato sa umaabot nga pagpuyo, nga gihulagway diha sa mahinungdanon nga plano sa kaluwasan, diin kita mahimong makapuyo. Siya misulti kanato sa talagsaon nga pagpanag-uban, nga angayan sa paghatag sa atong tanang mahimo aron matagamtaman:

“Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!

“Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!” (D&P 18:15–16).

Niadtong pipila ka mga tudling, Siya mitudlo sa doktrina sa pag-abli sa atong mga kasingkasing sa Iyang gugma. Ug Siya mitudlo sa doktrina sa pag-abli sa atong mga mata aron makakita sa espirituhanon nga mga kamatuoran, nga dili makita sa bisan unsang mga hunahuna nga wala mahayagi sa Espiritu sa Kamatuoran.

Ang panginahanglan sa pag-abli sa mga mata ug mga kasingkasing nagsulti kanato kon unsaon nato sa pagtudlo ang doktrina. Ang doktrina makaangkon sa iyang gahum sa higayon nga ang Espiritu Santo mopamatuod nga kini tinuod. Atong andamon kadtong atong tudloan, kutob sa atong mahimo, sa pagdawat sa hilom nga mga pag-aghat sa hinay, hinagawhaw nga tingog. Kana nagkinahanglan og hugot nga pagtuo diha kang Jesukristo. Kita nagkinahangalan og pagpaubos, andam sa pagtugyan ngadto sa kabubut-on sa Manluluwas alang kanato. Ang tawo nga inyong buot tabangan tingali adunay gamay niining duha, apan kamo makaawhag aron siya magtinguha sa pagtuo. Labaw pa niana, kamo makakuha og pagsalig gikan sa lain nga mga gahum sa doktrina. Ang kamatuoran makaandam sa usa ka tawo sa pagdawat sa kamatuoran. Ang pagkadungog lamang sa mga pulong sa doktrina makapatanom sa liso sa hugot nga pagtuo diha sa kasingkasing. Ug gani ang gamay nga liso sa hugot nga pagtuo diha kang Jesukristo magdapit sa Espiritu.

Kita mas makakontrol sa atong kaugalingong pag-pangandam. Kita magbusog sa pulong sa Dios diha sa mga kasulatan ug magtuon sa mga pulong sa buhing mga propeta. Kita magpuasa ug mag-ampo aron sa pagdapit sa Espiritu alang sa atong kaugalingon ug sa tawo nga atong tudloan.

Tungod kay kita nagkinahanglan sa Espiritu Santo, kita kinahanglan nga magmatngon ug magmabinantayon nga dili molapas sa pagtudlo sa tinuod nga doktrina. Ang Espiritu Santo mao ang Espiritu sa Kamatuoran. Siya mopamatuod unsa ang atong gitudlo pinaagi sa paglikay sa pagpangagpas o kinaugalingon nga pagsabut. Kana mahimong lisud buhaton. Kamo nahigugma sa tawo nga inyong gipaningkamutan nga maimpluwensiya. Siya mahimong mosalikway sa doktrina nga iyang nadungog sa una. Kini makapatintal sa pagsulay og laing bag-ong butang o makapakurat. Apan kita midapit sa Espiritu Santo ingon nga atong kauban kon kita magmabinantayon sa pagtudlo lamang sa tinuod nga doktrina.

Usa sa labing sigurado nga mga pamaagi sa paglikay nga maduol sa sayop nga doktrina mao ang pagpili nga mahimong yano sa atong pagtudlo. Ang kahilwasan maangkon pinaagi niana nga pagkayano, ug gamay ang mawala. Kita nasayud niana tungod kay ang Manluluwas misulti kanako sa pagtudlo sa labing mahinungdanon nga doktrina ngadto sa gagmay nga mga bata. Paminaw sa Iyang sugo: “Ug usab, tungod kay ang mga ginikanan adunay mga anak sa Zion, o diha sa bisan diin sa iyang mga istaka nga natukod, nga wala magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo ka tuig ang panuigon, ang sala anaa sa mga ulo sa mga ginikanan.” (D&P 68:25).

Kita makatudlo bisan ngadto sa usa ka bata sa pagsabut sa doktrina ni Jesukristo. Busa kini posible, uban sa panabang sa Dios, sa pagtudlo sa makaluwas nga doktrina sa yano nga paagi.

Kita adunay dako nga kahigayunan uban sa mga batan-on. Ang labing maayo nga panahon sa pagtudlo mao ang sayo, samtang ang mga bata dili pa madutlan sa mga pagtintal sa ilang mortal nga kaaway ug sa dili pa ang mga pulong sa kamatuoran mamahimong lisud nilang mamatikdan tungod sa ilang kaugalingong mga problema.

Ang usa ka maalamon nga ginikanan dili gayud mopalabay og usa ka kahigayonan sa pagpundok sa mga anak aron pagkat-on sa doktrina ni Jesukristo. Kini nga mga higayon panagsa lamang itandi sa mga paningkamot sa kaaway. Kay sa matag oras nga ang gahum sa doktrina itudlo ngadto sa kinabuhi sa usa ka bata, tingali adunay gatusan ka mga oras sa mga mensahe ug mga larawan nga naglimod o nagsalikway sa makaluwas nga kamatuoran.

Ang pangutana dili gayud mao kon gikapoy ba kita pag-ayo sa pagtudlo sa doktrina o kon mas maayo nga paagi ba aron maduol ang bata maglingawlingaw lamang o kon ang bata ba nagsugod na sa paghunahuna nga kita sobra na kaayo sa pagtudlo. Ang pangutana kinahanglang, “Uban sa gamay kaayo nga panahon ug sa diyutay kaayo nga kahigayunan, unsa man sa mga pulong sa doktrina nga naggikan kanako ang makapalig-on kanila batok sa mga pag-ataki sa ilang hugot nga pagtuo nga siguradong moabut?” Ang mga pulong nga inyong isulti karon tingali mao ang pulong nga ilang mahinumduman. Ug ang karon sa dili madugay mawala.

Ang mga katuigan molabay, kita nagtudlo sa doktrina kutob sa atong mahimo, ug sa gihapon pipila sa atong mga anak wala magsunod. Adunay kasubo niana. Apan adunay paglaum diha sa talaan sa kasulatan sa mga pamilya. Hunahunaa sila si Alma nga Batan-on ug si Enos. Sa ilang mga panahon sa kalisud, sila mihinumdom sa mga pulong sa ilang mga amahan, mga pulong sa doktrina ni Jesukristo (tan-awa sa Enos 1:1–4; Alma 36:16–19). Kini miluwas kanila. Ang inyong pagtudlo nianang sagrado nga doktrina mahinumduman.

Duha ka mga pagduda mosulod sa inyong hunahuna. Kamo tingali maghunahuna kon kamo nakahibalo ba pag-ayo sa doktrina aron sa pagtudlo niini. Ug kon kamo nakasulay na sa pagtudlo niini, kamo tingali maghunahuna ngano nga kamo wala makakita og daghang maayong mga resulta.

Sa akong kaugalingong pamilya adunay usa ka istorya kabahin sa usa ka batan-ong babaye kinsa adunay kaisug sa pagtudlo sa doktrina sa dihang bag-o pa lamang siya nga nakabig nga may gamay nga edukasyon. Ang tinuod nga ang mga resulta sa iyang pagtudlo wala matapos nakahatag kanako og pailub sa paghulat sa mga bunga sa akong kaugalingong mga paningkamot.

Si Mary Bommeli mao ang inahan sa akong lolo sa bahin sa akong amahan. Ako wala gayud makakita kaniya. Ang iyang apo nga babaye nakadungog kaniya nga misaysay sa iyang sugilanon ug misulat niini.

Si Mary natawo pagka 1830. Ang mga misyonaryo mitudlo sa iyang pamilya sa Switzerland sa diha nga siya 24. Siya nagpuyo gihapon sa ilang panimalay, naghabol ug namaligya og panapton aron sa pagtabang sa iyang pamilya sa ilang gamay nga umahan. Sa diha nga ang pamilya nakadungog sa doktrina sa gipahiuli nga ebanghelyo ni Jesukristo, sila nasayud nga kini tinuod. Sila gibunyagan. Ang igsoon nga mga lalaki ni Mary gitawag sa misyon, nanglakaw nga walay salapi o sangkap. Ang nahabilin sa pamilya mibaligya sa ilang mga kabtangan aron moadto sa Amerika aron magpundok uban sa mga Santos.

Walay igong salapi aron makaadto ang tanan. Si Mary miboluntaryo nga magpabilin tungod kay siya mibati nga siya makatigum og igo-igo gikan sa iyang paghabol aron sa pagsuporta sa iyang kaugalingon ug pagtigum alang sa iyang pamasahe. Siya miadto sa Berlin ug ngadto sa balay sa usa ka babaye kinsa mipatrabaho kaniya sa paghabol og panapton alang sa sinina sa pamilya. Siya nagpuyo sa lawak alang sa sulugoon ug mipahimutang sa iyang hablanan sa sala sa balay.

Supak sa balaod ang pagtudlo sa doktrina sa Ang Simbahan ni Jesukristo sa mga Santos sa Ulahing mga Adlaw didto sa Berlin. Apan si Mary wala makapugong sa maayong balita diha sa iyang kaugalingon. Ang babaye nga tag-iya sa balay ug ang iyang mga higala nagpundok libut sa hablanan aron maminaw sa Swiss nga babaye nga magtudlo. Siya mihisgot kabahin sa pagpakita sa Langitnong Amahan ug ni Jesukristo ngadto ni Joseph Smith, kabahin sa pagbisita sa mga anghel, ug kabahin sa Basahon ni Mormon. Sa diha nga siya miabut ngadto sa mga asoy ni Alma, siya mitudlo sa doktrina sa Pagkabanhaw.

Kana nakahatag og pipila ka mga problema sa iyang paghabol. Niadtong mga panahona daghang mga bata ang namatay nga gagmay pa. Ang mga babaye libut sa hablanan namatyan og mga anak, pipila kanila daghang anak ang nangamatay. Sa diha nga si Mary mitudlo sa kamatuoran nga ang gagmayng mga bata mga manunuod sa celestial nga gingharian ug nga kadtong mga babaye mahimong makauban kanila pag-usab ug uban sa Manluluwas ug sa atong Langitnong Amahan, ang mga luha mitulo sa mga nawong sa mga babaye. Si Mary mihilak usab. Ang tanan niadtong mga luha nangatagak nga nakabasa sa panapton nga gihabol ni Mary.

Ang pagtudlo ni Mary nakahimo og mas dako nga problema. Bisan tuod nga si Mary mihangyo sa mga babaye nga dili mosulti unsa ang iyang gisulti kanila, sila misulti niini. Sila mipaambit sa malipayon nga doktrina uban sa ilang mga higala. Busa usa ka gabii niana dihay nanuktok sa pultahan. Mga pulis kini. Ilang gidala si Mary ngadto sa bilanggoan. Padulong didto siya nangutana sa pulis sa ngalan sa maghuhukom nga iyang atubangon sa pagkasunod buntag. Siya nangutana kon siya aduna bay pamilya. Siya nangutana kon siya usa ba ka maayo nga amahan ug usa ka maayong bana. Ang pulis mipahiyom samtang siya mihulagway sa maghuhukom isip usa ka makasasala nga tawo.

Sa bilanggoan, si Mary nangayo og lapis ug pipila ka papel. Siya misulat ngadto sa maghuhukom. Siya misulat kabahin sa Pagkabanhaw ni Jesukristo sama sa gihulagway diha sa Basahon ni Mormon, kabahin sa kalibutan sa espiritu, ug kabahin kon hangtud kanus-a ang maghuhukom maghunahuna ug mosusi sa iyang kinabuhi sa dili pa moatubang sa katapusang paghukom. Siya misulat nga siya nakahibalo nga siya adunay daghang angayan nga hinulsolan nga makapaguol sa kasingkasing sa iyang pamilya ug makahatag kaniya og hilabihan nga kasubo. Siya misulat sa tibuok gabii. Pagkabuntag siya mihangyo sa mga pulis sa paghatag sa iyang sulat ngadto sa maghuhukom. Siya mihimo.

Pagkataud-taud ang pulis gipatawag sa maghuhukom ngadto sa iyang buhatan. Ang sulat ni Mary dili malalis nga ebidensya nga siya nagtudlo sa ebanghelyo ug sa ingon nagsupak sa balaod. Bisan pa niana, wala madugay ang pulis mibalik sa silda ni Mary. Siya miingon kaniya nga ang tanan nga demanda gihunong ug nga siya gawasnon nang molakaw. Ang iyang pagtudlo sa doktrina sa gipahiuli nga ebanghelyo ni Jesukristo igong nakapabuka sa mga mata ug mga kasingkasing aron masulod siya sa bilanggoan. Ug ang iyang pagpahayag sa doktrina sa paghinulsol ngadto sa maghuhukom mao ang nakapagawas kaniya sa bilanggoan.¹

Ang pagtudlo ni Mary Bommeli nakatandog mas labaw pa kay sa niadtong mga babaye libut sa hablanan ug sa maghuhukom. Ang akong amahan, iyang apo, nakigsulti kanako atol sa gabii nga siya hapit na mamatay. Siya naghisgot sa malipayon nga pagpanagpundok nga hapit na mahitabo didto sa kalibutan sa espiritu. Hapit na nako makita ang hayag nga silaw sa adlaw ug ang mga pahiyom nianang dapit sa paraiso samtang siya naghisgot bahin niini uban sa ingon nga kasiguroan.

Sa usa ka punto ako nangutana kaniya kon siya aduna bay angay nga hinulsolan. Siya mipahiyum. Siya mingisi og gamay samtang siya miingon, “Wala, Hal, naghinulsol na ako sa akong tibuok nga kinabuhi. Ang doktrina sa paraiso nga gitudlo ni Mary Bommeli niadtong mga babaye tinuod alang sa iyang apo nga lalaki. Ug gani ang doktrina nga gitudlo ni Mary ngadto sa maghuhukom nakaumol sa kinabuhi sa akong amahan alang sa kaayohan. Kadto dili mao ang katapusan sa pagtudlo ni Mary Bommeli. Ang talaan sa iyang mga pulong modala sa tinuod nga doktrina ngadto sa mga kaliwatan sa iyang pamilya nga wala pa matawo. Tungod kay siya mituo nga bisan ang usa ka bag-o nga kinabig nakahibalo og igo nga doktrina sa pagtudlo niini, ang mga hunahuna ug mga kasingkasing sa iyang mga kaliwatan pagaablihan, ug sila pagalig-onon diha sa panag-away.

Ang inyong mga kaliwatan motudlo sa doktrina ngadto sa usag usa tungod kay kamo mitudlo niini. Ang doktrina makahimo og labaw pa kay sa pag-abli sa mga hunahuna ngadto sa espirtuhanon nga mga butang ug mga kasingkasing ngadto sa gugma sa Dios. Kon kana nga doktrina makahatag og hingpit nga kalipay ug kalinaw, kini usab adunay gahum sa pag-abli sa mga ba-ba. Sama niadtong mga babaye sa Berlin, ang inyong mga kaliwatan dili makatago sa maayong mga balita sa ilang mga kaugalingon.

Ako mapasalamaton nga nagpuyo sa panahon nga kami ug ang among mga pamilya nakaangkon sa kahingpitan sa gipahiuli nga ebanghelyo. Ako mapasalamaton sa misyon sa gugma sa Manluluwas alang kanato ug sa mga pulong sa kinabuhi nga Iyang gihatag kanato. Ako nag-ampo nga kita unta mopaambit niadtong mga pulong uban niadtong atong gihigugma. Ako mopamatuod nga ang Dios nga atong Amahan buhi ug nahigugma sa tanan Niya nga mga anak. Si Jesukristo mao ang Iyang Bugtong Anak diha sa unod ug ang atong Manluluwas. Ako nasayud nga Siya nabanhaw, ug ako nasayud nga kita malimpyohan pinaagi sa pagkamasulundon ngadto sa mga balaod ug mga ordinansa sa ebanghelyo ni Jesukristo.