Kalauni Talatala, Kalauni ʻo e Ikuna

Ko ʻAokosi ʻi he Fonua Tapú. Naʻe hā ngingila ʻa e ngaahi fale holo ʻo Kāpaneume kuo maumau mo tuʻu takai ʻiate kimautolú ʻi he vela ʻo e hoʻataá. Ko ha feituʻu fakaofo ʻeni ke te ʻi ai, ka naʻe kiʻi fuoloa e longoaʻa homau tokotaha taki mamatá mo ha kakalu naʻe ofi ange pē, pea kamata ke ʻalu ʻeku fakakaukaú ʻi ha ngaahi meʻa kehe.

Fakafokifā ne foki mai ʻeku fakakaukaú ʻi ha tuhu ʻa e tokotaha taki mamatá ki he fuʻu ʻakau naʻa mau fakamalumalu aí ʻo ne pehē mai, “ ʻOku nau ui ia ko e fuʻu ʻakau ‘kalauni talatalá’.” Ne u hanga hake ki he ngaahi vaʻa kuo fonu he laú. Ko e fē ngaahi talatalá? Ne u ala atu ʻo fusiʻi ofi mai hano kiʻi vaʻa.

Ne u sio ki he ngaahi talatalá ʻi loto he ngaahi lau pelepelengesí. Naʻe pahauhau mo lanumata, māsila ʻaupito mo lōloa tatau mo hoku motuʻa tuhú, pea he ʻikai ke te lava ʻo sio ki ai kae ʻoua kuo ofi mai ʻaupito. Ka ko e mamahi moʻoni ka ala ki ha taha ʻo e ngaahi vaʻa ko iá.

Ne u fakakaukau ki he ngaahi tāvalivali lahi ne u sio ai ki he tuʻu ʻa e Fakamoʻuí ʻo fai hono manukiá ʻi ha fakamāuʻanga, kuo fakapulupulu lanu vāleti Ia mo tui ha kalauni ngaohi mei he vaine talatala mōmoa. Ne haʻu fakafokifā ʻa e fakakaukau kiate au naʻe fie maʻu ʻe he pōpula pe sōtia naʻá ne fatongia ʻaki hono ngaohi ʻa e kalauní ke ngāue ʻaki ha ngaahi vaʻakau lanumata ʻoku mapelungofua ʻo hangē ko e fuʻu ʻakau ʻi ʻolungá—kae ʻikai ko e ngaahi vaʻakau mōmoa pea mafesifesingofua. ʻOku toe mahino ange ko e taumuʻa o e kalauní naʻe ʻikai ngata pē ke fakamamahiʻi, ka ke lumaʻi mo manukia.

ʻI he kuonga muʻá, naʻe faʻa foaki ha kalauni pe pale lauʻi ʻakau lanu mata—ka naʻe faʻa fakaʻaongaʻi pē ha lou maile namukakala—kiate kinautolu ne nau ikuna ha ngaahi feʻauhi pe feingatau. Naʻe fakakahoa ʻaki e ngaahi ʻīmisi ʻo e ngaahi tuʻí mo e kau ʻemipolá ha ngaahi kahoa lou maile. Mahalo ko e kalauni talatala naʻe lomiʻi hifo hono ʻulú ʻo aʻu ki hono fofongá naʻe ʻi ai ʻa e lauʻi ʻakau pea ko e lanumatá ko e manuki fakatātā ia ki he fakalāngilangi fakakuongamuʻa ko iá. Ko e kiʻi fakamahamahalo pē ka ʻoku ʻikai ko e tokāteline. Ka kiate au, ʻi heʻete sioloto pehē atu ki aí ʻokú ne fakamaama lelei mai ʻa e taha ʻo e ngaahi ʻuhinga ʻo e Fakaleleí: ʻoku ʻafioʻi ʻe he Fakamoʻuí ʻa ʻetau ngaahi mamahí pea ʻokú Ne malava leva ke fakamoʻui kitautolu.

Ko e pulupulu ne ʻai kiate Iá ko ha fakaʻilonga manuki ia ʻo e pehē ko ha tuʻi. Naʻá ne ʻufiʻufi ʻa e ngaahi matakafo mo e ngaahi lavea mei he kauʻimaea ne toki fakahoko kiate Iá. ʻI he taimi tatau pē, ʻe hā ha kalauni talalala ʻo hangē ha pale ʻo ha taha naʻe ikuna ka ko ʻene fūfuuʻi pē ʻa e mamahi naʻá ne fakatupú.

ʻOku mamahi hotau tokolahi ka ʻoku ʻikai lava ke mamata ki ai ha taha. ʻOku akoʻi mai ʻe he himí [“ ʻoku fufū ʻi he lōngonoa ʻo e lotó ʻa e mamahi ʻoku ʻikai malava ke mātā”] (“ ʻEiki, Te u Muimui Atu,” Ngaahi Himi, fika127). Ka ʻoku ʻafio ki ai ʻa e Fakamoʻuí. ʻOkú ne maheni lelei mo e mamahi ʻoku ʻikai ʻilo ki ai ha tahá. Naʻe fakahoko kotoa ʻEne ngāue fakafaifekaú ko e teuteu ki he Fakaleleí mo e Toetuʻú. Ka ne ʻikai ʻilo ia ʻe kinautolu naʻá Ne akonekina mo faitāpuekiná. Naʻa mo ʻEne kau ākongá naʻe ʻikai ke nau ʻilo.

ʻOku ʻafioʻi ʻe he Fakamoʻuí ia ʻo fakalaka atu ʻi he “ngaahi pulupulu” mo e ngaahi “kalauni” ʻoku nau fūfuuʻi ʻetau ngaahi mamahí mei he niʻihi kehé. Hili ʻEne kātakiʻi ʻa e “ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē,” ʻokú Ne fonu ʻi he ʻaloʻofa peá Ne ʻafioʻi e founga ke tokoniʻi ʻaki kitautolu ʻi he taimi ʻoku tau tuku ai ʻetau ngaahi kavengá ʻi Hono veʻe toʻukupu kelekelé (vakai, ʻAlamā 7:11–12). Ko Ia ʻa e lolo faitoʻo te ne lava ke fakamoʻui ʻo aʻu ki he ngaahi kafo ʻoku ʻikai haá. Pea ko e kalauni ʻokú Ne hapai mai kiate kitautolú ko e kalauni moʻoni ia ʻo e tokotaha ikuná.