Ko ʻEku Ongo Kiʻi Pone Naʻe Tui-Kolosí

Ko ha taʻu nai ʻeni ʻe taha ʻeku ngāue ki hono tui-kolosi ha fakatātā ʻo ha ongo kiʻi pone. Naʻe meimei ʻosi peá u fakatokangaʻi naʻe fehālaaki e lanu ʻo e taha ʻo e ongo kiʻi poné. Naʻe feʻunga pē lanú ia mo e kili ʻo ha hoosi, ka naʻe ʻikai ke u ʻilo ʻeku fehālākí ka ne taʻe ʻoua ʻeku sio ki he fepaki e lanu ʻo e poné mo e ngaahi lanu kehe ʻi he fakatātaá.

Ne u loto-mamahi ʻaupito. Naʻá ku fakamoleki e taimi lahi ki heʻeku fakatātaá, pea ne u meimei ongoʻi lōmekina he fakakaukau atu ki hano toe vete kotoa ʻo e lanu naʻe halá. Ne u fakatē loʻimata pē mo fakaava e kapa vevé ʻo lī ki ai e fakatātaá.

Ne u nofo hifo he tēpile ne tauhi ai ʻeku ʻū nāunau tuituí ke tengihia e mole ʻeku fakatātā ʻo e ongo poné pea ke hoko atu ki ha ngaahi ngāue kehe. Ka naʻe ʻikai ke u lava ʻo fai ʻeni—naʻe ʻikai lava ke u tafoki hake pē ʻo liʻaki e meʻa ne u ngāue lahi ke ngaohí. Ne u fakaava e kapa vevé ʻo toe toʻo mai e konga tupenú. Ne u maʻu ha fakapona ʻi he tafaʻaki ki mui ʻo e lanu naʻe halá ʻo kosiʻi fakalelei. Ne u fulihi hake e fakatātaá ʻo kamata vete e filó.

Naʻe vave hono veté he taimi ʻe niʻihi. Naʻe ʻikai fuʻu faingofua he taimi ʻe niʻihi. Naʻe ʻikai ke u fakapapauʻi pe ʻe vete fēfē e meʻa kuó u faí. Taimi ʻe niʻihi naʻe pau ke u kosi tahataha ʻa e mataʻi tuituí. Naʻe talamai ʻe heʻeku tamasiʻí ʻene tanganeʻia heʻeku fakahoko e fuʻu ngāue lahi ko ia ke fakaleleiʻi ʻaki e fehālākí. He ko ha fakatātā pē ia naʻe tui-kolosi.

ʻI heʻeku vete e ngaahi mataʻi tuituí, naʻe kamata ke u fakakaukau ki he fakatomalá mo e faingataʻa ke fakatonutonu ʻeku ngaahi fehālaakí. ʻOku fie maʻu ʻa e holi lahi, ngāue, mo e loto-mamahi ki he fakatomala moʻoní, ka ʻoku feʻunga pē ia.

ʻI heʻeku toe tui foʻou e hōsí, naʻá ne fakamanatu mai ʻoku hanga ʻe he fakatomalá ʻo ʻai ke toʻo atu ʻe he Fakalelei ʻa Sīsuú ʻa e lanu ʻo e angahalá mei heʻeku moʻuí pea tokoni ke u toe kamata foʻou. ʻOku tautau ʻi hoku ʻapí ʻeku “ongo kiʻi pone ʻo e fakatomalá”, ko ha fakamanatu ke u fai ʻa e meʻa totonú, ke ʻoua naʻá ku teitei foʻi he taimi ʻoku ou tōnounou aí, pea manatu ʻe fakahoko ʻe he Fakaleleí ʻa e fuʻu lelei lahi ʻo fakafou ʻi he fakatomalá.