Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.
“Ke Manatu Maʻu Ai Pē Kiate Ia,” peesi 20: Fakakaukauʻi hano aleaʻi fakafāmili ʻo e faleʻi ʻa ʻEletā Kulisitofasoní, “ʻE lava ke tau kamata ʻaki hono toʻo atu ʻo e meʻa kotoa pē mei heʻetau moʻuí pea toe fakafoki pē kinautolu ʻo fakatatau ki he meʻa ʻoku mahuʻingá pea fokotuʻu ʻa e Fakamoʻuí ʻi lotomālie.” Fakakaukau ke mou talanoa ki ha niʻihi ʻo e ngaahi tāpuaki ʻoku lau ki ai ʻa ʻEletā Kulisitofasoni ʻo pehē te tau maʻu ʻi “heʻetau manatu maʻu ai pē ki he Fakamoʻuí.”
“Mālohi ʻo e Folofolá,” he peesi 52: Hili hoʻomou lau fakataha ʻa e fakamatala ko ʻení, fakaafeʻi e kau mēmipa ʻo e fāmilí ke vahevahe ʻa e ngaahi meʻa ʻoku nau ongoʻi fekauʻaki mo hono lau e folofolá mo e ʻalu ki he seminelí. Fakaafeʻi kinautolu ke hiki ʻenau fakamoʻoni kau ki he mālohi ʻo e folofolá ʻi heʻenau ngaahi tohinoá. Fakalotolahiʻi hoʻo fānaú ke ako mo ako maʻuloto ha ngaahi potufolofola.
“Ko e Sīsū Kalaisi ko e Fakalaloá,” peesi 56: ʻI hoʻomou lau fakataha e fakamatalá, fakaafeʻi homou fāmilí ke nau fakafanongo ki hono mahuʻinga ʻo ha fakalaloa. Fehuʻi ange pe ko e hā ne mei hoko ʻo kapau naʻe ʻikai ha fakalaloa ke tokoni ki he tangata naʻe moʻuá. ʻE lava foki ke mou lau e ngaahi potufolofola kau ki he founga ne hoko ai ʻa e Fakamoʻuí ko hotau fakalaloá pea mou aleaʻi ia. Fakakaukau ke lau ʻa e 2 Nīfai 2:27–28 mo e ʻAlamā 42:24–25.
“Kuo Teuteu Lelei Kotoa,” peesi 70: Fakakaukauʻi ke fakaafeʻi e kau mēmipa ʻo e fāmilí ke nau tui ha faʻahinga teunga pe ʻai ke pehē ko ha tokotaha kehe kinautolu. ʻOange ha faingamālie ke takitaha vahevahe ʻe he tokotaha kotoa pe ko hai kinautolu. Hili hono lau e talanoá, fakamatalaʻi ange, neongo pe ko hai kitautolu, ko e fānau kitautolu ʻa e ʻOtuá ʻi he taimi kotoa pē.
Ngaahi Taimi Fakafiefia mo e Ngaahi Haʻi Taʻengatá
ʻI he kei iiki ʻeku fānaú, naʻa nau saiʻia maʻu pē ke vaʻinga hili e efiafi fakafāmili ʻi ʻapí. Ko e taha ʻo e ngaahi vaʻinga ne nau saiʻia taha aí “Ko e ʻElefānite ko Tulangí,” ʻa ia naʻe fakahingoa ki ha foʻi hiva naʻe ako ʻe homa ʻofefine ko Soseliné ʻi he akó. Hili ʻemau hivaʻi kotoa e foʻi hivá, te u hoko leva au ko Tulangi pea ʻe heka e fānaú ʻi hoku tuʻá. ʻUluakí, ko hoku foha taʻu ua ko Siaosí; hoko mai ai hoku ʻofefine taʻu fā ko Soseliné, pea heka fakamuimui hake hoku uaifi ko ʻElisapesí. Naʻe heka e toko tolú ʻi hoku tuʻá ka u ʻalu takai he loki talanoá. Naʻe maʻu ai ʻemau fiefiá.
Hili ha ngaahi taʻu lahi, ne fakatou tatali ʻema ongo tamaiki lalahí ki hona uiuiʻi ke ngāue fakafaifekaú. Lolotonga ʻemau efiafi fakafāmili ʻi ʻapi ʻe taha, naʻa nau manatuʻi hake ʻa “Tulangi ko e ʻElefānité.” Naʻa mau hivaʻi fakataha e foʻi hivá, pea hili ia ha ngaahi taʻu lahi, ne u toe hoko pē ko e ʻelefānite. Ne tomuʻa kaka ki hoku tuʻá ʻa hoku fohá, hoko ai hoku ʻofefiné, pea heka fakamuimui hake hoku uaifí. Naʻá ku tō foʻohifo he falikí, pea talu ai pē ʻemau kata.
ʻOku hanga ʻe heʻemau manatu ki he momeniti ko ia ʻo ʻai kimautolu ke mau fakamālō naʻe akoʻi kimautolu ʻe he kau palōfitá fekauʻaki mo e efiafi fakafāmili ʻi ʻapí. Naʻa mau ʻiloʻi neongo ko e fanga kiʻi efiafi fakafāmili ʻi ʻapi faingofua pē ne mau faí, ka ko e meʻa mahuʻinga tahá ʻa e ngaahi taimi fakafiefia mo homau ngaahi fāmilí, ko ha ngaahi taimi naʻa ne fakamālohia homau ngaahi haʻi taʻengatá.
Vikitā D. Sousa Livela