ʻOku ou saiʻia ʻi he makasini ko ʻení mo e ngaahi meʻa kotoa ʻi aí. ʻOku ou manako he ngaahi fakamatala ʻa e Kau Taki Māʻolungá, fakatautefito ki he ngaahi lea he konifelenisí. ʻOku nau fakahinohino mo fakalotolahiʻi kitautolu ke tau laka atu ki muʻa neongo e ngaahi faingataʻá.

Ko e taʻu ʻeni ʻe 26 ʻeku kau ki he Siasí, pea kuó u lau e tatau kotoa pē ʻo e Liahoná. ʻOku faʻa lau e ngaahi pulusinga ʻo e kuo hilí, pea ko e taha ʻo e fakamatala ʻoku mahuʻinga makehe kiate au “Ko e Ngaahi ʻAloʻofa Ongongofua ʻa e ʻEikí,” fai ʻe ʻEletā Tēvita A. Petinā (Mē 2005, 99). ʻOkú ne tokoni ke u manatuʻi ʻa e faʻa tokoni ʻa e Tamai Hēvaní ʻaki ʻEne ngaahi ʻaloʻofa ongongofuá ʻo toʻo atu ʻetau ngaahi mafasiá.

ʻOku ou fakamālō ʻi hono maʻu e ngaahi lea ʻa e kau palōfita moʻuí ʻi he māhina kotoa pē. ʻOku ou ʻilo ʻoku mei he ʻEikí ʻenau ngaahi akonakí pea te ne faitāpuekina ʻeku moʻuí ʻo kapau te u moʻui ʻaki ia. ʻOku fakamālohia ʻeku tuí mo e fakamoʻoní ʻi heʻeku lau e ngaahi meʻa naʻe aʻusia ʻe he Kāingalotu he funga māmaní he ʻoku ou ako ʻa e meʻa ʻoku fai ʻe he niʻihi kehé ke lavaʻi ʻaki ʻenau ngaahi mafasiá.