Naʻe ʻaʻahi ʻa ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá ki Kuamu ʻi Tīsema ʻo e 2010 ke fokotuʻu ʻa e Siteiki Peliketa Kuamú, ko e fuofua siteiki ʻi he vahefonua ko Kuamú. Lolotonga e ʻi ai ʻa ʻEletā Peulí, ʻa ia naʻe kau ʻi he Kau Tau Tahi ʻa e ʻIunaiteti Siteití ʻi he Tau Lahi Hono II ʻa Māmaní he feituʻu ko iá, naʻá ne toe ʻaʻahi ki he Musiume ʻo e Tau he Pasifikí mo e motu hoko mai ko Saipení. Ko e kāingalotu ʻe toko 1,971 ʻo e Siasí ʻoku nofo ʻi Kuamú. Ko e vahefonua Kuamú ko e konga ia ʻo e ʻĒlia ʻĒsia Noate ʻo e Siasí.

Naʻe fakamoleki ʻe ha kau toketā ʻa e Siasí ha taimi ki hono faitoʻo ʻo kinautolu naʻe puke ʻi he tō ʻa e kōlelá ʻi he ngaahi kolo mamaʻo he tokelau-hihifo ʻo Pāpua Niu Kiní ʻi he konga ki mui ʻo e 2010.

Naʻe ngāue e kau toketaá ki ha toko laungeau naʻe puke, ʻo fakahaofi ai ha tangata ʻe taha naʻe lau miniti pē pea mālōlō ʻi he taimi naʻe aʻutaki hake ai ki falemahakí pea mo ha niʻihi kehe naʻe ʻikai ke mei aʻu ʻenau moʻuí ʻo houa ʻe 24 kapau naʻe ʻikai faitoʻo kinautolu.

Naʻe omi e kakaí pea haʻu pōpao mo e niʻihi ki he kau toketaá. Naʻe pehē ʻe Tēvita Uiliamisi mo ʻAnitoni Mahe mei Keeni naʻá na faitoʻo ʻi he ʻaho pē ʻe taha hili ʻena aʻu atu ki he kiʻi kolo ko Sokelé ha toko 200 tupu naʻe puke he kōlelá. Ko e lau ʻeni ʻa Toketā Mahe fekauʻaki mo e meʻa fakakātoa ne hokó, “Ko e meʻa fakafiefia taha ia ʻi heʻeku moʻuí ʻi heʻeku ngāue fakapalofesinalé,” neongo ʻa e ngaahi faingataʻá mo e helaʻia he lahi ʻa e ngāué.

Ne ʻikai ngata pē hono ʻoatu ʻe he Siasí ʻa e kau toketaá, ka naʻá ne ʻoatu foki mo ha ngaahi nāunau tokoni, kau ai ʻa e tokoni fakafaitoʻo mo e ngaahi nāunau ke fakamaʻa ʻaki ʻa e vaí. Naʻe uta atu foki mo e meʻakai pea mo e koa mei he Siasí ʻi Pooti Molasipei ki he ngaahi feituʻu naʻe faingataʻaʻiá, pea uta atu mei Pooti Molasipei mo Pilisipeini ʻa e ngaahi nāunau ki he moʻui leleí. Naʻe ʻalu ki Pāpua Niu Kini ha faifekau hoa mali ʻokú na taukei ʻi hono faitoʻo ʻo e vaí ke tokoni ʻi hono fakafekauʻaki e ngaahi ngāue tokoní.

Naʻe kamata tufaki ʻe he Siasí ʻi Sānuali ki he ngaahi ʻiuniti ʻo e Siasí ʻi māmani kātoa ʻa e DVD Ki Hono Fakamālohia ʻo e Toʻu Tupú ki he 2011, ko e We Believe, ke fakaʻaongaʻi ʻi hono poupouʻi ʻo e kaveinga ʻa e Mutualé ki he 2011.

ʻOku fonu e foʻi DVD ʻi he ngaahi nāunau kehekehe kuo fakataumuʻa ke tokoniʻi e toʻu tupú ʻi hono ʻai ke hoko ʻa e kaveingá, Ngaahi Tefito ʻo e Tui 1:13, ko ha konga mahuʻinga ʻo ʻenau moʻuí. ʻOku hā ʻi he ngaahi kongá ʻa Palesiteni Tōmasi S. Monisoni, ongo palesiteni lahi ʻo e Kau Talavoú mo e kau Finemuí, mūsika, ngaahi fakamoʻoni ʻa e toʻu tupú, mo ha ngaahi meʻa lahi.

Ko e konga lahi ʻo e DVD ko ha ngaahi fakamoʻoni ʻa e toʻu tupú mo ha ngaahi meʻa naʻe hoko ko ha fakaʻaiʻai kiate kinautolu.

ʻE lava ke fakaʻaongaʻi ʻa e mūsiká, ngaahi pōpoakí, mo e ngaahi fakamoʻoní ke fakalahi ʻaki ki he ngaahi kalasi ʻa e toʻu tupú, ngaahi fakatahaʻangá, mo e ngaahi ʻekitivitī ʻo e taʻú kakato.

ʻOku maʻu kotoa e nāunaú ʻi he ʻInitanetí ke fai hono hiki ʻi he youth.lds.org.

ʻOku kau foki ʻi he foʻi DVD ʻa e liliu ʻi he ngaahi lea fakafonua ko ʻení: Faka-Siaina, Pilitānia, Falanisē, Siamane, ʻĪtali, Siapani, Kōlea, Potukali, Lūsia, mo e faka-Sipeini.