Ngaahi Fakapale ʻo e Toe Langa Foʻoú

Ne u maʻu ʻa e faingamālie ʻi heʻeku nofo ʻi Sengihai, ʻi Siainá, ke ʻalu mo ha kiʻi kulupu mei ʻapiako ki he Vahefonua Sesivaní ʻi he feituʻu fakatonga-hihifo ʻo Siainá ʻo tokoni ki hono langa ʻo e ngaahi fale moʻonautolu ne tukuhausia hili e mofuike ne tō he feituʻu ko iá he ngaahi taʻu siʻi kuo hilí. Ne mau ngāue mālohi ʻi hono fakatoka e pilikí, heu e motá, teke holo e ngaahi saliote fonu he pilikí, mo fetuku hifo e pilikí ʻi he ʻotu laine “ ʻo e kakai.” ʻI he ʻaho hono uá ne avaava hoku kofunimá. Ka ko ha meʻa ʻeni ke fakangalongataʻa kiate au peá ne fakamālohia ʻeku fakamoʻoni ki hoku mahuʻinga fakatāutahá, ko e taha ʻo e ngaahi tuʻunga ʻulungāanga mahuʻinga ʻo e Kau Finemuí, pea mo e tokotaha fakafoʻituitui kotoa pē.

ʻI he ʻaho takitaha ne u ngāue mālohi aí, ne u fakatokangaʻi ʻa e tupulaki ʻeku tui ki hoku mahuʻinga fakatāutahá. Ne u ongoʻi leleiʻia ʻiate au pē he ne u fai ha ngaahi meʻa ke fakaleleiʻi ai ʻa e nofoʻanga ʻo kinautolu ne faingataʻaʻia ange ʻiate aú.

Ne mau maʻu foki ʻa e faingamālie ke ʻaʻahi ki ha ʻapiako he feituʻú. ʻI heʻemau aʻu atú, ne lele mai ha fanga kiʻi tamaiki fakaʻofoʻofa kiate kimautolu. ʻI heʻeku vakai ki he kiʻi fānaú ni, ne u fakatokangaʻi foki mo honau mahuʻinga fakatāutahá. Ko e fānau fakaʻofoʻofa kotoa kinautolu ʻa e ʻOtuá, pea ne u ongoʻi mālohi ʻokú Ne ʻofa mo ʻafioʻi kinautolu takitaha.

ʻI he ofi ke u fokí, naʻe ʻi ai homau faingamālie ke mau ō ʻo kai hoʻatā ʻi ha falekai ʻe taha. Ka ʻi heʻemau aʻu atu ki aí, kuo ʻosi haveki ia ʻe he mofuiké. Ko e maumau lahi taha ia kuó u mamata ai. Ne u ongoʻi te u tangi. Ne holo e ʻaofi mo e ngaahi holisí ʻo e falé, holo mo e ʻuluʻakau ofi aí, pea naʻe vevea e feituʻu kotoa pē. Ne teka hifo mei he moʻungá ha fuʻu maka ʻo haveki e tafaʻaki ʻo ha fale ʻe taha ʻo holo hifo ai pē ʻató mo e holisí. Naʻe lī he taha ʻo e ngaahi veʻe matapaá ha kiʻi sū ʻe taha.

ʻI heʻeku fakakaukau ki heni mo e kakai ne mate ʻi he fakatamakí ni, ne u feinga ke mahino kiate au pe naʻe anga fēfē hono tuku ʻe he Tamai Hēvaní ke hoko ʻa e meʻá ni. Naʻe ʻikai ʻapē ke Ne ʻofa ʻiate kinautolu? Peá u manatu leva ki he meʻa ne mau aleaʻi ʻi he kalasi ʻa e Kau Finemuí peá u ʻiloʻi, ʻio, naʻá Ne ʻofa ʻiate kinautolu. Naʻá Ne ʻafioʻi mo ʻofa ʻiate kinautolu fakafoʻituitui. Ko kinautolu naʻe mate ʻi he ʻaho ko iá ko e fānau kotoa ʻa e ʻOtuá. ʻI he kamataʻangá, ne u toe ongoʻi loto mamahi ange he fakakaukau ki aí. Ka ne u toki ʻiloʻi kuo ʻi he maama ʻo e ngaahi laumālié ʻa e kakai ia ko ʻení pea ʻe lava ke nau toe foki ki he Tamai Hēvaní. Ne fakafiemālieʻi au ʻe he fakakaukaú ni peá ne ʻomi ha ongo ʻo e melino.

ʻOku ou ʻilo ko e fānau au ʻa e ʻOtuá, pea ʻi ai hoku mahuʻinga lahi fakatāutaha. Ko e fānau kotoa kitautolu ʻa ʻetau Tamai Hēvaní, pea ʻokú Ne ʻafioʻi kitautolu fakatāutaha. ʻOkú Ne maʻu ʻa e ʻofa kiate kitautolu ʻa ia ʻoku lahi ange mo mālohi ange ʻi he meʻa ʻe lava ke tau fakakaukau atu ki aí. Naʻe fakatō loloto ʻa e mahino ko ʻení ʻi hoku lotó lolotonga ʻeku ngāue mo tokoni ki he kakai naʻe faingataʻaʻia lahi ʻi he mofuike ʻi Sesuaní.