Ko e Tokoni ʻi Hoku Tāpuakí

Ne u ngāue ʻi he Misiona Tekisisi Hiusitoni Sauté ko ha ʻeletā lea faka-Sipeini. Ne ma tukituki atu mo hoku hoá he ʻaho ʻe taha ʻi ha ngaahi matapā, ko e feinga ke maʻu ha taha ke ma akoʻi. Naʻá ma aʻu mai ki ha fale ʻoku ʻi ai e fuʻu ava ʻi hono falefakatolo papá.

Naʻe fakaava hake ʻe ha fefine matuʻotuʻa ʻa e matapaá pea fakaafeʻi kimaua ki loto. Naʻe ʻikai ke u ʻilo fakapapau pe naʻá ne ʻiloʻi ko hai kimaua mo ʻema meʻa naʻe faí, ka naʻá ne anga fakaʻapaʻapa ʻaupito. Naʻá ma kamata akoʻi ki ai e lēsoni ʻuluakí, pea hangē naʻe lele leleí pē. Naʻe hoko e taimi ke u akoʻi ai ʻo kau kia Siosefa Sāmita mo e ʻUluaki Mata-Meʻa-Hā-Maí. Naʻá ku vakai ki he fakaʻau ke hā e puputuʻu mei he mata ʻo e fefiné ʻo fakaʻau pē ke lahi. Naʻe ʻilonga ʻa e ʻikai ke fuʻu mahino ki ai e meʻa ne u feinga ke fakamatalaʻi angé.

Hili haʻaku ngaahi fehuʻi fekauʻaki mo e meʻa kuó ma fakamatala ki aí pea mo e lahi ʻo e meʻa naʻe mahinó, ne kamata ke u ʻita ʻi he ʻikai mahino ki ai ʻa e ʻUluaki Mata-Meʻa-Hā-Maí. Ko e ʻaho lahi ʻeni ʻo e ngāué, pea ko e meʻa fakamuimuitaha pē ʻe fie maʻu ʻe ha faifekau ko e ʻikai mahino ki ha taha ʻa e meʻa ko ia ʻokú ne fuʻu fie maʻu ke ʻilo ʻe he kakaí ʻoku moʻoní.

ʻI he sekoni pē ko iá ne kamata ke u ʻita, naʻe haʻu ki heʻeku fakakaukaú ha kiʻi konga mei hoku tāpuaki fakapēteliaké. Ko ha konga naʻe kau ki hoku fāmili ʻi he kahaʻú ʻo faleʻi ai au ke u akoʻi ki heʻeku fānau ʻi he kahaʻú e ngaahi fakakaukau fekauʻaki mo e ongoongoleleí. ʻI heʻeku fakakaukau ki he palakalafi ko iá, ne u ʻiloʻi ko hono talamai ia ʻe he Laumālié ke u akoʻi e fefine loto fakatōkilaló ni ʻi he founga te u akoʻi ʻaki ha kiʻi tamasiʻi.

Ne u kamata akoʻi ʻaki ia ha founga faingofua mo angaʻofa. Ne u fakakaukauloto pē ki he nofo takai ʻeku fānaú ʻi he loki talanoá ʻo sio hake kiate au, ko ʻenau tamaí, ka u akoʻi kinautolu fekauʻaki mo e Palōfita ko Siosefa Sāmitá. Meʻa fakaofo moʻoni ʻa e vakai ki he liliu ʻi hono fofongá. Ne liliu ʻa e fofonga puputuʻú ki he tokanga mo e ofo. ʻI heʻeku fai ʻa e talanoa ki he hā ʻa e Tamai Hēvaní mo Sīsū Kalaisi kia Siosefa Sāmitá, naʻe tafe hifo hono loʻimatá ʻi hono kouʻahé. Ne fakafonu e lokí ʻe he Laumālié, pea liliu ʻeku ʻitá ʻo hoko ko e fiefia lahi.

He ʻikai teitei ngalo ʻiate au e meʻa ko ʻeni ne hokó. ʻOku ʻikai te u faʻa tatali ke akoʻi e ngaahi tefitoʻi moʻoni tatau ki heʻeku fānaú ʻi ha ʻaho pea toe ongoʻi ʻa e fiefia tatau mo ia.