Fausiaina o La’u Faaipoipoga e Faavavau

Ao ou talavou, sa ou atiina ae le faatuatua faapea o le faaipoipoga o le a avea ma se aafiaga matagofie ma faavavau. Ae peitai, sa faigata ia te au le talitonu i ai i taimi uma, ona o faataitaiga o faaipoipoga sa ou ola ae ai e le’i malolosi, ma sa ou tuuina lava i totonu o lo’u loto le popole i le faaipoipoga. Ae sa ou naunautai lava ina ia le pule le toilalo ma le le fiafia ae o le a fesoasoani mai le Tama Faalelagi ina ia ou iloa le auala e maua ai se faaipoipoga fiafia.

Ina ua 26 o’u tausaga, sa ou faaipoipo atu ia Sidnei i le Malumalu o São Paulo i Pasila. Ao ma tafafao faamasani, sa ma taumafai lava e saunia i maua lava faaleagaga ma faalelagona mo le mea o le a tupu e sili ona taua i o maua olaga. Sa ma filifili i le ituaiga faaipoipoga sa ma mananao i ai, sa ma faatuina faatasi ni sini, ma sa fefaasoaai o maua manatu—o a maua molimau i le talalelei, o ma moomooga ma popolega, ma a ma miti. Sa ma faitauina foi faatasi le apoapoaiga a perofeta e uiga i le faaipoipoga. Sa ma faia mea uma ma te mafaia e saunia ai, ma moomoo ina ia saunia le fiafia ma le puipuiga o le tasi ma le isi faapea le ma fanau i le lumanai. Sa ma talosaga atu i le Alii e aumai ia i maua le poto e ola ai i se olaga fiafia.

Ua atoa nei le 18 tausaga talu ona ma faaipoipo. I le aluga o nei tausaga, o loo faaauau pea ona ma aoao mai i mataupu o le talalelei, i fautuaga a o tatou taitai, ma, ioe, faatasi ai ma le Agaga. O nisi o mea na ma faia ina ia malosi ma fiafia ai le ma ulugalii o le:

1. Tatalo faatasi i aso uma. Pe a ma tatalo i le po, ma te faafetai i le Tama Faalelagi mo le ma ulugalii, mo le alofa o le tasi i le isi, ma e ma te aioi atu ina ia faamalosia o ma’ua lagona ma maua le malosi faaletagata lava ia e feagai ai ma fuafuaga a le fili, lea e galue e faataumaoi ia aiga.

2. Aioi atu mo le faamagaloga. Ma te galulue ia aua lava nei faatagaina le faamaualuga e taofia i ma’ua mai le aioi atu mo le faamagaloga po o le ta’u sa’o atu ua ma sese. E sili atu le taua o le alofa ma le lotogatasi nai lo le iloa po o ai e sa’o ae po o ai foi e sese.

3. E le faia lava se tala leaga e uiga i isi. E manino lava e leai se tasi o i ma’ua e atoatoa, ae ma te le faia lava ni tala leaga e uiga i le tasi ma le isi, ma pe a matou faatasi ma nisi, ma te talanoa i mea lelei e uiga i le tasi ma le isi.

4. Puipui le faavae o le faaipoipoga. Soo se taimi ma te maua ai se avanoa—aemaise lava pe a siomia e tagata o e faitio i le faavae o le faaipoipoga—ma te tutu atu mo aiga ma mea ua ma talitonu i ai.

5. Talanoa soo ma faalogo. Ma te taofia mea ma te faia ina ia matuai faalogo atu pe a o talanoa se isi tagata.

6. Ia taulimaina e le tasi le isi i le alofa ma le agalelei. Ma te le faatiga, tuuaia, pe faitioina le tasi ma le isi.

7. Saili pea lava pea le fesoasoani ma fautuaga e uiga i faaipoipoga mai tusitusiga paia ma i saunoaga a perofeta i nei onapo. Ma te le iloa mea uma. Ma te le atoatoa ma e tele ina galo ma faia ni mea sese. Ma te mananao ia aua nei faatali mo ni faafitauli e aafia ai i ma’ua, ae ma te galulue e fausia se ulugalii malosi ao le’i mafai e se mea ona faatiga i ma’ua.

Na fesoasoani nei mea i le faamalosia o le sootaga i lo ma va ma lo’u toalua. Ou te iloa afai ma te fefaasoaai o ma ola ma o ma lagona ma le Tama Faalelagi ma saili le fautuaga mai ia te Ia, o le a musuia i ma’ua e le Agaga Paia ma o le a mafai ona faavavau lo ma aiga, ma manumalo ai i taimi faigata uma. Ma te iloa foi o le a fesoasoani le Tama Faalelagi ia i ma’ua ao ma saili ina ia iloa ma faia Lona finagalo.