Lelei, Lelei Tele, Lelei Silisili

I lana saunoaga i le konafesi aoao ia Oketopa 2007, na saunoa ai Elder Dallin H. Oaks o le Korama a Aposetolo e Toasefululua e uiga i gaoioiga ia e “lelei, lelei tele, lelei silisili.” Ina ua ia oo i le vaega e uiga i le “soona fuafuaina o taimi o fanau mo gaoioiga” sa ou minoinoi ma le lagona ta’usalaina i lo’u nofoa.

Sa ou iloa ua tele naua mea o loo ou faia. Sa ou i ai i tala faatino a le aoga, aveina ni vasega faigata i le aoga, ma sa ou auai i le tele o isi gaoioiga. Ou te le’i toe auai ma le faamaoni i gaoioiga a Tamaitai Talavou, ma o ou Aso Sa ua faatumulia i le vevesi i le taumafaiga e faamaea meaaoga i le taimi mulimuli. O le faataitaiga o musika ma le toe faafouina o le niusipepa a le aoga ua le toe i ai se lagona malie e faatino ai ae ua avea ma galuega.

Na toe faapupula lelei lava au e le lauga a Elder Oaks i le faatulagaga o ou taimi. Na lelei a’u gaoioiga, ae ua matua tele lava. Sa manaomia ou te filifilia ni [gaoioiga] sili atu ona lelei. Ao ou taumafai e filifili po o fea o gaoioiga e lafoai, sa ou iloaina ai o le talalelei a Iesu Keriso o le mea sili lea e tatau ona faamuamua e soo se tagata. Sa ou tuuina i le pito i luga o la’u lisi le tatalo ma le suesueina o tusitusiga paia, ma e talu mai lena taimi, ua sologa lelei lo’u olaga.

Na aoao a’u e Elder Oaks afai tatou te faia mea e finagalo le Alii tatou te faia muamua o le a sologa lelei isi mea uma. Afai ou te suesueina a’u tusitusiga paia ae ou te le’i taalo i ni taaloga pe tusa foi o le faia o ni a’u meaaoga, o le a maea uma mea taua. Pe a faavae lo’u olaga i le Alii, nai lo le faaopoopo i ai o Ia pe a uma mea uma, ua i ai i lo’u olaga se fua faatatau faaopoopo o le filemu ma le faamanuiaina.

O le taimi nei ua ou matuai faaeteete lava e faalogo i fautuaga o loo tuuina mai i le konafesi aoao!