O Le Sauniga o le Faamauga e Fesootai Faatasi ai ia Aiga e Faavavau

Ao i ai i le lalolagi, e mafai ona tatou osia feagaiga paia (folafolaga) ma le Atua i le malumalu paia e ala i le pule o le perisitua. O loo i ai faatasi ma nei feagaiga le avanoa mo tane ma ava e faamau ai (faaipoipo mo le faavavau) ma faamau foi a latou fanau ia i latou. O lona uiga afai tatou te tausia a tatou feagaiga ma le Alii faapea i le tasi ma le isi, o le a le mafai e le oti ona tuueseeseina tumau i tatou. O lenei sauniga o le faamauga o se vaega taua o le fuafuaga a lo tatou Tama Faalelagi mo i tatou ina ia nonofo faatasi ma Ia e faavavau. (Tagai i le MFF 128:9–10; 132:19.)

O le taimi lava tatou te osia ai mo i tatou lava ia feagaiga o le malumalu, o le a mafai foi ona tatou aoina mai ia talafaasolopito o tatou aiga ma faatino sauniga o le malumalu mo o tatou tuaa ua maliliu. O lenei tulaga o le a maua ai e i latou ia sauniga o le malumalu (tagai i le MFF 138:29–37).

O le mana o le perisitua e faamau ai aiga na valoia anamua (tagai i le Malaki 4:5–6) ma faapea foi i onapo nei (tagai i le MFF 2). O valoaga uma e lua na faaalia ai o le a “totoina [e le perofeta o Elia] i loto o fanau o folafolaga na faia i tama, ma o loto foi o fanau o le a liliu i o latou tama” (MFF 2:2).

Na taunuu i le aso 3 o Aperila, 1836, le toe foi mai o Elia lea na folafolaina, i le Malumalu o Katelani i Ohaio, ISA faatoa uma lava ona faapaiaina, ina ua faaali mai Elia ma isi ma tuu atu i le Perofeta o Iosefa Samita ana ki o le perisitua (tagai i le MFF 110:13–15).

I le taimi nei, e 134 malumalu o loo faaaogaina i le lalolagi atoa, ma e mafai e tagata agavaa o le Au Paia o Aso e Gata Ai ona osia feagaiga ma le Atua ma faamauina o ni aiga mo le faavavau. E mafai ona latou toe foi mai e galulue e fai ma sui mo o latou tuaa ua maliliu, ona faataunuuina ai lea o le folafolaga o le liliu o loto o fanau i o latou tama.

E tatau ona tatou maua ia feagaiga ma sauniga faapitoa ina ia mafai ai ona toe foi atu e mau faatasi ma lo tatou Tama Faalelagi:

1. Ua papatisoina ma faamauina i tatou (tagai i le Mataio 3:16–17; Ioane 3:5; 2 Nifae 31:5–18).

2. E maua e alii le Perisitua Arona ona mulimuli ane lea maua le Perisitua Mekisateko (tagai i le MFF 128:11).

3. Tatou te osia i le malumalu ni feagaiga faaopoopo e fesootai ma le faaeega paia.

4. E faamauina (faaipoipo) i le malumalu ia tane ma ava mo le olaga nei ma le faavavau atoa.

5. E fananau mai tamaiti i se ulugalii ua faamauina “i totonu o le feagaiga.” O tamaiti e le fananau i totonu o le feagaiga e mafai ona faamau i o latou matua.

6. Ona tatou saunia lea o igoa o tatou tuaa mo galuega i le malumalu ma faatino ia sauniga e moomia mo i latou i totonu o le malumalu (tagai i le 1 Korinito 15:29; MFF 128:15–16, 24).