O loo galulue le Ekalesia e faaleleia atili le mafai ona maua i luga o le initoneti o ‘anomea ua faaliliuina i isi gagana e ese mai i le gagana Peretania, aemaise lava o le Liahona, o le mekasini faavaomalo a le Ekalesia.

O le sini, ia oo atu i le faaiuga o le 2011, o masina taitasi e lolomiina ai le Liahona i se gagana faapitoa, o le a mafai foi e tagata o le Ekalesia ona maua le lomiga atoa i luga o le initoneti i le mamanu PDF, faapea foi ma vaega taitasi o le mekasini i le mamanu e na o anotusi. E na o mekasini lava e lolomiina ia Aperila 2011 ma talaatu e aofia i lenei faiga.

O loo galulue foi le Ekalesia ia lomiaina e le aunoa ia Savali a le Au Peresitene Sili ma Faiaoga Asiasi i luga o le initoneti i gagana e 80. O nei savali e masani lava ona aofia ai i le Liahona pe lolomiina foi o se aitema e ese mai ai mo gagana e le i maua ai le Liahona.

E amata atu i le lomiga o Iuni 2011, o le a pueina ma tuu i luga o le initoneti i gagana Sipaniolo ma le Potukale ia lomiga faalogologo o mea uma e lolomiina i le Liahona. Ma le isi, o lomiga muamua e fa o le 2011, o le a pueina e pei ona sa faia i taimi ua mavae. E le o toe mamao foi ae oo mai lomiga faalogologo o le Liahona i isi gagana.

Ua faateleina foi le aofai o mea ua faaliliuina o le konafesi aoao e maua i le initoneti. Mo le konafesi aoao o Aperila 2011, sa faaliliuina ai lauga i gagana e 92. O lomiga e faalogologo i ai o ia gagana uma ua i luga o le initoneti i le conference.lds.org E lolomi e le Liahona le lomiga i le 33 o na gagana. O loo maua ia mea i le itulau faasino mataupu o le Liahona o Me 2011 i le liahona.lds.org

O loo faagasolo foi se galuega faatino o le lolomi i luga o le initoneti o taualumaga o le konafesi aoao mai le 1990 e oo mai i le taimi lenei i gagana e 25. Mai lava i le 1990, afai sa lomia se sauniga o le konafesi aoao i mekasini a le Ekalesia i se tasi o na gagana e 25, o le a kopiina ma tuu i le initoneti i mamanu PDF ma le HTML.

Faatasi ai ma le faalauiloaina lata mai nei o le tagavai a le Ekalesia i gagana Posenia, Masetonia, Montenegrin, Peresia, Silupa, ma le Iapese, ua silia ai nei ma le 100 gagana ua lomiaina ai le tagavai a le Ekalesia.

Sa amataina le galuega faatino ia Tesema 1995, ina ua faailoa mai e Peresitene Gordon B. Hinckley (1910–2008) e tatau ona faaaoga se tagavai fou a le Ekalesia. Sa mamanuina le tagavai ina ia avea le suafa o le Faaola ma vaaiga aupito iloga i le igoa aloaia o le Ekalesia, ma ua faaliliuina ma ta’ilolomi i ni gagana eseese talu mai lena taimi.

Ona o le igoa ma le tagavai a le Ekalesia o ni faailoa taua—ma ona o ni faailoga aloaia faavaomalo ua lesitalaina pe ua puipuia i le lalolagi atoa—ua fatuina ai e le Ekalesia ni taiala mo le faaaogaina tatau o le igoa ma le tagavai a le Ekalesia.

E mafai e iunite i le lotoifale ona faaaoga le igoa tusia o le Ekalesia (ae le o le faailoga o le tagavai) pe afai ua faamalieina tulaga uma nei:

• O le gaoioiga po o le faatasiga lea e faaaoga ai le igoa e lagolagoina aloaia e le iunite—mo se faataitaiga, o se polokalama o le sauniga faamanatuga.

• O le igoa o le iunite i le lotoifale o loo faaaoga e tomua i le igoa o le Ekalesia.

• O foliga o mataitusi e le faataitai pe tutusa ma le tagavai aloaia a le Ekalesia.

O le tagavai aloaia a le Ekalesia e na o mea lava ua faamaonia mai e le Matagaluega o le Faamaopoopoga i le laumua o le Ekalesia, e pei o vaega nei:

• Lomiga ma tusi ma mea e faaaoga aloaia a le Ekalesia

• Pine o igoa o faifeautalai

• Faailoga i fafo o falelotu

E le mafai ona faaaogaina le tagavai e avea o se elemene teuteu po o se ufilau [screensaver] o le komepiuta. E le mafai foi ona faaaogaina i soo se mea faaletagata lava ia, mea faapisinisi, po o ni mea faalauiloa.