Polokalama o le Tiute i le Atua faatasi ma Tamā

Ina ua uma ona aoaoina e uiga i le tamaitusi fou o le Tiute i le Atua i se faeasaite i le tausaga ua mavae, na naunau lava Aleks Miller—peresitene o le korama a tiakono mai le Uarota a North Shore, Siteki a Vancouver British Columbia—e amata loa. Sa la faatuina ma lona tamā se faagasologa o la feiloaiga i Aso Sa taitasi e galulue faatasi ai i se vaega o le tamaitusi.

“O vaiaso uma lava, ma te nonofo ai i lalo ma lo’u tama ma matamata solo i se vaega o le tusi,” o le tala lea a Aleks. Ma te amata i se tatalo, ona ma aoaoina lea o ni mea ma faitau ia mau. Ma te taliina ia fesili i le vaega ona tusi lea i lalo o le auala e mafai ona ma faatinoina ai mea na ma aoaoina.” O le tele o taimi e faasoa ai e Aleks i lona tina ia mea na la faatinoina ma lona tama. “Sa ou talanoa i lo’u tina e uiga i le faamanatuga ma le uiga o tatalo faamanatuga ma tusi i lalo nisi o manatu e uiga i le auala e mafai ai e au, o se tiakono, ona fesoasoani ina ia avea le faamanatuga ma se mea sili ona anoa ia te ia.”

E na o ni nai vaiaso o nei feiloaiga o le Tiute i le Atua faatasi ma Tama, ae iloaina e Aleks ua i ai se eseesega i lona olaga. “Sa ou maua ai le lagona lelei,” na fai mai ai o ia. O le saofafai faatasi i lalo ma lona tama e le o se mea muamua lea e manao Aleks e fai i le aoauli o Aso Sa, “ae o le taimi lava e amata ai ona ma suesue ma faitau faatasi, ua sili atu lo’u fiafia ma ua sili atu foi ona lelei ou lagona e uiga i le faataunuuina.”

Ua faatuina e Aleks ni sini fou ma ua mauaina se malamalama sili atu e uiga i le talalelei ao ia suesue ma aoao faatasi ma lona tama. “O se tasi o vaega i le tusi o le Tiute i le Atua o loo fautuaina mai lo tatou suesue i ni autu se lima i le Mo Le Malosi o le Autalavou ona tusi lea i lalo o se sini mo mea taitasi ina ia mafai ona e faaleleia,” o le faamalamalama mai lea a Aleks. “Sa ou filifilia le faamaoni. O se tasi la o a’u sini o le faailoa atu i ou matua pe a ou faia se mea sese nai lo le teuina ia te au lava.”

O le isi autu na filifili e Aleks o le aoaoga, “O la’u sini o le alu i le aoga mo se masina atoa e aunoa ma le faalogogata i le vasega ma ia faamaea uma au meaaoga ina ia leai sau meaaoga e fai i le fale. Ua manaia tele le aluga, ma o le taimi nei ua matua tele lava lou taimi avanoa.”

Ua uunaia e Aleks i le taimi nei ia tiakono uma i lana korama ina ia galulue e faataunuu lo latou tiute i le Atua. Ma e na te tuuina atu lea lava fautuaga i soo se isi lava alii talavou o e o mafaufau e uiga i le tatalaina o a latou tamaitusi ma amata loa ona galulue: “Na o le faia lava, “o lana tala lea. “Afai e le mafai ona e faia na o oe, fai e pei ona ou faia ma fesili atu i lo’u tamā lua te faia faatasi.