Na Talanoa mai le Agaga e ala mai ia te A’u

Ina ua maua lo’u valaauga e galue i le Misiona a Farani Toulouse, sa ou fiafia lava e galue i se atunuu ese ma aoao ai i se gagana fou. E ui ou te lei aoaoina muamua le gagana Farani, ae sa ou mautinoa o le a faigofie ona ou aoao e tautala i le gagana.

Sa faamanuia au e lo’u peresitene o le siteki i le meaalofa o gagana ina ua ia vaetofiaina au e avea o se faifeautalai. O lenei faamanuiaga na faaopoopo atu i lo’u naunautai o le a mafai ona vave ona ou aoaoina le gagana Farani.

Ina ua ou taunuu i le nofoaga autu e aoao ai faifeautalai i Provo, Iuta, sa ou naunau lava e amata loa, ae o lou taimi i le NAF sa faalotomaulaloina lava au. Sa lofituina au ma tauivi i aso uma. Ina ua ou tuua le NAF, sa ou lagona na i ai sina alualu i luma i le gagana Farani. Sa ou mafaufau po o afea o le a oo mai ai le meaalofa o gagana.

O lo’u nuu muamua lava i le misiona o se tamai nuu i saute o Farani. I se tasi o aoauli, na o ni nai aso talu ona ou taunuu, sa ma talai ai ma la’u soa i magaala. E le’i tele sa’u tala na fai pe a matou talanoa ma tagata—e tau le mafai ona ou malamalama ia i latou, ma e tau le mafai foi ona latou malamalama ia te a’u.

Sa ma feiloai atu i se tamaitai, ma amata ona faamatala e lau soa ia te ia le Ekalesia. Na faalogo le tamaitai mo ni nai minute ona faafuasei lea ona liliu mai ia te au ma fai mai, “O le a sau oe tala e fai mai?”

Sa ou taumafai ma le naunautai ma le popole ina ia manatua se mea sa ou aoaoina. I se leo tetetete, sa ou tuuina atu se molimau faigofie e uiga i le Tama Faalelagi ma le Tusi a Mamona. Ao ou faia lena mea, sa molimau mai le Agaga ia te au faapea e moni mea sa ou fai atu ai. Ou te le iloa pe na lagona e le tamaitai se mea, ae na ataata o ia, toe liliu atu i la’u soa, ma fai atu ia te ia e faaauau lana savali.

Na ou aoao mai i lenei aafiaga se lesona taua. Sa ou aoao e ui lava e le mafai ona ou tautala manino i le gagana Farani, ae e mafai ona tautala le Agaga e ala atu ia te au. Sa ou aoaoina atonu o le faamanuiaga na ou maua mai i lo’u peresitene o le siteki e moni lava o se faamanuiaga ina ia mafai ai ona ou tautala i le gagana a le Agaga.

Na aoao mai Peresitene Thomas S. Monson: “E i ai se gagana e tasi … ua silafia uma e faifeautalai—o le gagana lea a le Agaga. E le aoaoina mai ni tusi ua tusia e tagata popoto aoaoina, pe aoaoina foi i le faitau po o le tauloto. E maua le gagana a le Agaga e soo se tasi e saili ma lona loto atoa ia malamalama i le Atua ma tausi ana poloaiga paia. O le malamalama atoatoa i lenei gagana e mafai ai e le tagata ona soloia puniala, manumalo i toatuga, ma uunaia loto o tagata” (“O Le Agaga e Ola Ai,” Liahona, Iuni 1997, 4).

E tele tausaga ua mavae, ae o loo uunaia pea a’u e lenei aafiaga. E le o manaomia ona ou toe talai atu le talalelei i le gagana Farani, ae ou te manaomia le fesoasoani a le Agaga pe a fesiligia a’u e aoao atu se lesona pe fai se lauga i le lotu. Pe a ou lagona o loo ou tauivi e faailoa atu au lava, ou te maua le mafanafana i le manatuaina o le a mafai ona talanoa atu le Agaga i loto o fanau uma a le Atua.