O Le Polokalama o le Alualu i Luma o le Tagata Lava Ia a Lo Matou Aiga

Na liliu mai ia aiga o Katya ma Ivanna i le Ekalesia ao faatoa uma lava ona faatulaga le Misiona i Kyiv Iurukueini i le 1992. Ae na amata ona le toe toaaga mai aiga uma e lua ao lei oo i le taimi e papatiso ai teineiti uma e toalua.

Na siitia ese atu le aiga a Ivanna ina ua 13 ona tausaga i se fale e latalata i se falesa o le Au Paia o aso e Gata Ai. Ao la pasiaina ma lona tina, sa manatua e lona tina mea lelei lea na aumai e le Ekalesia i lona olaga. Na ia faamalosiauina ia Ivanna e alu i le lotu. “Sa iloa e lo’u tina e na o mea lelei lava o le a aoaoina ai au i le Ekalesia pe a faatusatusa lea i le lalolagi,” o le tala lea a Ivanna. Na amata ona ia toe auai i le lotu ma gaoioiga ma feiloai ma faifeautalai, ma ina ua fesili atu faifeautalai ia te ia pe fia papatiso, na ia ioeina.

O le 15 o tausaga o Katya na toe foi mai ai mai se malaga a se vaega o le autalavou o le alalafaga. Sa tei o ia ina ua tau atu e lona tama sa ia valaaulia ia faifeautalai e aoaoina o ia. Na ia faamanino mai e ui ina talia o ia e faalogologo, ae na te le fiafia i ai.

Sa setiina e Katya se taimi e feiloai ai ma faifeautalai. “Ao ou faalogologo, sa ou lagona o le auala sao lava lea e ui ai. Na ou manatuaina na lagona sa ou maua ao ou alu i le lotu i lou laitiiti. Ma i sina taimi mulimuli ane, sa ou filifili ai loa e papatiso,” o lana tala lea.

Sa fai e tamaitai talavou uma ni fetuunaiga ina ia avea ma ni tagata o le Ekalesia, ma na fesoasoani ia i laua le Polokalama o le Alualu i Luma o le Tagata Lava Ia e faia lena fesuiaiga. “Sa ou tuputupu ae pea. Sa i ai ni au lava mausa. Na oo lava i le tulaga o ou ofu na manaomia e fai se suiga,” o le toe manatua lea a Katya. “Na fesoasoani ia te au le Polokalama o le Alualu i Luma o le Tagata Lava Ia e fai sina suiga i lea taimi ma lea taimi. Na tuuina mai ia te au le malosi ina ia avea ma se afafine o le Atua, e le na o le i ai lea i le lotu ae i aso uma.”

O le Polokalama o le Alualu i Luma o le Tagata Lava Ia, na mafai ai e Ivanna ma Katya ona faavaeina ni mausa lea o le a faamalosia ai i laua faaleagaga, e pei o le tatalo, suesue i tusitusiga paia, ma le matamata i ata talafeagai. Sa la aoaoina foi le auala e aoao atu ai lesona ma auauna atu ai i isi. O le sili o na mea uma, na fesoasoani lea la te latalata atili ai i le Atua ma avea ma ni faataitaiga sili i o laua aiga.

“Na fesoasoani ia te au le Polokalama o le Alualu i Luma o le Tagata Lava Ia. O galuega uma na faamaeaina na ou maua ai le alualu i luma; na faaopoopo maia le malamalama ma le lototoa,” o le tala lea a Ivanna. “Na matuai lelei lava mo au aua o le toatele o tagata o lo’u aiga e le ni tagata e malolosi i le Ekalesia.”

O suiga na faia e Ivanna e ala i le Polokalama o le Alualu i Luma o le Tagata Lava Ia na fesoasoani ia te ia e avea ma se faataitaiga i lona aiga. “Na vaai ou matua i ou suiga i lenei taimi atoa. Sa matuai fiafia lava i laua ma sa ou alu i le lotu,” o le tala lea a Ivanna. Sa alu na o ia i le lotu ma auai i gaoioiga ae na oo i se tasi aso ae fuafua loa lona tina la te o i le sauniga faamanatuga. Ua la o faatasi nei i le lotu.

O le faataitaiga a Katya na pa’i atu ai foi i olaga o lona aiga. I se taimi puupuu lava ae faatoa auai Katya i le Ekalesia, na amata ona la o mai ma lona tina ma sosoo ai ma lona tama. Na vaaia e aiga o nei tamaitai uma e toalua se suiga na faia i olaga o Katya ma Ivanna e le Polokalama o le Alualu i Luma o le Tagata Lava Ia. Sa latou vaai i lo la fiafia ma mananao loa e avea ma se vaega o lena fiafiaga.

Sa faaauau pea ona tuputupu ae le fiafia o Katya ma lona aiga. Ao auai Katya i le Polokalama o le Alualu i Luma o le Tagata Lava, sa ia matauina o loo taulai atu i le taua o le malumalu. “O loo i ai se vaega atoa o loo ofoina atu mo le alu i le malumalu, ma sa ou matuai fia alu lava i le malumalu, ae e lei saunia ou matua,” na ia manatuaina.

Peitai, na mafai ona auai ia Katya i le malumalu faatasi ma lana vasega seminare. Na ia manatuaina, “Sa ou faia galuega o le malumalu mo le taimi muamua. Sa ou matuai fiafia lava, ma sa ou manao e toe alu. Sa ou manao lava i lo’u aiga e o iina ma faamauina ai mo le faavavau.”

Sa tapena le aiga o Katya ma na iu ai lava ina lagona ua latou sauni e o i le malumalu. E lua tausaga talu lana asiasiga muamua, na toe foi mai ai Katya, ao le taimi la lenei ua faatasi ma lona aiga. “Ua ou malamalama o se nofoaga moni lava e mafai ai ona faavavau aiga,” o le tala lea a Katya. Sa faamauina i latou i le Malumalu o Freiberg Siamani.

E lagona e Katya ma Ivanna le agaga faafetai mo le Ekalesia, ma ua faamanuiaina uma i laua mai ana taulaga, aemaise lava le Polokalama o le Alualu i Luma o le Tagata Lava Ia. “O la’u molimau e uiga i le Polokalama o le Alualu i Luma o le Tagata Lava Ia, o le faamalosia lea ma fesoasoani ia i tatou ina ia atoatoa i soo se vaega o o tatou olaga,” o le tala lea a Katya.

Na lagona e Ivanna na fesoasoani ia te ia le faalapotopotoga a Tamaitai Talavou e saunia e avea o se faifeautalai. E lelei lagona o Ivanna e uiga i le galuega faafaifeautalai. Fai ma a ia, “Aua e te faavaivai, ae ia avea pea ma faataitaiga o le auala na suia ai e le Ekalesia o tatou olaga. O loo tatou fiafia i le i ai i totonu, ma e mananao uma lava tagata ina ia fiafia. Ma afai tatou te aveina tagata ma faaali ia i latou lena fiafia, ona latou mulimuli lea i a tatou faataitaiga. E mafai lava e le aunoa ona tatou fesoasoani i na tagata—i nai laa laiti—, auauna atu ia i latou, ma i nisi taimi matagofie, o le a latou saunia.”