Mauaina o le Filemu i Taimi Faigata

I le taulaga o Kotenepara i Suetena, o loo i ai se auala vatele e i ai ni laau tetele i ona itu e lua. O se tasi aso na ou vaaia ai se āva i le pogati o se tasi o laau, o lea sa ou tilotilo ai ma le fiailoa i totonu ma sa ou vaaia ai sa matuai ’ō’ō lava le laau.

Sa ou te’i i le mafai pea ona tu o le laau. O lea sa ou tilotilo ae ai i luga ma ou vaaia ai se fusi uamea lautele na saisai faataamilo ai le vaega pito i luga o le pogati. Sa mau i le fusi ni nai uaea uamea, ma sa saisai foi ia uaea uamea ma taula agai i nisi o fale o loo lata ane. A e tilotilo mamao mai, e pei lava lea laau o isi laau; ae seiloga e tilotilo i ai i totonu ona faatoa iloa lea e se tagata o le laau e ’ō’ō ae e le mausali ma malosi lona pogati. E oo mai le taimi o le a le mafai ai ona faasaoina le laau ma e tatau ai loa ona tuu i lalo.

E pei lava o se laau mu’amu’a laitiiti e ola faasolosolo seia oo ina avea ma se laau tele, e mafai foi ona tatou tuputupu ae o lea laasaga ma lea laasaga i lo tatou malosi e mausali ma faatumuina ai, e ese mai le laau e ’o’o. O le Togiola faamalolo a Iesu Keriso e mafai ai ona tatou maua le malosi e tulai maualuga ai ma malosi ma faatumuina o tatou agaga—i le malamalama, poto, olioli, ma le alofa.

O le faatuatua ia Iesu Keriso ma le mulimuli i Ana aoaoga e aumaia ai ia i tatou se faamoemoe mautu, ma e avea lenei faamoemoe ma se taula tumau i o tatou agaga. E mafai ona tatou tutumau ma le le mafaagaeetia. E mafai ona tatou maua le toafilemu tumau o le loto; e mafai ona tatou ulu atu i le malologa o le Alii. Vagana lava ua tatou o ese mai le malamalama ma le upumoni, ona faatumuina lea o nofoaga i totonu o o tatou agaga i lagona gaogao ii o le leai o se mea, e pei lava o le laau.

Ia tatou taulai atu i mea ia o le a lagolagoina le toafilemu tumau o le mafaufau ma le loto. Ona “malosi ai lea o [lo tatou] faatuatua fai ifo i luma o le Atua” (MFF 121:45). O le folafolaga e ulu atu i le malologa o le Alii, ia maua le meaalofa o le toafilemu, e matua vavamamao lava mai le faamalieina mo na o sina taimi e le lalolagi. O se meaalofa moni lava faalelagi: “Ou te tuuina atu ia te outou le manuia, o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27). O loo ia te Ia le mana e faamalolo ma faamalosia ai lou agaga. O Ia o Iesu Keriso.