O Au ea o Se Atalii o le Atua?

I le avea ai ma se teineitiiti e 21 tausaga e a’oga i le kolisi, sa ou saili mo le upumoni ma fiafia e faalogo i le savali o le talalelei mai faifeautalai. Sa ou taliaina lemu ma le loto atoa le savali. Sa ou auai i le Ekalesia, ae sa na o au lava le tagata o lo’u aiga e auai.

Pe a ma le tasi le tausaga talu ona avea au ma se tagata o le Ekalesia, ae ou iloaina le tuputupu ae malosi o la’u molimau i aso taitasi, peitai sa i ai se mea na misi. Ou te lei iloa o au o se afafine o le Atua.

E moni sa ou taliaina le Atua o le Tama o tagata uma. Ae peitai, ou te lei iloa pe faapei le lelei o Lona silafia i Ana foafoaga. “Faatasi ai ma mea uma lava o loo i ai i lenei lalolagi,” sa ou fesili ai ia te au lava ia, “e faapefea ona Ia silafia patino au? E faapefea ona Ia mafaufau ia te au o Sona afafine? E faapefea ona alofa o Ia ia te au e pei o Sona afafine?”

O le i ai o nei fesili i lo’u mafaufau na ou liliu atu ai i le Tama Faalelagi i le tatalo. I se taimi puupuu mulimuli ane, i le taimi o le sailiga mau, sa ou maua ai le 1 Nofoaiga Tupu 28:9. Na fai atu le Tupu o Tavita i lona atalii, “O oe foi Solomona e, lo’u atalii, ia iloa e oe le Atua o lou tama; ma auauna ia te ia ma le loto atoa ma le loto fiafia: aua e suesue e Ieova o loto uma, ma ua silafia o mafaufau uma o manatu: afai e te saili atu ia te ia, ona e maua ai lea o ia; a e afai e te tuua o ia, ona tuulafoaiina lea o oe e ia e faavavau.”

E leai lava se isi mau i tusitusiga paia na ou latalata atili ai i lo’u Tama o i le Lagi nai lo le mau lenei. Na molimau mai ia te au e le gata o au o se afafine o le Atua ae afai ou te saili ia te Ia, e mafai ona ou mauaina o Ia. Na molimau mai ia te au e uiga i lo’u natura paia. Ou te lei liua atoa, i lo’u loto, i le manatu o au o se afafine o le Atua. Sa ou faamoemoe e moni nei mea ae le mafai ona ou talitonu i le malamalama o se Tama o i le Lagi alofa. E le mafai ona ou malamalama i se Tagata Soifua e silafia ou manatu tutotonu ma moomooga. E le mafai ona ou taliaina Lona alofa, i le iloaina o o’u faaletonu ma le tele o mea sese na ou faia.

Na aoao mai ia te au e le mau le tele o mea. Muamua, o Tavita, o le na faia ni ana lava mea sese se tele, na fautua atu i lona atalii o Solomona e saili le Alii ma auauna atu ia te Ia ma se faamoemoega atoa. E ala i lenei mea na mafai ai e Solomona ona maua le Alii. O le faitauina o nei upu na fagua ai ia te au se naunautaiga malosi e atiina ae se fegalegaleaiga patino ma lo’u Tama o i le Lagi. Na ou aoao atili e uiga i auala alofa a le Tama Faalelagi. Sa ou iloa lena mea, faapei o Tavita ma Solomona, ma e mafai ona ou mauaina o Ia. Na faatupulaia le ma fegalegaleaiga. Na aumai e lenei mau se mamanu ou te ola ai, ma sa ou iloaina e moni.

Ua ou iloaina e silafia patino au e le Tama Faalelagi. Sa faaauau pea ona ou suesue i lenei mau seia oo ina pipii lenei fuaiupu “e suesue e Ieova o loto uma” i lo’u mafaufau. O taimi uma lava ou te faitauina ai, e musumusu mai le Agaga Paia i lo’u loto e silafia e le Tama Faalelagi mea uma lava, e oo lava “i manatu uma o le mafaufau.” Sa ou iloa ua le na o Ia o lo’u Foafoa a e o Ia o lo’u Tama alofa ma o au o Lona afafine faapelepele. Na iu lava ina ou taliaina e Na te silafiaina au. Na te silafia ou manatu lilo, manaoga, miti, naunautaiga, popolega, taumafaiga, ma le mea sili ona taua ia te au, o ou mafaufauga. E Na te silafia au e pei ona iloa au e o’u matua iinei i le lalolagi ae sili atu. O nei vaaiga na ou maua ai se molimau o au o se afafine o le Atua.